ಕಲಬುರಗಿ: ಬೈಕ್ ಅಪಘಾತ: ಇಬ್ಬರ ಸಾವು

ಕಲಬುರಗಿ: ಪರಸ್ಪರ ಎರಡು ಬೈಕ್‍ಗಳ ಮಧ್ಯೆ ಸಂಭವಿಸಿದ ಮುಖಾಮುಖಿ ಡಿಕ್ಕಿಯಿಂದ ಇಬ್ಬರು ಸ್ಥಳದಲ್ಲೇ ಮೃತಪಟ್ಟು ಇಬ್ಬರು ಮಹಿಳೆಯರು ಗಾಯಗೊಂಡ ಘಟನೆ ರವಿವಾರ ಸಂಜೆ ಸನ್ನತಿ ರಸ್ತೆಯಲ್ಲಿ ನಡೆದಿದೆ.

ಕೊಲ್ಲೂರ ಗ್ರಾಮದ ನಿವಾಸಿ ಶಂಕರಗೌಡ ಬಸವರೆಡ್ಡಿ (56) ಹಾಗೂ ಇಂಗಳಗಿ ಗ್ರಾಮದ ನಿವಾಸಿ ರವಿ ಈರಣ್ಣ (35) ಮೃತಪಟ್ಟ ಬೈಕ್ ಸವಾರರಾಗಿದ್ದಾರೆ. ಬೈಕ್ ಹಿಂಬದಿ ಸವಾರರಾದ ಮೃತ ರವಿಯ ಪತ್ನಿ ಶಿವಲೀಲಾ ಹಾಗೂ ಆತನ ಮಗಳು ವೈಷ್ಣವಿ ಅವರಿಗೆ ಗಂಭೀರ ಗಾಯಗಳಾಗಿದ್ದು, ಅವರನ್ನು ಕೂಡಲೇ ಕಲಬುರಗಿ ನಗರದ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಕೊಲ್ಲೂರ ಮತ್ತು ಸನ್ನತಿ ಗ್ರಾಮಗಳ ಮಧ್ಯೆ ಈ ದುರ್ಘಟನೆ ಸಂಭವಿಸಿದ್ದು, ಶಂಕರಗೌಡ ಎಂಬಾತ ಹೊಲದ ರಸ್ತೆಯಿಂದ ಮುಖ್ಯರಸ್ತೆ ಕೂಡುವಾಗ ಕುಟುಂಬ ಸಮೇತ ಹೆಂಡತಿಯ ತವರುಮನೆಗೆ ಹೋಗುತ್ತಿದ್ದ ರವಿ ಎಂಬುವವರ ಬೈಕ್‍ಗೆ ಡಿಕ್ಕಿ ಹೊಡೆದಿದ್ದಾನೆ ಎನ್ನಲಾಗಿದೆ.

ಅಜಾಗರುಕತೆಯ ಪರಿಣಾಮ ಘೋರ ದುರಂತವೊಂದನ್ನು ಘಟಿಸಿ ಇಬ್ಬರು ಬೈಕ್ ಸವಾರರು ಪ್ರಾಣ ಕಳೆದುಕೊಳ್ಳುವಂತಾಗಿದೆ. ವಾಹನಗಳ ವೇಗದ ತೀವ್ರತೆಗೆ ಎರಡೂ ಬೈಕ್‍ಗಳು ನಜ್ಜುಗುಜ್ಜಾಗಿವೆ. ವಾಡಿ ಠಾಣೆಯ ಪಿಎಸ್‍ಐ ವಿಜಯಕುಮಾರ ಭಾವಗಿ ಹಾಗೂ ಸಿಬ್ಬಂದಿ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ.

ಈ ಕುರಿತು ವಾಡಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.