ಮಲಕೂಡ ಕ್ರಾಸ್’ನಲ್ಲಿ ದರೋಡೆ; ಮೂವರು ಆರೋಪಿಗಳ ಬಂಧನ

ಚಿತ್ತಾಪುರ; ರಾಜ್ಯ ಮತ್ತು ರಾಷ್ಟ್ರೀಯ ಹೆದ್ದಾರಿಯಲ್ಲಿ ಹೊರ ರಾಜ್ಯದ ಲಾರಿಗಳು, ಟ್ಯಾಂಕರ್ ತಡೆದು ಚಾಲಕರಿಗೆ ಬೆದರಿಸಿ ದರೋಡೆ ಮಾಡುತ್ತಿದ್ದ ಮೂವರನ್ನು ಬಂಧಿಸಿ ಅವರಿಂದ 1,700 ರೂ. ನಗದು, ಎರಡು ಮೊಬೈಲ್, ಒಂದು ಆಟೋ ಜಪ್ತಿ ಮಾಡಿಕೊಂಡಿರುವ ಪ್ರಕರಣ ತಾಲೂಕಿನ ಮಾಡಬೂಳ ಪೊಲೀಸ್ ಠಾಣೆಯಲ್ಲಿ ದಾಖಲಾಗಿದೆ.

ಮಳಖೇಡ ಸಮೀಪದ ಸಮಖೇಡ ತಾಂಡಾದ ಆಟೋ ಚಾಲಕ ಸಚಿನ್ ಮೋಹನ್ ರಾಠೋಡ (24), ಬೀದರ್ ಜಿಲ್ಲೆಯ ಸಿಂಧೋಲ ತಾಂಡಾದ ವೆಂಕಟೇಶ ಮಾರುತಿ ರಾಠೋಡ (19), ಬಸವಕಲ್ಯಾಣದ ಗದ್ಲೆಗಾಂವ ತಾಂಡಾದ ಸಚಿನ್ ಕಾಶಿನಾಥ ರಾಠೋಡ (19) ಹಾಗೂ ಇಬ್ಬರು ಕಾನೂನು ಸಂಘರ್ಷಕ್ಕೆ ಒಳಪಟ್ಟ ಚಾಲಕರನ್ನು ವಶಕ್ಕೆ ಪಡೆದು ನಗದು, ಮೊಬೈಲ್, ಆಟೋ ಸೇರಿದಂತೆ ಒಟ್ಟು 2,09,700 ರೂ‌. ಮೌಲ್ಯದ ವಸ್ತುಗಳನ್ನು ಪೊಲೀಸರು ಜಪ್ತಿ ಮಾಡಿಕೊಂಡಿದ್ದಾರೆ.

ತಾಲೂಕಿನ ಮಲಕೂಡ ಗ್ರಾಮದ ಕ್ರಾಸ್’ನಲ್ಲಿ ಆ.6 ರಂದು ರಾತ್ರಿ 8;30ರ ಸುಮಾರಿಗೆ ಸಿಮೆಂಟ್ ಟ್ಯಾಂಕರ್ ಚಲಾಯಿಸಿಕೊಂಡು ಹೋಗುತ್ತಿದ್ದಾಗ ಕೆಲವರು ಆಟೋದಲ್ಲಿ ಬಂದು ಟ್ಯಾಂಕರ್ ತಡೆದು ನಗದು ಮತ್ತು ಮೊಬೈಲ್ ದೋಚಿಕೊಂಡು ಹೋಗಿದ್ದಾರೆ ಎಂದು ಸೋಲ್ಲಾಪುರ ಜಿಲ್ಲೆಯ ಅಕ್ಕಲಕೋಟ್ ತಾಲೂಕಿನ ವಾಘ್ದಾರಿ ಗ್ರಾಮದ ನಿಜಾಮೋದ್ದಿನ್ ಸೈಫಾನ್ ಬಾಗವಾನ್ ಎಂಬುವವರು ಆ.9 ರಂದು ಮಾಡಬೂಳ ಠಾಣೆಗೆ ದೂರು ನೀಡಿದ್ದರು.

ದರೋಡೆ ಪ್ರಕರಣ ದಾಖಲಾಗಿತ್ತು. ಎಸ್.ಪಿ ಅಡ್ಡೂರು ಶ್ರೀನಿವಾಸಲು, ಹೆಚ್ಚುವರಿ ಎಸ್.ಪಿ ಶ್ರೀನಿಧಿ, ಶಹಾಬಾದ್ ಡಿವೈಎಸ್ಪಿ ಶಂಕರಗೌಡ ಪಾಟೀಲ್ ಅವರ ಮಾರ್ಗದರ್ಶನದಲ್ಲಿ ಕಾಳಗಿ ಸಿಪಿಐ ಜಗದೇವಪ್ಪ ಪಾಳಾ ಅವರ ನೇತೃತ್ವದಲ್ಲಿ ಮಾಡಬೂಳ ಪೊಲೀಸ್ ಠಾಣೆಯ ಪಿಎಸ್’ಐಗಳಾದ ಚೇತನ್, ಶೀಲಾವತಿ ಅವರು ಸಿಬ್ಬಂದಿಯಾದ ಮಾಳಗೊಂಡ, ಪ್ರಶಾಂತ ಹೇರೂರ್, ರಮೇಶ, ಕಮಲಾಕರ್, ವೀರಶೆಟ್ಟಿ ಒಳಗೊಂಡ ತಂಡವು ಕಾರ್ಯಾಚರಣೆ ನಡೆಸಿ ದರೋಡೆಕೋರರನ್ನು ಪತ್ತೆ ಹಚ್ಚುವಲ್ಲಿ ಯಶಸ್ವಿಯಾಗಿದ್ದಾರೆ.