ಕಲಬುರಗಿ: ಕಾರ್ಪೊರೇಷನ್ ಲಾರಿ ಹರಿದು ತಾಯಿ ಮತ್ತು ನಾಲ್ಕು ತಿಂಗಳ ಮಗು ಸಾವನ್ನಪ್ಪಿರುವ ದಾರುಣ ಘಟನೆ ನಗರದ ಬಸವೇಶ್ವರ ಆಸ್ಪತ್ರೆ ಬಳಿ ನಡೆದಿದೆ.
ಸುಲ್ತಾನ ಬೇಗಂ (34), ಅವರ ನಾಲ್ಕು ತಿಂಗಳ ಮಗು ಇಂಚಿರಾ ಮಹಮ್ಮದಿ ಮೃತ ತಾಯಿ-ಮಗು ಎಂದು ತಿಳಿದು ಬಂದಿದ್ದು, ಮೃತರನ್ನು ಕಲಬುರಗಿಯ ಅಜಾದ್ ಪುರ ಬಡಾವಣೆಯ ನಿವಾಸಿಗಳು ಎಂದು ಗುರುತಿಸಲಾಗಿದೆ.
ಘಟನೆಯಲ್ಲಿ ಸುಲ್ತಾನ ಬೇಗಂ ಪತಿ ಮಹಮ್ಮದ್ ರಫೀಕ್, ಪುತ್ರಿ ಪಾಯಮಲ್ ನಾಜಾ ಗಾಯಗೊಂಡಿದ್ದಾರೆ. ಗಾಯಾಳುಗಳಿಗೆ ಚಿಕಿತ್ಸೆಗಾಗಿ ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಲಾಗಿದೆ.
ಪತಿ-ಪತ್ನಿ ಮಕ್ಕಳು ನಾಲ್ವರು ದ್ವಿಚಕ್ರ ವಾಹನದ ಮೇಲೆ ಬಸವೇಶ್ವರ ಆಸ್ಪತ್ರೆ ಬಳಿ ತೆರಳುವಾಗ ಎದುರಿಂದ ಬಂದ ಕಾರ್ಪೊರೇಷನ್ ಲಾರಿ ಹರಿದು ಹೊದ ಪರಿಣಾಮ ತಾಯಿ ಮತ್ತು ಮಗು ಸ್ಥಳದಲ್ಲೆ ಮೃತ ಪಟ್ಟಿರುವ ದುರ್ಘಟನೆ ನಡೆದಿದೆ. ಘಟನಾ ಸ್ಥಳದಲ್ಲಿದ ಸಾರ್ವಜನಿಕರು ಘಟನೆಯ ಕುರಿತು ಆಕ್ರೋಶಗೊಂಡ ಲಾರಿ ಮೇಲೆ ಕಲ್ಲು ತೂರಾಡಿದ್ದಾರೆ ಎನ್ನಲಾಗಿದೆ.
ನಂತರ ಘಟನಾ ಸ್ಥಳಕ್ಕೆ ಆಗಮಿಸಿದ ಸಂಚಾರಿ ಠಣೆಯ ಪೊಲೀಸರು ಲಾರಿ ಚಾಲಕನನ್ನು ವಶಕ್ಕೆ ಪಡೆದಿದ್ದು ಪ್ರಕರಣ ದಾಖಲಿಸಿದ್ದಾರೆ. ಘಟನೆ ಕುರಿತು ಸಂಚಾರಿ ಪೊಲೀಸ್ ಠಾಣೆಯ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.