ಮುಂಗಾರು ಬಿತ್ತನೆಗೆ ಸಬ್ಸಿಡಿ ಬೀಜ ಗೊಬ್ಬರ ವಿತರಿಸಿ

ಸುರಪುರ:ಇನ್ನೆನು ಕೆಲವೇ ದಿನಗಳಲ್ಲಿ ಮುಂಗಾರು ಬಿತ್ತನೆ ಆರಂಭಗೊಳ್ಳಲಿದ್ದು ಸರಕಾರ ಕೂಡಲೇ ಎಲ್ಲಾ ರೈತ ಸಂಪರ್ಕ ಕೇಂದ್ರಗಳಲ್ಲಿ ಸಬ್ಸಿಡಿ ದರದಲ್ಲಿ ಬೀಜ ಗೊಬ್ಬರಗಳ ವಿತರಣೆಯನ್ನು ಆರಂಭಿಸಬೇಕು ಎಂದು ಕರ್ನಾಟಕ ರಾಜ್ಯ ರೈತ ಸಂಘದ ತಾಲೂಕು ಅಧ್ಯಕ್ಷ ಹಣಮಂತರಾಯ ಮಡಿವಾಳ ಒತ್ತಾಯಿಸಿದ್ದಾರೆ.

ಈ ಕುರಿತು ಹೇಳಿಕೆಯನ್ನು ನೀಡಿರುವ ಅವರು,ಈಗಾಗಲೇ ರೈತರು ಮುಂಗಾರು ಹಂಗಾಮಿಗಾಗಿ ಭೂಮಿಯನ್ನು ಹದಗೊಳಿಸಿಕೊಂಡು ಮಳೆಗಾಗಿ ಕಾಯುತ್ತಿದ್ದಾರೆ,ಜೂನ್ 7 ರಿಂದ ಮಳೆಗಾಲ ಆರಂಭಗೊಳ್ಳುವ ಸಾಧ್ಯತೆಯೂ ಇದೆ,ಆದರೆ ಸರಕಾರ ಇದುವರೆಗೂ ರೈತ ಸಂಪರ್ಕ ಕೇಂದ್ರಗಳಲ್ಲಿ ಸಬ್ಸಿಡಿ ದರದಲ್ಲಿ ರೈತರಿಗೆ ವಿತರಿಸಲು ಯಾವುದೇ ಬೀಜ ಗೊಬ್ಬರಗಳ ದಾಸ್ತಾನು ಮಾಡಿಲ್ಲ,ಹಿಂದಿನ ಸರಕಾರ ರೈತರಿಗೆ ನೀಡಬೇಕಿದ್ದ ಅನೇಕ ಸೌಲಭ್ಯಗಳನ್ನು ನಿಲ್ಲಿಸಿ ರೈತರಿಗೆ ತೊಂದರೆ ಮಾಡಿದೆ ಆದರೆ ಈಗ ಹೊಸ ಸರಕಾರ ಬಂದಿದ್ದು ಈ ಸರಕಾರದ ಬಗ್ಗೆ ರೈತರಿಗೆ ತುಂಬಾ ನಿರೀಕ್ಷೆ ಇದೆ ಅದನ್ನು ಹುಸಿಗೊಳಿಸದಂತೆ ರೈತರಿಗೆ ಬೇಕಾದ ಸೌಲಭ್ಯಗಳನ್ನು ಕಲ್ಪಿಸಬೇಕು ಎಂದು ಆಗ್ರಹಿಸಿದರು.

ತಾಲೂಕಿನ ಕೊನೆ ಭಾಗದ ರೈತರಿಗೆ ಸರಿಯಾಗಿ ಕಾಲುವೆಗಳ ನೀರು ತಲಪುವುದಿಲ್ಲ,ಆದ್ದರಿಂದ ಮಳೆಗಳನ್ನೆ ಹೆಚ್ಚು ಅವಲಂಭಿಸುವ ಸ್ಥಿತಿ ಇದೆ,ಆದ್ದರಿಂದ ಆದಷ್ಟು ಬೇಗನೆ ಸಬ್ಸಿಡಿ ಬೀಜ ಗೊಬ್ಬರ ವಿತರಿಸಿದರೆ ಮಳೆ ಆರಂಭವಾದ ಕೂಡಲೇ ರೈತರಿಗೆ ಬಿತ್ತಣಿಕೆಗೆ ಅನುಕೂಲವಾಗಲಿದೆ ಎಂದು ಸರಕಾರಕ್ಕೆ ಮನವಿ ಮಾಡಿಕೊಂಡರು.ಈ ಸಂದರ್ಭದಲ್ಲಿ ಮುಖಂಡ ಸಾಹೇಬಗೌಡ ಪೊಲೀಸ್ ಪಾಟೀಲ್ ಸೇರಿದಂತೆ ಇತರರಿದ್ದರು.