ಸಾಂಸ್ಕೃತಿಕ ಜವಾಬ್ದಾರಿ; ವಿಮುಖಗೊಂಡ ಮಾಧ್ಯಮ: ಪತ್ರಕರ್ತ ಶ್ರೀನಿವಾಸ ಶಿರನೂರಕರ್

ಕಲಬುರಗಿ: ಸಾಂಸ್ಕೃತಿಕ ಜವಾಬ್ದಾರಿಯಿಂದ ಮಾಧ್ಯಮ ಗಳು ವಿಮುಖವಾಗುತ್ತಿವೆ ಎಂದು ಪತ್ರಕರ್ತ, ಲೇಖಕ ಶ್ರೀನಿವಾಸ ಶಿರನೂರಕರ್ ವಿಷಾದ ವ್ಯಕ್ತಪಡಿಸಿದರು.

ನಗರದ ರಂಗಾಯಣದಲ್ಲಿ ಪತ್ರಕರ್ತರಿಗಾಗಿ ಏರ್ಪಡಿಸಿದ್ದ ರಂಗ ವಿಮರ್ಶಾ ಕಮ್ಮಟದ ಸಮಾರೋಪ ಸಮಾರಂಭದಲ್ಲಿ ಅವರು ಮಾತನಾಡಿದರು.

ಮಾಧ್ಯಮಗಳು ವಾಣಿಜೀಕರಣದತ್ತ ವಾಲಿದ ಪರಿಣಾಮ ಸಾಂಸ್ಕೃತಿಕ ಕ್ಷೇತ್ರಕ್ಕೆ   ದೊಡ್ಡ ನಷ್ಟವಾಗುತ್ತಿದೆ. ಇದರಿಂದ ರಂಗಭೂಮಿಗೆ ಸಂಬಂಧಿಸಿದಂತೆ ಸುದ್ದಿ, ವಿಮರ್ಶೆಗಳಿಗೆ ಜಾಗವಿಲ್ಲದಂತಾಗಿದೆ. ಇದಕ್ಕಾಗಿ ಪತ್ರಿಕೆಗಳ ಸಂಪಾದಕರು ಮತ್ತು ಮಾಲೀಕರಿಗೆ ಕಮ್ಮಟಗಳನ್ನು ಏರ್ಪಡಿಸಿ ಸಾಂಸ್ಕೃತಿಕ ಕ್ಷೇತ್ರಕ್ಕೆ ಸಂಬಂಧಿಸಿ ಮನವರಿಕೆ ಮಾಡಿಕೊಡಬೇಕಿದೆ ಎಂದು ಸಲಹೆ ನೀಡಿದರು.

ಸಿನಿಮಾ ವಿಮರ್ಶೆಗಳು ಪತ್ರಿಕೆಗಳಲ್ಲಿ ಪ್ರಾಮುಖ್ಯತೆ ಪಡೆಯುತ್ತವೆ. ಏಕೆಂದರೆ ಸಿನಿಮಾಗಳ ವಾಣಿಜ್ಯೀಕರಣ ಪರಿಣಾಮ. ಆದರೆ ನಾಟಕಗಳು ವಾಣಿಜ್ಯೀಕರಣ ಅಲ್ಲದ ಕಾರಣ ಅವುಗಳಿಗೆ ಪ್ರಾಮುಖ್ಯತೆ ಸಿಗುತ್ತಿಲ್ಲ. ಇನ್ನು ಮುಂದಾದರೂ ಪತ್ರಿಕೆಗಳಲ್ಲಿ ರಂಗಭೂಮಿಗೆ ಜಾಗ ಸಿಗಲಿ ಎಂದು ಆಶಿಸಿದರು.

ಮುಖ್ಯ ಅತಿಥಿಯಾದ ನಾಟಕಕಾರ ಡಾ.ರಾಜಪ್ಪ ದಳವಾಯಿ ಮಾತನಾಡಿ, ಕನಾ೯ಟಕ ಏಕೀಕರಣಕ್ಕೆ ಲಲಿತಕಲೆಗಳೇ ಕಾರಣ ಎಂದರು. ಪತ್ರಕರ್ತರಿಗೆ ರಂಗ ವಿಮರ್ಶಾ ಕಮ್ಮಟ ಏರ್ಪಡಿದ  ರಂಗಾಯಣ ಕಾಯ೯ ಶ್ಲಾಘನೀಯ ಎಂದರು. ಅಧ್ಯಕ್ಷತೆ ವಹಿಸಿದ್ದ ರಂಗಾಯಣ ನಿರ್ದೇಶಕ ಪ್ರಭಾಕರ ಜೋಶಿ ಮಾತನಾಡಿ ಬರುವ ದಿನಗಳಲ್ಲಿ ರಂಗಭೂಮಿಗೆ ಪೂರಕವಾಗುವ ಎಲ್ಲ ಬಗೆಯ ಕಾಯ೯ಕ್ರಮ ಆಯೋಜಿಸಲಿದೆ ಎಂದು ಹೇಳಿದರು.

ರಂಗಾಯಣದ ರಂಗ ಸಮಾಜದ ಸದಸ್ಯ ಪ್ರಭುದೇವ ಕಪ್ಪಗಲ್ ಮಾತನಾಡಿ ಫೆಬ್ರುವರಿ ಮೊದಲ ವಾರದಲ್ಲಿ ಪ್ರಸಾಧನ ಶಿಬಿರವನ್ನು ಕಲಬುರಗಿಯಲ್ಲಿ ಏರ್ಪಡಿಸಲಾಗಿದೆ ಎಂದು ತಿಳಿಸಿದರು.

ಜಿಲ್ಲಾ ಕಾಯ೯ನಿರತ ಪತ್ರಕರ್ತರ ಸಂಘದ ಅಧ್ಯಕ್ಷ ಭವಾನಿ ಸಿಂಗ್ ಠಾಕೂರ್, ಕನಾ೯ಟಕ ನಾಟಕ ಅಕಾಡೆಮಿ ಸದಸ್ಯ ಪ್ರವೀಣ ರಾಠೋಡ ವೇದಿಕೆ ಮೇಲಿದ್ದರು. ರಂಗಾಯಣದ ಆಡಳಿತಾಧಿಕಾರಿ ಜಗದೀಶ್ವರಿ ಶಿವಕೇರಿ ಸ್ವಾಗತಿಸಿದರು.