ಕಲಬುರಗಿ: ಕಲ್ಯಾಣದ ಹೆಬ್ಬಾಗಿಲಾದ ಕಲಬುರಗಿ ಯಲ್ಲಿ ಬಸವಣ್ಣನವರನ್ನು ಹೊತ್ತುಕೊಂಡು ಬಸವ ಜಯಂತಿ ಆಚರಿಸುತ್ತಿದ್ದರು. ಆದರೆ ಜಾಗತಿಕ ಲಿಂಗಾಯತ ಮಹಾಸಭಾದವರು ಬಸವಣ್ಣನವರ ನ್ನು ಅಪ್ಪಿಕೊಂಡು ಆಚರಿಸುತ್ತಿರುವುದು ಉತ್ತಮ ಬೆಳವಣಿಗೆ ಎಂದು ಕೂಡಲಸಂಗಮದ ಪಂಚಮಸಾಲಿ ಪೀಠದ
ಜಯ ಮೃತ್ಯುಂಜಯ ಸ್ವಾಮೀಜಿ ನುಡಿದರು.
ನಗರದ ಬಸವೇಶ್ವರ ವೃತ್ತದ ಬಳಿ ಇರುವ ಬಸವ ಸಾಂಸ್ಕೃತಿಕ ಆವರಣದಲ್ಲಿ ಜರುಗುತ್ತಿರುವ ಬಸವ ಜಯಂತಿ ಕಾರ್ಯಕ್ರಮ ದ ಸಾನ್ನಿಧ್ಯ ವಹಿಸಿ ಮಾತನಾಡಿದರು. ಬಸವಣ್ಣ ಅಂದರೆ ಕ್ರಾಂತಿ. ಕ್ರಾಂತಿ ಅಂದರೆ ಬಸವಣ್ಣ. ಬಸವ ಧರ್ಮಕ್ಕೆ ಹೊಸ ವ್ಯಾಖ್ಯಾನ ನೀಡಿದವರು. ಜಗತ್ತಿನ ಮನುಷ್ಯರಿಗೆ ಬಸವ ತತ್ವ ಅನಿವಾರ್ಯ. ಇದು ಜಾಗತಿಕ ತತ್ವ ಎಂದು ಅಭಿಪ್ರಾಯಪಟ್ಟರು.
ಲಿಂಗಾಯತ ಧರ್ಮದ ಡಿಎನ್ಎ ಪರೀಕ್ಷೆ ಮಾಡಿದರೆ ನಮ್ಮಪ್ಪ ಬಸವಣ್ಣ ಎಂಬ ಫಲಿತಾಂಶ ಬರುತ್ತದೆ. ಎಲ್ಲಿ ವೀರಶೈವವೋ ಅಲ್ಲಿ ಗೊಂದಲದ ಭಾವ. ಏಕೆಂದರೆ ಅಲ್ಲಿ ಬಸವಣ್ಣನ ಅಭಾವ ಎಂದು ರಾಮ ಜಾಧವ ಹೇಳುವುದು ನಿಜವಾದ ಮಾತಾಗಿದೆ ಎಂದು ನೇತೃತ್ವ ವಹಿಸಿದ್ದ ಕಾರವಾರದ ಮಾತೆಯವರು ನುಡಿದರು.
ಲಿಂಗಾಯತ ಕಣ, ಬಸವಣ್ಣನೇ ಮೇಟಿ. ಸ್ವಾಮೀಜಿಗಳೇ ಕಣ ತುಳಿಯುವ ಎತ್ತುಗಳು. ಆದರೆ ಈ ಎತ್ತುಗಳು ನೊಗ ಇಳಿಸಿವೆ. ಹೀಗಾಗಿ ಬಸವ ತತ್ವ ಸೊರಗಿದೆ. ಆದರೆ ಬಸವಣ್ಣನ ವಿಚಾರ ಗಳು ಸೊರಗುವುದಿಲ್ಲ ಎಂದರು.
ಲಿಂಗಾಯತ ಪ್ರಗತಿಪರ ಧರ್ಮ. ಇದ್ದ ಜಾಗವನ್ನೇ ಪವಿತ್ರ ಮಾಡಿದರು ಶರಣರು. ಪೂಜೆ ಮಾಡುವ ಹಕ್ಕನ್ನು ಶರಣರು ನಮಗೆ ಕೊಟ್ಟರು. ವಚನ ಸಾಹಿತ್ಯ ನಮ್ಮ ತಾಯಿ. ಬಸವಣ್ಣ ನಮ್ಮಪ್ಪ ಎಂದು ಹೇಳಿದರು.
ಮಹಾಂತೇಶ ಕುಂಬಾರ ನಿರೂಪಿಸಿದರು. ಸಂಗಣ್ಣಗೌಡ ಗುಳ್ಯಾಳ, ಮೆಹರಾಜ್ ಪಟೇಲ್, ಸತೀಶ ಸಜ್ಜನ್ ಇತರರಿದ್ದರು.