ಪ್ರತ್ಯೇಕ ರಾಜ್ಯದ ಕೂಗಿಗೆ ಕಾರಣವಾಗಬಲ್ಲದು: ಮಾಲಿಕಯ್ಯ ಗುತ್ತೇದಾರ

ಕಲಬುರಗಿ; ಸಾಹಿತ್ಯ ಕ್ಷೇತ್ರದ ಬಹುತೇಕ ಅಕಾಡೆಮಿ, ಪ್ರಾಧಿಕಾರ ಮತ್ತು ಪ್ರತಿಷ್ಠಾನಗಳಿಗೆ ಕಲ್ಯಾಣ ಕರ್ನಾಟಕವನ್ನು ಮಲತಾಯಿ ಧೋರಣೆಯಿಂದ ನೋಡಲಾಗುತ್ತಿದೆ. ಸಾಹಿತ್ಯ ಕ್ಷೇತ್ರಕ್ಕೂ ಅಸಮತೋಲನದ ಬಿಸಿ ತಟ್ಟುತ್ತಿದೆ. ಇದು ಪ್ರತ್ಯೇಕ ರಾಜ್ಯದ ಕೂಗೇಳಲು ಕಾರಣವಾಗಬಲ್ಲದು ಎಂದು ಮಾಜಿ ಸಚಿವ, ಕಾಂಗ್ರೆಸ್ ಹಿರಿಯ ಮುಖಂಡ ಮಾಲೀಕಯ್ಯ ಗುತ್ತೇದಾರ ಖಡಕ್ ಆಗಿ ಹೇಳಿದರು.

ನಗರದ ಅನ್ನಪೂರ್ಣ ಕ್ರಾಸ್ ಬಳಿಯಿರುವ ಕಲಾಮಂಡಳದಲ್ಲಿ ನಡೆದ ಜೇವರ್ಗಿ ತಾಲೂಕು ಕನ್ನಡ ಸಾಹಿತ್ಯ ಪರಿಷತ್ತಿನ ಮಾಜಿ ಅಧ್ಯಕ್ಷರು, ಪ್ರವಚನ ಪಂಡಿತರು ಹಾಗೂ ಹಿರಿಯ ಲೇಖಕರಾಗಿದ್ದ ಶಿವಕವಿ ಹಿರೇಮಠ ಜೋಗೂರ ಅವರ ಪ್ರಥಮ ಪುಣ್ಯ ಸ್ಮರಣೋತ್ಸವÀ ನಿಮಿತ್ತ `ಶಿವಕವೀಶ ಪ್ರಶಸ್ತಿ’ ಪ್ರದಾನ ಸಮಾರಂಭವನ್ನು ಉದ್ಘಾಟಿಸಿ ಮಾತನಾಡಿದ ಅವರು, ಈ ಭಾಗಕ್ಕೆ ವಿಶೇಷ ಸ್ಥಾನಮಾನ ಮತ್ತು 371 ನೇ ತಿದ್ದುಪಡಿ ಹೋರಾಟಕ್ಕೆ ಕಾರಣವಾದ ಪ್ರಾದೇಶಿಕ ಅಸಮತೋಲನದಂತೆ, ಸಾಹಿತ್ಯ ಕ್ಷೇತ್ರದಲ್ಲಿಯೂ ರಾಜ್ಯೋತ್ಸವ ಪುರಸ್ಕಾರ, ಅಕಾಡೆಮಿಗಳ ಪ್ರಶಸ್ತಿ ಸೇರಿದಂತೆ ಸಾಹಿತ್ಯಿಕ ಅಸಮತೋಲನ ಕಂಡುಬರುತ್ತಿದೆ. ಜನಪ್ರತಿನಿಧಿಗಳು ಸಂಬಂಧಿತ ಸಚಿವರಿಗೆ ತಿಳಿಸಿ ಮನವಿ ಮಾಡಿದರೂ ಕ್ಯಾರೇ ಎನ್ನುತ್ತಿಲ್ಲ. ಇದರಿಂದಾಗಿ ಪ್ರತ್ಯೇಕ ರಾಜ್ಯದ ಕೂಗು ಏಳಲು ಕಾರಣವಾಗಬಹುದು. ಇದಾಗದಂತೆ ಸರಕಾರ ಎಚ್ಚರ ವಹಿಸಿ, ಅಕಾಡೆಮಿ, ಪ್ರಾಧಿಕಾರಗಳಲ್ಲಿ ಸೂಕ್ತವಾದ ಸ್ಥಾನಮಾನ ನೀಡುವಂತೆ ಅವರು ಒತ್ತಾಯಿಸಿದರು.

ಶಿವಕವಿ ಹಿರೇಮಠ ಅವರ ಭಾವಚಿತ್ರಕ್ಕೆ ಪೂಜೆ ನೆರವೇರಿಸಿ ಶಾಸಕ ಎಂ.ವೈ.ಪಾಟೀಲ ಮಾತನಾಡಿ, ಶಿವಕವೀಶ ಅವರ ಸಂಸ್ಮರಣಾ ಗ್ರಂಥಕ್ಕೆ ಸಹಾಯ ಮಾಡುವುದಾಗಿ ತಿಳಿಸಿದರು.

ಕನ್ನಡ ಸಾಹಿತ್ಯ ಪರಿಷತ್ತಿನ ಮಾಜಿ ಜಿಲ್ಲಾಧ್ಯಕ್ಷ ಮಹಿಪಾಲರೆಡ್ಡಿ ಮುನ್ನೂರ್ ಅವರು ಶಿವಕವಿ ಅವರ ಬದುಕು-ಬರಹ ಕುರಿತು ಉಪನ್ಯಾಸ ನೀಡಿದರು.

ಶ್ರೀನಿವಾಸ ಸರಡಗಿಯ ಪೂಜ್ಯ ಶ್ರೀ ರೇವಣಸಿದ್ದ ಶಿವಾಚಾರ್ಯರು ಹಾಗೂ ಚಿಣಮಗೇರಿಯ ಪೂಜ್ಯ ಶ್ರೀ ವೀರಮಹಾಂತ ಮಹಾಸ್ವಾಮಿಗಳು ಸಾನಿಧ್ಯ ವಹಿಸಿದ್ದರು. ಸಂಶೋಧಕರಾದ ಡಾ.ಶ್ರೀಶೈಲ ಬಿರಾದಾರ ಅಧ್ಯಕ್ಷತೆ ವಹಿಸಿದ್ದರು. ಜೋಗೂರ ಹಿರೇಮಠದ ಪೂಜ್ಯ ಶ್ರೀ ಮರುಳಸಿದ್ದ ದೇವರು ಪ್ರಾಸ್ತಾವಿಕ ಮಾತನಾಡಿದರು. ಸತ್ಯಂ ಕಾಲೇಜಿನ ಪ್ರಾಚಾರ್ಯ ಬಿ.ಎಚ್.ನಿರಗುಡಿ ಕಾರ್ಯಕ್ರಮ ನಿರೂಪಿಸಿದರು.

ಪ್ರಶಸ್ತಿ ಪ್ರದಾನ : ಶಿವಕವಿ ಹಿರೇಮಠ ಜೋಗೂರ ಅವರ ಪ್ರಥಮ ಸ್ಮರಣೋತ್ಸವದಿಂದ ಅವರ ಹೆಸರಿನಲ್ಲಿ ಪ್ರಶಸ್ತಿಯನ್ನು ಸ್ಥಾಪಿಸಿದ್ದು, `ಶಿವಕವೀಶ ಪುರಸ್ಕಾರ’ವನ್ನು ಖ್ಯಾತ ಪ್ರವಚನಕಾರ ಮಲ್ಲಿಕಾರ್ಜುನ ಶಾಸ್ತ್ರೀ ಐನಾಪುರ ಹಾಗೂ ಖ್ಯಾತ ಲೇಖಕಿ ಪ್ರೊ.ಶೋಭಾದೇವಿ ಚೆಕ್ಕಿ ಅವರಿಗೆ ಶಾಲು ಸತ್ಕಾರ, ಅಭಿನಂದನಾ ಪತ್ರ, ಎರಡು ಸಾವಿರ ನಗದು ನೀಡಿ ಗೌರವಿಸಲಾಯಿತು. ಸಾಹಿತಿಗಳಾದ ಕಿರಣ ಪಾಟೀಲ, ಸಿ.ಎಸ್.ಮಾಲಿಪಾಟೀಲ, ವಡ್ಡನಕೇರಿ, ವೀರಣ್ಣ ಜೋಗುರ, ಅಂಬರಾಯ ಕೋಣಿನ್, ಶಿವಯ್ಯ ಮಠಪತಿ ಇತರರು ಇದ್ದರು.