ದೇವಸ್ಥಾನ ಆವರಣದಲ್ಲಿ ನಿಧಿ ಶೋಧನೆ ಮಾಡುತ್ತಿದ್ದ ಮೂವರು ನಿಧಿಗಳ್ಳರ ಬಂಧನ

ಕಲಬುರಗಿ: ಮಧ್ಯರಾತ್ರಿ ಊರ ಹೊರಗೆ ಕಾರ್ಗತ್ತಲಲ್ಲಿ ದೇವಸ್ಥಾನವೊಂದರ ಆವರಣದಲ್ಲಿ ನಿಧಿ ಶೋಧನೆಯಲ್ಲಿ ತೊಡಗಿದ್ದ ಒಟ್ಟು ಆರು ಜನರಲ್ಲಿ ಮೂವರು ಆರೋಪಿಗಳನ್ನು ವಾಡಿ ಠಾಣೆ ಪೊಲೀಸರು ಬಂಧಿಸಿದ ಪ್ರಸಂಗ ನಡೆದಿದೆ.

ಚಿತ್ತಾಪುರ ತಾಲೂಕಿನ ನಾಲವಾರ ವಲಯದ ರಾಂಪುರಹಳ್ಳಿ ಹಾಗೂ ಶಾಂಪೂರಹಳ್ಳಿ ಗ್ರಾಮಗಳ ಮಧ್ಯೆ ಇರುವ ಶೇಷಪ್ಪ ನಿಡಾಲ್ ಎಂಬುವವರ ಹೊಲದಲ್ಲಿರುವ ಶ್ರೀಭಾಗ್ಯವಂತಿ ದೇವಿ ದೇವಸ್ಥಾನ ಆವರಣದಲ್ಲಿ ಬುಧವಾರ ತಡರಾತ್ರಿ ೩:೦೦ ಗಂಟೆ ವೇಳೆ ಕಳ್ಳರು ಭೂಮಿ ಪೂಜೆ ನೆರವೇರಿಸಿ ನೆಲ ಬಗೆಯುತ್ತಿದ್ದರು ಎನ್ನಲಾಗಿದ್ದು, ರಾತ್ರಿ ಗಸ್ತಿನಲ್ಲಿದ್ದ ಪಿಎಸ್‌ಐ ವಿಜಯಕುಮಾರ ಭಾವಗಿ ಹಾಗೂ ಪೊಲೀಸ್ ಸಿಬ್ಬಂದಿಗಳಾದ ದೊಡ್ಡಪ್ಪ ಪೂಜಾರಿ, ದತ್ತು ಜಾನೆ, ನಿಂಗಣ್ಣ ಹಾಗೂ ಚನ್ನಬಸವ ಅವರು ಅನುಮಾನಗೊಂಡು ಮೋಬಾಯಿಲ್ ಬ್ಯಾಟರಿ ಬೆಳಕಿನಲ್ಲಿ ನಡೆದುಕೊಂಡು ಹೋಗಿ ಸ್ಥಳದ ಮೇಲೆ ದಾಳಿ ನಡೆಸಿದ್ದಾರೆ.

ಒಟ್ಟು ಆರು ಜನರು ಸೇರಿಕೊಂಡು ನೆಲ ಬಗೆಯುತ್ತಿದ್ದಾಗ ಶಾಂಪುರಹಳ್ಳಿಯ ಹಣಮಂತ ಕತ್ರಿ, ತರ್ಕಸಪೇಟೆಯ ಸಾಬಣ್ಣ ಅರಿಕೇರಿ ಹಾಗೂ ರಾಂಪುರಹಳ್ಳಿಯ ಬಸಲಿಂಗ ಮಾಡಗಿ ಎಂಬ ಮೂವರು ನಿಧಿಗಳ್ಳರನ್ನು ವಶಕ್ಕೆ ಪಡೆದು ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ.

ಬಂಧಿತರಿಂದ ಗುದ್ದಲಿ, ಸಲಿಕೆ, ಹಾರಿ, ಬುಟ್ಟಿ ವಶಪಡಿಸಿಕೊಳ್ಳಲಾಗಿದೆ. ಪರಾರಿಯಾದ ಮೂವರು ಆರೋಪಿಗಳು ಬಾಗಲಕೋಟೆ ಮತ್ತು ತಾಳಿಕೋಟೆ ಮೂಲದವರೆಂದು ತಿಳಿದುಬಂದಿದ್ದು, ಅವರ ಪತ್ತೆಗೆ ಜಾಲ ಬೀಸಲಾಗಿದೆ ಎಂದು ಪಿಎಸ್‌ಐ ವಿಜಯಕುಮಾರ ಭಾವಗಿ ತಿಳಿಸಿದ್ದಾರೆ. ವಾಡಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.