’ಸಾಮೂಹಿಕ ಪ್ರಯತ್ನದಿಂದ ಪ್ರತಿಶತ ಫಲಿತಾಂಶ ಸಾಧ್ಯ’

ಕಲಬುರಗಿ: ಎಸ್ಸೆಸ್ಸೆಲ್ಸಿ ಫಲಿತಾಂಶದಲ್ಲಿ ನಮ್ಮ ಜಿಲ್ಲೆಯೂ ಹಿಂದುಳಿದಿದ್ದು, ಇನ್ನೂ ಹೆಚ್ಚಿನ ಪ್ರಮಾಣದ ಶ್ರಮವಹಿಸಿ ಫಲಿತಾಂಶ ಸುಧಾರಣೆಗಾಗಿ ನಿರಂತರವಾಗಿ ಪ್ರಯತ್ನಿಸಬೇಕಾಗಿದೆ. ಇದರಲ್ಲಿ ಶಿಕ್ಷಕರು, ವಿದ್ಯಾರ್ಥಿಗಳು, ಪಾಲಕ-ಪೋಷಕ ವರ್ಗ, ಸಂಸ್ಥೆ ಇವರೆಲ್ಲರೂ ಸಾಮೂಹಿಕವಾಗಿ ಪ್ರಯತ್ನಿಸಿದರೆ ಖಂಡಿತವಾಗಿಯೂ ಪ್ರತಿಶತ ಫಲಿತಾಂಶ ಪಡೆಯಲು ಸಾಧ್ಯವಾಗುತ್ತದೆಯೆಂದು ಇಲ್ಲಿನ ಅಯ್ಯರವಾಡಿಯ ಹೈ.ಕ.ಶಿ.ಸಂಸ್ಥೆಯ ಪ್ರೌಢಶಾಲಾ ಮುಖ್ಯ ಶಿಕ್ಷಕಿಯವರಾದ ಜಯಶ್ರೀ ಎಸ್.ಹಿರೇಮಠ ಅಭಿಪ್ರಾಯಪಟ್ಟರು.

ಅವರು ತಮ್ಮ ಪ್ರೌಢಶಾಲೆ ಎಸ್ಸೆಸ್ಸೆಲ್ಸಿ ಪರೀಕ್ಷೆಯ ಫಲಿತಾಂಶದಲ್ಲಿ ಪ್ರತಿಶತ ಫಲಿತಾಂಶ ಪಡೆದಿದ್ದರ ನಿಮಿತ್ಯ, ನಗರದ ಅಗ್ನಿ ಶಾಮಕ ಕಚೇರಿಯ ಎದುರುಗಡೆಯ, ಮಹಾಲಕ್ಷ್ಮೀ ನಗರದಲ್ಲಿರುವ ತಮ್ಮ ಸ್ವಗೃಹದಲ್ಲಿ, ಇಲ್ಲಿನ ’ಬಸವೇಶ್ವರ ಸಮಾಜ ಸೇವಾ ಬಳಗ’ದ ವತಿಯಿಂದ ಭಾನುವಾರ ಸಂಜೆ ಏರ್ಪಡಿಸಿದ್ದ ಸಮ್ಮಾನ ಸಮಾರಂಭದಲ್ಲಿ ಗೌರವ ಸ್ವೀಕರಿಸಿ, ನಂತರ ಮಾತನಾಡುತ್ತಿದ್ದರು.

ವಿದ್ಯಾರ್ಥಿಗಳ ಸರ್ವತೋಮುಖ ದೃಷ್ಟಿಯಿಂದ ಅವರ ಮನಮುಟ್ಟುವ ಹಾಗೆ ಬೋಧನಾ ಕಾರ್ಯವು ಜರುಗಿಸಲಾಯಿತು. ಫಲಿತಾಂಶ ಸುಧಾರಣೆಗಾಗಿ ಎಲ್ಲಾ ಶಿಕ್ಷಕರು, ವಿದ್ಯಾರ್ಥಿಗಳ, ಪಾಲಕ-ಪೋಷಕರ, ನಮ್ಮ ಸಂಸ್ಥೆಯ ಸಹಕಾರ ದೊರೆದಿದ್ದರಿಂದ ಇದು ಸಾಧ್ಯವಾಯಿತು. ನಮ್ಮ ಸ್ವಂತ ಮಕ್ಕಳಂತೆ ಭಾವಿಸಿ, ಅವರೆಲ್ಲರಿಗೂ ವೈಯಕ್ತಿಕ ಕಾಳಜಿ ವಹಿಸಲಾಯಿತು. ಈ ಸಮ್ಮಾನ ನಮ್ಮ ಜವಾಬ್ದಾರಿಯನ್ನು ಇನ್ನಷು ಹೆಚ್ಚಿಸಿದೆಯೆಂದು ಹೇಳಿದರು.
ಮುಖ್ಯ ಅತಿಥಿಯಾಗಿದ್ದ ಇಂಗ್ಲೀಷ ವಿಷಯದ ಜಿಲ್ಲಾ ಸಂಪನ್ಮೂಲ ವ್ಯಕ್ತಿ ಮಳಯ್ಯ ಹಿರೇಮಠ ಮಾತನಾಡಿ, ಪ್ರತಯೊಬ್ಬರಲ್ಲಯೂ ಸೇವಾ ಮನೋಭಾವನೆ ಬೆಳೆಯಬೇಕು. ನಿರಂತರ ಶ್ರಮದ ಮೂಲಕ ಇಂತಹ ಸಾಧನೆ ಸಾಧ್ಯವಾಗುತ್ತದೆ.ಈ ಶಾಲೆಯ ಸಾಧನೆ ಮಾದರಿಯಾಗಿದೆಯೆಮದರು.

ಸಮಾರಂಭದ ಅಧ್ಯಕ್ಷತೆಯನ್ನು ವಹಿಸಿದ್ದ ಬಳಗದ ಸಂಸ್ಥಾಪಕ ಅಧ್ಯಕ್ಷ, ಉಪನ್ಯಾಸಕ ಎಚ್.ಬಿ.ಪಾಟೀಲ ಮಾತನಾಡುತ್ತಾ, ಸರ್ಕಾರ ಫಲಿತಾಂಶ ಸುಧಾರಣೆಗಾಗಿ ಸಾಕಷ್ಟು ಪ್ರಮಾಣದಲ್ಲಿ ಹಣ ವ್ಯಯ ಮಾಡಿ ಅನೇಕ ಯೋಜನೆ, ಕಾರ್ಯಕ್ರಮಗಳನ್ನು ಜಾರಿಗೊಳಿಸುತ್ತಿದೆ. ಪ್ರಸ್ತುತವಾಗಿ ಫಲಿತಾಂಶದಲ್ಲಿ ಸ್ವಲ್ಪ ಪ್ರಮಾಣದಲ್ಲಿ ಪ್ರಗತಿ ಕಂಡುಬಂದಿದೆ. ಅದರೂ ಕೂಡಾ ಇನ್ನೂ ಹೆಚ್ಚಿನ ಕಾರ್ಯವನ್ನು ಮಾಡುವ ಮೂಲಕ ಫಲಿತಾಂಶದಲ್ಲಿ ಸುಧಾರಿಸಬೇಕಾಗಿದೆ. ಇದಕ್ಕೆ ಎಲ್ಲರೂ ಜೊತೆಗೂಡಿ ಕಾರ್ಯನಿರ್ವಹಿಸಬೇಕೆಂದರು.

ಸಮಾರಂಭದಲ್ಲಿ ಬಳಗದ ಸದಸ್ಯರಾದ ರೇಣುಕಾಚಾರ್ಯ ಸ್ಥಾವರಮಠ, ಸಂಜೀವಕುಮಾರ ಪಾಟೀಲ, ಎಸ್.ಬಿ.ಪಾಟೀಲ, ಲಿಂಗಯ್ಯ ಸಾಲಿಮಠ, ರವಿ ಹೂಗಾರ, ಬಸವರಾಜ ದೇಸಾಯಿ, ಪ್ರಭಾಕರ ಎನ್.ವಾಕಡೆ, ಮಂಜುನಾಥ ಜಿಡಗೆ, ಅನಿಲ್ ಧೋತ್ರೆ, ಕುಟುಂಬಸ್ಥರಾದ ಡಾ.ಸೋನಿ ಎಸ್.ಹಿರೇಮಠ, ಶಿವಾನಿ ಹಿರೇಮಠ ಸೇರಿದಂತೆ ಮತ್ತಿತರರು ಪಾಲ್ಗೊಂಡಿದ್ದರು.