ಬಾರಿಸೋಣ ಬನ್ನಿ ಕನ್ನಡ ಡಿಂಡಿಮವ…ವಾಡಿ: ಸಾಹಿತ್ಯ ಸಮ್ಮೇಳನ ಪ್ರಚಾರಕ್ಕೆ ಚಾಲನೆ

ವಾಡಿ: ಕಲಬುರಗಿ ನಗರಕ್ಕೆ ಸೀಮಿತವಾಗಿದ್ದ ಅಖಿಲ ಭಾರತ ಸಾಹಿತ್ಯ ಸಮ್ಮೇಳನ ಪ್ರಚಾರ ಕಾರ್ಯ ಪಟ್ಟಣ ಪ್ರದೇಶದಲ್ಲೂ ಚಾಲನೆ ದೊರೆತಿದೆ. ಸಂಚಲನ ಸಾಹಿತ್ಯ-ಸಾಂಸ್ಕೃತಿಕ ವೇದಿಕೆಯ ಪದಾಧಿಕಾರಿಗಳು ಸುಂದರವಾದ ಗೋಡೆ ಬರಹ ಬರೆಯುವ ಮೂಲಕ ಕನ್ನಡದ ಡಿಂಡಿಮದ ಕಹಳೆ ಮೊಳಗಿಸಿದ್ದಾರೆ.

ಪಟ್ಟಣದ ರೈಲು ನಿಲ್ದಾಣ ಪ್ರವೇಶ ದ್ವಾರದ ಗೋಡೆಗೆ ಬಾರಿಸೋಣ ಬನ್ನಿ ಕನ್ನಡದ ಡಿಂಡಿಮವ ಎಂಬ ಟ್ಯಾಗ್‌ಲೈನ್ ನೀಡುವ ಮೂಲಕ ಆಕರ್ಷಕ ಗೋಡೆ ಬರಹ ಮೂಡಿಸಿ ಗಮನ ಸೆಳೆದಿದ್ದಾರೆ. ಫೆ. ೫,೬,೭ ರಂದು ಮೂರು ದಿನಗಳ ಕಾಲ ಕಲಬುರಗಿ ನಗರದಲ್ಲಿ ನಡೆಯುತ್ತಿರುವ ಅಖಿಲ ಭಾರತ ಸಾಹಿತ್ಯ ಸಮ್ಮೇಳನದ ಪೂರಕವಾಗಿ ವಿವಿಧ ರೀತಿಯ ಪ್ರಚಾರ ಕಾರ್ಯಕ್ಕೆ ಮುಂದಾಗಿರುವ ಸಂಚಲನ ಸಾಹಿತ್ಯ ವೇದಿಕೆ ಸದಸ್ಯರು, ತಮ್ಮದೇ ರೀತಿಯಲ್ಲಿ ಸಾಹಿತ್ಯ ಸೇವೆಗೆ ಆಧ್ಯತೆ ನೀಡಿರುವುದು ವಿಶೇಷ.

ಗೋಡೆ ಬರಹಕ್ಕೆ ಚಾಲನೆ ನೀಡಿ ಮಾತನಾಡಿದ ಸಂಚಲನ ಸಾಹಿತ್ಯ ವೇದಿಕೆ ಅಧ್ಯಕ್ಷ ಮಡಿವಾಳಪ್ಪ ಹೇರೂರ, ಬಿಸಿಲು ನಗರಿ ಕಲಬುರಗಿಗೆ ಆಗಮಿಸಿರುವ ಕನ್ನಡ ನುಡಿ ತೇರಿಗೆ ಅದ್ಧೂರಿಯಾಗಿ ಸ್ವಾಗತಿಸಬೇಕಾದ್ದು ನಮ್ಮ ಕರ್ತವ್ಯ. ನೂನ್ಯತೆಗಳನ್ನೇ ದೊಡ್ಡದಾಗಿ ಪ್ರಚಾರ ಮಾಡುವುದಕಿಂತ ಶೂನ್ಯತೆಗಳನ್ನು ತುಂಬಿ ಕನ್ನಡದ ಡಿಂಡಿಮ ಬಾರಿಸಬೇಕಿದೆ. ಈ ಬಾರಿಯ ಸಾಹಿತ್ಯ ಸಮ್ಮೇಳನದ ಗೋಷ್ಠಿಗಳು ಕಲ್ಯಾಣ ಕರ್ನಾಟಕದ ಜನರ ಸಾಹಿತ್ಯ-ಜೀವನ ಕ್ರಮ ಹಾಗೂ ಅಭಿವೃದ್ಧಿ ಕಾಣದೆ ಸ್ಮಾರಕಗಳಂತೆ ನಿಂತಿರುವ ಗ್ರಾಮೀಣ ಭಾಗದ ಸರಕಾರಿ ಕನ್ನಡ ಶಾಲೆಗಳ ದುಸ್ಥಿತಿಗಳ ಮೇಲೆ ಬೆಳಕು ಚೆಲ್ಲುವ ಕಾರ್ಯವಾಗುತ್ತದೆ ಎಂಬ ಮಹದಾಸೆ ಹೊಂದಿದ್ದೇವೆ. ಸಾಹಿತ್ಯ ಸಮ್ಮೇಳನ ಜಾತ್ರೆಯಾಗಿ ಅಂತ್ಯಗೊಳ್ಳದೆ ಪರಿವರ್ತನೆಯ ದೀಪ ಬೆಳಗಿಸಬೇಕಿದೆ. ಮುಗ್ಗರಿಸಿರುವ ಕನ್ನಡದ ಶಾಲೆಗಳು ಚೇತರಿಕೆ ಕಾಣಬೇಕಿದೆ. ಸರಕಾರಿ ಕನ್ನಡ ಶಾಲೆಗಳಲ್ಲಿ ಓದುವ ಬಡ ಮಕ್ಕಳ ಶೈಕ್ಷಣಿಕ ಗುಣಮಟ್ಟ ಕಾನ್ವೆಂಟ್ ಶಾಲೆಗಳಿಗೆ ಮೀರಿಸುವಂತಿರಬೇಕು. ಆಗ ಕನ್ನಡ ಸ್ವಾಭೀಮಾನ ಗರ್ವ ಉಂಟಾಗುತ್ತದೆ ಎಂದರು.

ಸಂಚಲನ ಸಾಹಿತ್ಯ ವೇದಿಕೆಯ ಪದಾಧಿಕಾರಿಗಳಾದ ಚಂದ್ರು ಕರಣಿಕ, ಸಿದ್ದಯ್ಯಶಾಸ್ತ್ರೀ ನಂದೂರಮಠ, ಶ್ರವಣಕುಮಾರ ಮೌಸಲಗಿ, ಮಲ್ಲೇಶ ನಾಟೀಕಾರ, ವೀರಣ್ಣ ಯಾರಿ, ದತ್ತು, ಸುನೀಲ, ವಿಜಯಕುಮಾರ ಯಲಸತ್ತಿ ಪಾಲ್ಗೊಂಡಿದ್ದರು.