20 ರಂದು ವಡ್ಡನಕೇರಿ, ದೊಡ್ಮನಿ ಸಾಲಿ ಸೇರಿದಂತೆ ಐವರಿಗೆ ಧೈರ್ಯನಿಧಿ ಪ್ರಶಸ್ತಿ ಪ್ರದಾನ

ಕಲಬುರಗಿ: ಸದಾಕಾಲ ಸಮಾಜದ ಒಡನಾಟದೊಂದಿಗೆ ತಮ್ಮ ಬದುಕನ್ನು ಮೀಸಲಿಟ್ಟಿದ್ದ ಜಿಲ್ಲಾ ವೀರಶೈವ ಮಹಾಸಭಾದ ಅಧ್ಯಕ್ಷರಾಗಿದ್ದ ಲಿಂ. ಡಿ.ವ್ಹಿ. ಪಾಟೀಲರವರ ಸ್ಮರಣಾರ್ಥ ಇಲ್ಲಿನ ಕರ್ನಾಟಕ ವಚನ ಸಾಹಿತ್ಯ ಅಕಾಡೆಮಿಯು ಜೂನ್ ೨೦ ರಂದು ಬೆಳಗ್ಗೆ ೧೦.೪೫ಕ್ಕೆ ನಗರದ ಸೇಡಂ ರಸ್ತೆಯಲ್ಲಿರುವ ವಿ.ವಿ. ಹಾಸ್ಟೇಲ್ ಸಭಾಂಗಣದಲ್ಲಿ ಧೈರ್ಯನಿಧಿ ಪ್ರಶಸ್ತಿ ಪ್ರದಾನ ಸಮಾರಂಭವನ್ನು ಏರ್ಪಡಿಸಲಾಗಿದೆ ಎಂದು ಅಕಾಡೆಮಿ ಅಧ್ಯಕ್ಷ ವಿಜಯಕುಮಾರ ತೇಗಲತಿಪ್ಪಿ ತಿಳಿಸಿದ್ದಾರೆ.

ಸಾರಂಗಮಠದ ಜಗದ್ಗುರು ಡಾ. ಸಾರಂಗಧರ ದೇಶಿಕೇಂದ್ರ ಮಹಾಸ್ವಾಮಿಗಳವರ ದಿವ್ಯಸಾನಿಧ್ಯದಲ್ಲಿ ಜರುಗಲಿರುವ ಸಮಾರಂಭದಲ್ಲಿ ಮಾಜಿ ಎಂ.ಎಲ್.ಸಿ. ಕೆ.ಬಿ.ಶಾಣಪ್ಪ ಸಾಧಕರಿಗೆ ಪ್ರಶಸ್ತಿ ಪ್ರದಾನ ಮಾಡಲಿದ್ದಾರೆ. ಜಿಲ್ಲಾ ವೀರಶೈವ ಮಹಾಸಭಾದ ಅಧ್ಯಕ್ಷ ಡಾ. ಅರುಣಕುಮಾರ ಎಸ್. ಪಾಟೀಲ ಅಧ್ಯಕ್ಷತೆ ವಹಿಸಲಿದ್ದು, ನಿವೃತ್ತ ಕಾರ್ಯನಿರ್ವಾಹಕ ಅಭಿಯಂತರರಾದ ಎಸ್.ಎನ್. ಪುಣ್ಯಶೆಟ್ಟಿ, ಶರಣ ಚಿಂತಕ ಜೇವರ್ಗಿಯ ರಾಜಶೇಖರ ಸೀರಿ, ಶ್ರೀ ಬಸವೇಶ್ವರ ಸಹಕಾರ ಬ್ಯಾಂಕಿನ ನಿರ್ದೇಶಕಿ ಸುಶೀಲಾಬಾಯಿ ಡಿ. ವ್ಹಿ. ಪಾಟೀಲ ಮುಖ್ಯ ಅತಿಥಿಗಳಾಗಿ ಆಗಮಿಸಲಿದ್ದಾರೆ.

ಪ್ರಶಸ್ತಿಗೆ ಭಾಜನ : ಲಿಂ. ಡಿ.ವ್ಹಿ. ಪಾಟೀಲ ಸ್ಮರಣಾರ್ಥವಾಗಿ ಕೊಡಮಾಡುವ ಧೈರ್ಯನಿಧಿ ಪ್ರಶಸ್ತಿಗೆ ಪಿ.ಡಿ.ಎ. ಇಂಜಿನೀಯರಿಂಗ್ ಕಾಲೇಜಿನ ಗ್ರಂಥಪಾಲಕ ಡಾ. ಮಲ್ಲಿಕಾರ್ಜುನ ವಡ್ಡನಕೇರಿ, ಆಕಾಶವಾಣಿ ಮತ್ತು ದೂರದರ್ಶನ ಸಂಗೀತ ಕಲಾವಿದ ಬಸವರಾಜ ಸಾಲಿ, ಗುಲಬರ್ಗಾ ವಿ.ವಿ.ಯ ನಿವೃತ್ತ ಉಪ ಕುಲಸಚಿವ ಆರ್.ಎಸ್. ದೊಡ್ಮನಿ, ಬಸವತತ್ವ ಆಚರಣಾ ಸಂಸ್ಥೆಯ ಉಪಾಧ್ಯಕ್ಷ ಸಿದ್ದಾರಾಮ ಯಳವಂತಗಿ, ಜಯನಗರ ನೀಲಮ್ಮನ ಬಳಗದ ಗೀತಾ ಟಿ. ಕರೇಗೌಡರ್ ರವರು ಆಯ್ಕೆಯಾಗಿದ್ದಾರೆ.

ವಿಶೇಷ ಸತ್ಕಾರ: ಅತಿಯಾದ ಬೇಸಿಗೆ ಕಾಲದಲ್ಲಿ ತಮ್ಮ ತಮ್ಮ ಬಡಾವಣೆಯ ನಾಗರಿಕರಿಗೆ ಉಚಿತವಾಗಿ ಕುಡಿಯುವ ನೀರಿನ ವ್ಯವಸ್ಥೆಯನ್ನು ಕಲ್ಪಿಸಿ ಕೊಡುತ್ತಿರುವ ಹಿನ್ನೆಲೆಯಲ್ಲಿ ಪ್ರಶಾಂತ ಅಪ್ಪಣ್ಣ ಗುಡ್ಡಾ, ಶಿವಕುಮಾರ ತೋಳನೂರ, ವಿಜಯಕುಮಾರ ಹಳಕಟ್ಟಿ, ರೇವಣಸಿದ್ದಪ್ಪಾ ಬಡಾ ರಟಕಲ್, ಮಂಜುನಾಥ ಕಳಸ್ಕರ್ ರವರನ್ನು ಸಹ ಇದೇ ಸಂದರ್ಭದಲ್ಲಿ ವಿಶೇಷವಾಗಿ ಸತ್ಕರಿಸಲಾಗುತ್ತದೆ.