ಗವೀಶ ಹಿರೇಮಠ ಅವರ “ಗುಣಗ್ರಾಹಿ” ಸಂಸ್ಮರಣ ಗ್ರಂಥ ಲೋಕಾರ್ಪಣೆ

• ಕವಿ ಕಲಾವಿದರು ಎಚ್ಚರಿಸುವ ಕೆಲಸ ಮಾಡುವಂತೆ ಅಲ್ಲಮಪ್ರಭು ಪಾಟೀಲ ಸಲಹೆ

ಕಲಬುರಗಿ: ಕವಿ, ಕಲಾವಿದರು ಸಮಾಜದ ಸಂಪತ್ತು. ಅವರನ್ನು ಗೌರವಿಸುವುದು, ಅವರ ವಿಚಾರಧಾರೆಗಳನ್ನು ಮುಂದಿನ ಪೀಳಿಗೆಗೆ ಕೊಂಡೊಯ್ಯುವುದು ಪ್ರತಿಯೊಬ್ಬರ ಜವಾಬ್ದಾರಿ ಎಂದು ಬಂಡಾಯ ಸಾಹಿತಿ ಪ್ರೊ. ಅಲ್ಲಮಪ್ರಭು ಬೆಟ್ಟದೂರು ತಿಳಿಸಿದರು.

ಇಲ್ಲಿನ ಜಯನಗರದ ಅನುಭವ ಮಂಟಪದಲ್ಲಿ ಭಾನುವಾರ ಆಯೋಜಿಸಿದ್ದ ಗವೀಶ ಹಿರೇಮಠರ ದ್ವಿತೀಯ ಪುಣ್ಯ ಸ್ಮರಣೆ ಹಾಗೂ ಗುಣಗ್ರಾಹಿ ಸಂಸ್ಮರಣ ಗ್ರಂಥ ಲೋಕಾರ್ಪಣೆ ಸಮಾರಂಭ ಉದ್ಘಾಟಿಸಿ ಮಾತನಾಡಿದ ಅವರು, ಹಲವಾರು ರಂಗ ಕಲಾವಿದರ ಅಭಿನಂದನಾ ಗ್ರಂಥಗಳನ್ನು ಹೊರ ತಂದಿದ್ದ ಗವೀಶ ಅವರು, ಅನನ್ಯ ಪ್ರೀತಿಯ ಮನುಷ್ಯ. ಬಯಲಾಟ ಅಕಾಡೆಮಿ ಸ್ಥಾಪಿಸುವಲ್ಲಿ ಸರ್ಕಾರದ ಮೇಲೆ ಒತ್ತಡ ಹೇರಿದವರಲ್ಲಿ ಹಿರೇಮಠ ಕೂಡ ಒಬ್ಬರಾಗಿದ್ದರು ಎಂದು ಅವರ ಸಾಮಾಜಿಕ ಸೇವೆಯನ್ನು ಹೃದಯಾರೆ ಸ್ಮರಿಸಿದರು.

Contact Your\'s Advertisement; 9902492681

ಕಲಾವಿರದನ್ನು ಹಳಿಯುವ, ವಿಚಾರವಂತರನ್ನು ಬೈಯುವ ಈಗಿನ ದಿನಮಾನಗಳಲ್ಲಿ ರಾಜಕಾರಣವೇ ಪ್ರಧಾನವಾಗಿದೆ. ಆಳುವ ಪಕ್ಷಕ್ಕೆ ವಿರೋಧ ಪಕ್ಷ ಬಹಳ ಮುಖ್ಯ. ವಿರೋಧ ಪಕ್ಷಗಳು ಮಲಗಿದ ವೇಳೆ ಆಳುವ ಪಕ್ಷವನ್ನು ಎಚ್ಚರಿಸುವ ಕೆಲಸ ಕವಿ, ಕಲಾವಿದರು ಮಾಡಬೇಕು. ಅದೇವೇಳೆಗೆ ಗುಣಗ್ರಾಹಿಗಳ ಅಗತ್ಯ ಕೂಡ ಇದೆ ಎಂದು ಕಿವಿ ಮಾತು ಹೇಳಿದರು.

ನಾಟಕ ಅಕಾಡೆಮಿ ಮಾಜಿ ಅಧ್ಯಕ್ಷ ಶೇಖ್ ಮಾಸ್ತರ್ ಗ್ರಂಥ ಲೋಕಾರ್ಪಣೆ ಮಾಡಿದರು. ಪುಸ್ತಕ ಕುರಿತು ಡಾ. ಗವಿಸಿದ್ದಪ್ಪ ಪಾಟೀಲ ಮಾತನಾಡಿದರು. ಶ್ರೀಧರ ಹೆಗಡೆ, ಸರಸ್ವತಿ ಚಿಮ್ಮಲಗಿ, ಪಿ.ಎಂ. ಮಣ್ಣೂರ ಸಂಸ್ಮರಣಾ ನುಡಿಗಳನ್ನಾಡಿದರು. ಸುಶೀಲಾ ಗವೀಶ ಹಿರೇಮಠ, ಸಂತೋಷ ಗವೀಶ ಹಿರೇಮಠ ವೇದಿಕೆಯಲ್ಲಿದ್ದರು. ಇದೇವೇಳೆಯಲ್ಲಿ ಜೇವರಗಿ ರಾಜಣ್ಣ, ಡಾ. ಗಿರಿಮಲ್ಲ ಕೆ., ಮಲ್ಲಿಕಾರ್ಜುನ ಬಬಲೇಶ್ವರ, ಮಹಾದೇವ ಹೊಸೂರ ಅವರನ್ನು ಸನ್ಮಾನಿಸಲಾಯಿತು.

ಶೋಭಾ ಗಂಗಾಧರ ಹಿರೇಮಠ ಪ್ರಾರ್ಥನೆ ಗೀತೆ ಹಾಡಿದರು. ಸಂಸ್ಮರಣ ಗ್ರಂಥದ ಸಂಪಾದಕರಾದ ಪ್ರಭಾಕರ ಜೋಶಿ ಸ್ವಾಗತಿಸಿದರು. ಮಹಿಪಾಲರೆಡ್ಡಿ ಮುನ್ನೂರ್ ಪ್ರಾಸ್ತಾವಿಕ ಮಾತುಗಳನ್ನಾಡಿದರು. ಬಿ.ಎಚ್. ನಿರಗುಡಿ ನಿರೂಪಿಸಿದರು. ಡಾಶ. ವಿ.ಜಿ. ಪೂಜಾರ, ಸುಬ್ಬರಾವ ಕುಲಕರ್ಣಿ, ಡಾ. ಚಿ.ಸಿ. ನಿಂಗಣ್ಣ, ಲಿಂಗಾರೆಡ್ಡಿ ಶೇರಿ, ಸಿದ್ಧರಾಮ ಹೊನ್ಕಲ್, ಚಾಮರಾಜ ದೊಡ್ಡಮನಿ, ಜಿ.ಜಿ. ವಣಿಕ್ಯಾಳ, ಡಾ. ಶ್ರೀಶೈಲ ನಾಗರಾಳ, ಡಾ. ವಿಜಯಕುಮಾರ ಪರೂತೆ, ಜಯದೇವ ಹಿರೇಮಠ, ಚೈತನ್ಯ ಹಿರೇಮಠ ಇತರರಿದ್ದರು.