ಮಹಿಳೆಯರಿಗೆ ಧ್ವನಿ ಕೊಟ್ಟವರು ಬಸವಣ್ಣನವರು: ಐ.ಆರ್. ಮಠಪತಿ

ಕಲಬುರಗಿ: 12 ನೇ ಶತಮಾನಕ್ಕೂ ಪೂರ್ವದಲ್ಲಿ ಮಹಿಳೆಯರ ಸ್ಥಿತಿ ಚಿಂತಾಜನಕವಾಗಿತ್ತು. ಪುರುಷ ಪ್ರಧಾನ ಸಮಾಜ ಅದಾಗಿತ್ತು. ಮಹಿಳೆಯರಿಗೆ ಧ್ವನಿ ಕೊಟ್ಟವರೆ ಅಪ್ಪ ಬಸವಣ್ಣನವರು ಎಂದು ಐ.ಆರ್. ಮಠಪತಿ ಅಭಿಪ್ರಾಯಪಟ್ಟರು.

ಆತ್ಮಕ್ಕೆ ಯಾವ ಬಣ್ಣ ಇಲ್ಲ ಎಂದು ಬಗೆದ ಶರಣರು ಮಹಿಳೆಯರಿಗೆ ಮುಕ್ತ ಸ್ವಾತಂತ್ರ್ಯ ಮಾತ್ರವಲ್ಲ ಪೂಜ್ಯ ಸ್ಥಾನವನ್ನು ನೀಡಿದ್ದರು. ಮಹಿಳೆಯರು ತಮ್ಮ ಅನಿಸಿಕೆಗಳನ್ನು ಮುಕ್ತವಾಗಿ ಹಂಚಿಕೊಂಡರು ಎಂದು ತಿಳಿಸಿದರು. ಜಾಗತಿಕ ಲಿಂಗಾಯತ ಮಹಾಸಭಾ ಹಾಗೂ ವಿವಿಧ ಬಸವಪರ ಸಂಘಟನೆಗಳ ಆಶ್ರಯ ದಲ್ಲಿ ನಡೆದ ಬಸವ ಜಯಂತಿ ಉತ್ಸವದ ನಾಲ್ಕನೇ ದಿನದ ಕಾರ್ಯಕ್ರಮದಲ್ಲಿ ಶರಣರು ಮತ್ತು ಮಹಿಳಾ ಸಂವೇದನೆ ವಿಷಯ ಕುರಿತು ಮಾತನಾಡಿದರು.

ಮನೆಗಳನ್ನು ಮಹಾಮನೆಗಳನ್ನಾಗಿ ಮಾಡುವ ಶಕ್ತಿ ಶರಣರು ತುಂಬಿದರು.ಹೆಣ್ಣು ಸಾಕ್ಷಾತ್ ಕಪಿಲ ಸಿದ್ಧ ಮಲ್ಲಿಕಾರ್ಜುನ ಎಂದು ಅವರು ಕರೆದರು. ಅಕ್ಕ, ನೀಲಾಂಬಿಕೆ, ದುಗ್ಗಳೆ, ಅಕ್ಕನಾಗಮ್ಮ, ಗಜೇಶ ಮಸಣಯ್ಯಗಳ ಪುಣ್ಯಸ್ತ್ರೀ, ಕಾಳವ್ವೆ ಸೇರಿದಂತೆ 33 ಜನರು ಅನುಭವ ಮಂಟಪ ಎಂಬ ವೇದಿಕೆಯಲ್ಲಿ ತಮ್ಮ ಸಂವೇದನೆ ವ್ಯಕ್ತ ಪಡಿಸಿದರು.

ಮಹಿಳೆಯರ ಸೂತಕ ಮಾತ್ರವಲ್ಲ, ಮನದ ಸೂತಕವನ್ನು ಸಹ ಕಳೆದ ಶರಣರು ಮಹಿಳೆಯರಿಗೆ ಉನ್ನತ ಸ್ಥಾನ ನೀಡಿದರು ಎಂದರು. ಕೂಡಲ ಸಂಗಮ ಪಂಚಮಸಾಲಿ ಪೀಠದ ಜಯಬಸವ ಮೃತ್ಯುಂಜಯ ಸ್ವಾಮೀಜಿ ಸಾನ್ನಿಧ್ಯ ವಹಿಸಿದ್ದರು. ಜಾಗತಿಕ ಲಿಂಗಾಯತ ಮಹಾಸಭಾದ ಜಿಲ್ಲಾ ಘಟಕದ ಅಧ್ಯಕ್ಷ ಪ್ರಭುಲಿಂಗ ಮಹಾಗಾಂವಕರ ಅಧ್ಯಕ್ಷತೆ ವಹಿಸಿದ್ದರು.
ವಿಧಾನಬಪರಿಷತ್ ಮಾಜಿ ಸದಸ್ಯ ಶಶೀಲ ನಮೋಶಿ, ಮಾಜಿ ಮೇಯರ್ ಶರಣು ಮೋದಿ, ಬಿ.ಎಂ. ರಾಂಪುರೆ, ಗುರುಬಸಪ್ಪ ಪಾಟೀಲ, ಸಚಿನ್ ಫರಹತಾಬಾದ್, ಧನರಾಜ ಜೀರಗೆ, ಶಂಕರ ಹೂಗಾರ, ಮಸ್ತಾನ ಬಿರಾದಾರ, ಅರ್ಜುನ ಭದ್ರೆ, ಆರ್.ಜಿ. ಶೆಟಗಾರ, ರವೀಂದ್ರ ಶಾಬಾದಿ, ಬಸವರಾಜ ಮೊರಬದ, ತಿಪ್ಪಣ್ಣಪ್ಪ ಕಮಕನೂರ ಇತರರು ವೇದಿಕೆಯಲ್ಲಿದ್ದರು.

ಇದೇ ವೇಳೆಯಲ್ಲಿ ವಿವಿಧ ಕ್ಷೇತ್ರದಲ್ಲಿನ ಸಾಧಕರಾದ ಮಾಜಿ ಸಚಿವ ಎಸ್.ಕೆ. ಕಾಂತಾ, ಎಂ.ಕೆ. ಆರ್ಟ್ ನ ಮಲ್ಲಿಕಾರ್ಜುನ ಜನವಾಡ, ಎಲ್.ಬಿ.ಕೆ. ಆಲ್ದಾಳ, ಸಂಬಣ್ಣ ಹೊಳಕುಂದಿ ಕಾಯಕ ಪ್ರಶಸ್ತಿ ನೀಡಿ ಗೌರವಿಸಲಾಯಿತು.

ಗುಂಡಣ್ಣ ಡಿಗ್ಗಿ, ಸಾಯಬಣ್ಣ ಹೋಳ್ಕರ್, ಬಿ.ಎಚ್. ಭಜಂತ್ರಿ ಅವರಿಗೆ ವಿಶೇಷ ಸನ್ಮಾನ ಮಾಡಲಾಯಿತು. ಜಯಶ್ರೀ ಚಟ್ನಾಳ ಪ್ರಾಸ್ತಾವಿಕ ಮಾತನಾಡಿದರು.