ಕಲಬುರಗಿ: ಕದ್ದ ಟ್ರ್ಯಾಕ್ಟರ್‍ನ್ನು ಗುಜರಿ ಅಂಗಡಿಗೆ ಮಾರಾಟ ಮಾಡಲು ಯತ್ನಿಸಿದ ಮೂವರನ್ನು ಪೋಲಿಸರು ಬಂಧಿಸಿದ ಘಟನೆ ಮಂಠಾಳ್ ಠಾಣೆಯ ಪೋಲಿಸ್ ವ್ಯಾಪ್ತಿಯಲ್ಲಿ ವರದಿಯಾಗಿದೆ. ಬಂಧಿತರನ್ನು ನಾವದಗಿ (ಬಿ) ಗ್ರಾಮದ ನಿವಾಸಿಗಳಾದ ಯಲ್ಲಾಲಿಂಗ್ ಹಣಮಂತ್ ಕೊಳೆ, ಸಿದ್ದು ಅಲಿಯಾಸ್ ಸಿದ್ದನಗೌಡ ಹಣಮಂತ್ ಪಾಟೀಲ್, ಶಿವಕುಮಾರ್ ಬಸವಂತರಾವ್ ಬಿರಾದಾರ್ ಎಂದು ಗುರುತಿಸಲಾಗಿದೆ.
ಬಂಧಿತ ಮೂವರು ಆರೋಪಿಗಳು ತಾಲ್ಲೂಕಿನ ದಸ್ತಾಪೂರ್- ನಾವದಗಿ ಸೀಮಾಂತರದಲ್ಲಿ ಬರುವ ಹೊಲದಲ್ಲಿ ನಿಲ್ಲಿಸಲಾಗಿದ್ದ ಸಿದ್ದಪ್ಪ ತಂದೆ ಶಾಂತಪ್ಪ ಪಾಟೀಲ್ ಅವರಿಗೆ ಸೇರಿದ ಟ್ರ್ಯಾಕ್ಟರನ್ನು ಕಳೆದ 12ರಂದು ರಾತ್ರಿ ಕಳ್ಳತನ ಮಾಡಿದ್ದರು. ಆ ಟ್ರ್ಯಾಕ್ಟರನ ಬಿಡಿಭಾಗಗಳನ್ನು ಬೇರ್ಪಡಿಸಿ ಬೀದರ್ ಜಿಲ್ಲೆಯ ಬಸವಕಲ್ಯಾಣದಲ್ಲಿನ ಗುಜರಿ ಅಂಗಡಿಗೆ ಮಾರಾಟ ಮಾಡಲು ಹೋಗುತ್ತಿರುವುದಾಗಿ ಮಂಠಾಳ್ ಠಾಣೆಯ ಪೋಲಿಸರಿಗೆ ತನಿಖೆಯ ವೇಳೆ ಬಾಯಿ ಬಿಟ್ಟರು.
ಬಂಧಿತ ಆರೋಪಿಗಳನ್ನು ಮಂಠಾಳ್ ಠಾಣೆಯ ಪೋಲಿಸರು ಮಹಾಗಾಂವ್ ಠಾಣೆಯ ಪೋಲಿಸರಿಗೆ ಒಪ್ಪಿಸಿದರು. ಬಂಧಿತರನ್ನು ನ್ಯಾಯಾಂಗ ವಶಕ್ಕೆ ಒಪ್ಪಿಸಲಾಗಿದೆ.