ದೊರೆಯೇ
ನನ್ನ ಬಳಿ ಸಾಬೀತು
ಪಡಿಸಲು ಏನೂ ಉಳಿದಿಲ್ಲ
ಉಳಿದಿರುವುದು ಈಗ
ನನ್ನ ಬಳಿಯೂ ಇಲ್ಲ
ಕಾಣದ ಊರು ನನ್ನದಾಗುವಾಗ
ಆಳುತ್ತಾ ಬಿದ್ದ ಊರು ನನ್ನದಲ್ಲವಂತೆ
ಏನು ಹೇಳಲಿ ದೊರೆಯೇ
ಇದು ಗೊತ್ತಿದ್ದರೆ ಹುಟ್ಟಿ
ಬಿಳುವಾಗಲೇ ಒಂದಿಡಿ ಮಣ್ಣು
ಅಂಗೈಯಲ್ಲಿ ಜೋಪಾನ ಮಾಡಿಕೊಳ್ಳುತ್ತಿದ್ದೆ
ನನ್ನ ಹಿರಿಯರು ಮೋಸ ಹೋಗುತ್ತಿದ್ದಾರೆ
ಬಿಳಿಯರ ಬೂಟು ನೆಕ್ಕಿದ ನಾಲಗೆ ಈಗ
ನನ್ನನ್ನು ಪರಕೀಯನೆಂದು ಹೇಳುವಾಗ
ಎಲ್ಲಿಂದ ತಂದು ಕೊಡಲಿ ದೊರೆಯೇ
ಸಾಬೀತಿನ ಪತ್ರವಾ..?
ಹಾಗಾದರೆ ಅವರೊಂದು
ಕೆಲಸ ಮಾಡಲಿ ದೊರೆಯೇ
ಬಿಳಿ ಹುಳುಗಳ ಬೂಟು
ಹುಡುಕಿಕೊಂಡು ತರಲಿ
ಆ ಬೂಟಿನ ತಳಪದರದಲ್ಲಿ
ನನ್ನ ಪೂರ್ವಜರ ಎದೆಯ
ಅಚ್ಚೆ ಇದೆ, ಮೇಲೆ ಕೆಲ ನಾಲಗೆಯ
ಅಚ್ಚೆಯೂ ಇದೆ, ಅದಷ್ಟೇ
ನನ್ನ ಬಳಿ ಇರುವ ಏಕೈಕ ಸಾಬೀತು ಪತ್ರ
ಇಲ್ಲ ದೊರೆಯೇ ನೀನೇ
ದರೆಗಿಳಿದು ಬಂದರೂ ಸರಿ
ನಾನು ಒಂದಿಂಚೂ ಸರಿಯುವುದಿಲ್ಲ
ಈ ನೆಲದ ಬದಲಿಗೆ ಸ್ವರ್ಗದ
ಆಮಿಷವೊಡ್ಡಿದರೂ ಅಷ್ಟೇ
ಕೊನೆಯ ಉಸಿರು ಇಲ್ಲಿನ
ಗಾಳಿಯಲ್ಲಿ ಲೀನಗೊಳ್ಳಬೇಕು
ನನ್ನ ರಕ್ತವನ್ನ ಈ ನೆಲದ
ಮಣ್ಣಷ್ಟೇ ಕುಡಿಯಬೇಕು
ನನ್ನ ಮಾಂಸವನ್ನ ಈ
ನೆಲದ ಮಣ್ಣಷ್ಟೇ ತಿಂದು ತೇಗಬೇಕು
– ಆಶಿಕ್ ಮುಲ್ಕಿ, ಪತ್ರಕರ್ತ