ಸತ್ಯಂಪೇಟೆಯಲ್ಲಿ ಸಿಡಿಲು ಬಡಿದು 25 ಕುರಿಗಳ ಸಾವು:ಸ್ಥಳಕ್ಕೆ ಅಧಿಕಾರಿಗಳ ಭೇಟಿ

ಸುರಪುರ: ತಾಲೂಕಿನ ಸತ್ಯಂಪೇಟೆ ಗ್ರಾಮದ ಹೊರ ವಲಯದಲ್ಲಿ ಶನಿವಾರ ರಾತ್ರಿ ಸುರಿದ ಮಳೆಯ ಸಂದರ್ಭದಲ್ಲಿ ಸಿಡಿಲು ಬಡಿದು 25 ಕುರಿಗಳು ಸಾವನ್ನಪ್ಪಿರುವ ಘಟನೆ ನಡೆದಿದೆ.ಸತ್ಯಂಪೇಟೆ ಗ್ರಾಮದ ಸಣ್ಣ ತಿಮ್ಮಣ್ಣ ಪುರ್ಲೆ ಎಂಬುವವರ 250 ಕುರಿಗಳಿದ್ದು ಅವುಗಳಲ್ಲಿ 25 ಕುರಿಗಳು ಸಿಡಿಲಿಗೆ ಬಲಿಯಾಗಿವೆ.

ಶನಿವಾರ ರಾತ್ರಿ ತುಂಬಾ ಮಳೆ ಬೀಳುತ್ತಿರುವಾಗ ಸತ್ಯಂಪೇಟೆ ಹೊರ ವಲಯದಲ್ಲಿ 250 ಕುರಿಗಳನ್ನು ದೊಡ್ಡಿಯಲ್ಲಿ ಹಾಕಿ ಸಣ್ಣ ತಿಮ್ಮಣ್ಣನವರ ಮಗನಾದ ಸಣ್ಣ ನರಸಪ್ಪ ಕುರಿ ದೊಡ್ಡಿಯ ಪಕ್ಕದಲ್ಲಿ ಮಲಗಿದ್ದು ರಾತ್ರಿ ಮಳೆಯ ಸಂದರ್ಭದಲ್ಲಿ ಸಿಡಿಲು ಬಿದ್ದು ಕುರಿಗಳು ಸಾವನಪ್ಪಿವೆ,ಆದರೆ ದೊಡ್ಡಿಯಿಂದ ಸ್ವಲ್ಪ ದೂರದಲ್ಲಿದ್ದ ಕುರಿಗಾಹಿ ಸಣ್ಣ ನರಸಪ್ಪ ಪ್ರಾಣಾಪಾಯದಿಂದ ಪಾರಾಗಿದ್ದಾನೆ.

ಘಟನಾ ಸ್ಥಳಕ್ಕೆ ಕಂದಾಯ ಇಲಾಖೆಯ ಅಧಿಕಾರಿಗಳು ಹಾಗು ಸುರಪುರ ಪೊಲೀಸರು ಭೇಟಿ ನೀಡಿ ಪರಿಶೀಲಿಸಿದ್ದಾರೆ.ಸಾಲ ಮಾಡಿ ತಂದು ಕುರಿಗಳನ್ನು ಸಾಕಾಣಿಕೆ ಮಾಡುತ್ತಿದ್ದು ಈಗ ಏಕಾಎಕಿ 25 ಕುರಿಗಳು ಸತ್ತಿದ್ದರಿಂದ ದೊಡ್ಡ ನಷ್ಟವುಂಟಾಗಿದೆ ಸರಕಾರ ಪರಿಹಾರ ನೀಡಬೇಕೆಂದು ಸಣ್ಣ ತಿಮ್ಮಣ್ಣ ಪುರ್ಲೆ ಮನವಿ ಮಾಡಿದ್ದಾರೆ.