ಸುರಪುರ: ನಗರದ ಬಸ್ ನಿಲ್ದಾಣದ ಬಳಿಯಲ್ಲಿನ ಡಾ:ಬಾಬಾ ಸಾಹೇಬ್ ಅಂಬೇಡ್ಕರ್ ಪುತ್ಥಳಿ ಬಳಿಯಲ್ಲಿನ ಮಂಗಳವಾರ ರಾತ್ರಿ ಮಹಾ ಪರಿನಿರ್ವಾಣ ದಿನವನ್ನು ಆಚರಿಸಲಾಗಿದೆ.
ವಿವಿಧ ದಲಿತ ಸಂಘಟನೆಗಳ ಮುಖಂಡರು ಹಾಗೂ ಕಾಂಗ್ರೆಸ್ ಮುಖಂಡರಾದ ರಾಜಾ ವೇಣುಗೊಪಾಲ ನಾಯಕ,ಯೂತ್ ಕಾಂಗ್ರೆಸ್ ಜಿಲ್ಲಾಧ್ಯಕ್ಷ ರಾಜಾ ಕುಮಾರ ನಾಯಕ ಭಾಗವಹಿಸಿದ್ದರು.ಕಾರ್ಯಕ್ರಮದ ಆರಂಭದಲ್ಲಿ ಡಾ:ಬಿ.ಆರ್ ಅಂಬೇಡ್ಕರ್ ಪುತ್ಥಳಿಗೆ ಮಾಲಾರ್ಪಣೆ ಮಾಡಿ,ನಂತರ ಮೇಣದ ಬತ್ತಿಯನ್ನು ಬೆಳಗಿ ಎರಡು ನಿಮಿಷಗಳ ಮೌನಾಚರಣೆ ಮಾಡಿ ಅಂಬೇಡ್ಕರರಿಗೆ ಗೌರವ ನಮನ ಸಲ್ಲಿಸಿದರು.
ನಂತರ ಅನೇಕ ಮುಖಂಡರು ಮಾತನಾಡಿ,ಡಾ:ಬಾಬಾ ಸಾಹೇಬ್ ಅಂಬೇಡ್ಕರ್ ಅವರು ಈ ಜಗತ್ತು ಕಂಡ ಮಹಾನ್ ಜ್ಞಾನಿಯಾಗಿದ್ದಾರೆ.ಅವರು ಬರೆದುಕೊಟ್ಟ ಸಂವಿಧಾನ ಜಗತ್ತಿಗೆ ಮಾದರಿಯಾಗಿದೆ.ಅಲ್ಲದೆ ಈ ದೇಶದಲ್ಲಿನ ದೀನ ದಲಿತ ಶೋಷಿತರಿಗೆ ಅಲ್ಪಸಂಖ್ಯಾತ ಹಿಂದುಳಿದವರಿಗೆ ಅನೇಕ ಏಳಿಗೆಗೆ ಕಾನೂನುಗಳನ್ನು ರೂಪಿಸಿಕೊಟ್ಟ ಪುಣ್ಯ ಪುರುಷರಾಗಿದ್ದಾರೆ.ಅವರು ಬದುಕಿನುದ್ದಕ್ಕೂ ನೋವು ಪಟ್ಟು ನಮ್ಮನ್ನು ಉದ್ಧರಿಸಿದರು.
ಅವರ ಜೀವಿತದ ಕೊನೆಯ ದಿನಗಳ ವರೆಗೂ ಬರವಣಿಗೆಯಲ್ಲಿ ಕಳೆದವರು,ಅಂತಹ ಮಹಾನ್ ಪುರುಷನು 1956 ಡಿಸೆಂಬರ್ 6 ರಂದು ಕೊನೆಯುಸಿರೆಳೆದಾಗ ಅವರ ಪಾರ್ಥಿವ ಶರೀರವನ್ನು ಮುಂಬಯಿಗೆ ತರಲು ಅಂದಿನ ಸರಕಾರ ಒಂದು ವಿಮಾನವನ್ನು ಕಲ್ಪಿಸಿರಲಿಲ್ಲ, ಅಂಬೇಡ್ಕರರ ಆಪ್ತ ಸಹಾಯಕನಾಗಿದ್ದ ನಾನಕ್ ಚಂದ್ ರತ್ತು ಅವರು ತಮ್ಮ ಕಾರನ್ನು ಮಾರಾಟ ಮಾಡಿ ಪಾರ್ಥಿವ ಶರೀರ ತಂದ ವಿಮಾನದ ಬಾಡಿಗೆಯನ್ನು ನೀಡಿದ್ದಾರೆ ಎಂದು ನೋವಿನಿಂದ ನುಡಿದರು.ಅಲ್ಲದೆ ಇಂದು ನಾವೆಲ್ಲರು ನೆಮ್ಮದಿಯಿಂದ ಜೀವಿಸುತ್ತಿದ್ದೇವೆ ಎಂದರೆ ಅದು ಅಂಬೇಡ್ಕರರು ನಮಗೆ ನೀಡಿದ ಭಿಕ್ಷೆ ಎಂದು ಮಾರ್ಮಿಕವಾಗಿ ನುಡಿದರು.
ಈ ಸಂದರ್ಭದಲ್ಲಿ ವಿವಿಧ ಸಂಘಟನೆಗಳ ಮುಖಂಡರಾದ ನಗರಸಭೆ ಸದಸ್ಯ ಶಿವಕುಮಾರ ಕಟ್ಟಿಮನಿ,ಮಹ್ಮದ್ ಗೌಸ್ ಕಿಣ್ಣಿ, ವೆಂಕಟೇಶ ಸುರಪುರ,ರಾಹುಲ್ ಹುಲಿಮನಿ,ರಾಜು ಕಟ್ಟಿಮನಿ,ವೈಜನಾಥ ಹೊಸ್ಮನಿ,ಎಮ್.ಪಟೇಲ್,ದಾವೂದ್ ಇಬ್ರಾಹಿಂ ಪಠಾಣ್,ಖಾಜಾ ಅಜ್ಮೀರ್ ಸೇರಿದಂತೆ ಅನೇಕರಿದ್ದರು.