ಜನಸ್ನೇಹಿ ಪೊಲೀಸ್ ವಾತಾವರಣಕ್ಕೆ ಸಾರ್ವಜನಿಕರ ಸಹಕಾರ ಅಗತ್ಯ; ಪಿಎಸ್‍ಐ ಸುರೇಶಕುಮಾರ ಚವ್ಹಾಣ

ಕಲಬುರಗಿ: ಸಾರ್ವಜನಿಕ ಆಸ್ತಿ-ಪಾಸ್ತಿ ರಕ್ಷಣೆ, ಸಮಾಜದಲ್ಲಿ ಶಾಂತಿ ಕಾಪಾಡುವುದು, ನಾಗರಿಕ ಸುರಕ್ಷತೆ, ಅಪರಾಧಗಳನ್ನು ತಡೆಗಟ್ಟುವುದು, ಸೌಹಾರ್ಧತೆಯ ವಾತಾವರಣ ನಿರ್ಮಾಣಕ್ಕೆ ಪೊಲೀಸ್ ಇಲಾಖೆ ಹಗಲು-ರಾತ್ರಿಯೆನ್ನದೇ ಶ್ರಮಿಸುತ್ತದೆ. ಅಪರಾದಗಳನ್ನು ಮಟ್ಟಹಾಕಿ, ಕಾನೂನಿನ ರಕ್ಷಣೆ ಮಾಡುವಲ್ಲಿ, ಜನಸ್ನೇಹಿ ಪೊಲೀಸ್ ವಾತಾವರಣ ನಿರ್ಮಿಸಲು ಸಾರ್ವಜನಿಕರು ಪೊಲೀಸ್ ಇಲಾಖೆಗೆ ಸಹಕಾರ ನೀಡಬೇಕು ಎಂದು ಪಿಎಸ್‍ಐ ಸುರೇಶಕುಮಾರ ಚವ್ಹಾಣ ಹೇಳಿದರು.

ಜೇವರ್ಗಿ ಪಟ್ಟಣದ ಬಸ್ ಸ್ಟಾಂಡ್ ಸಮೀಪವಿರುವ ಇಲ್ಲಿನ ಪೊಲೀಸ್ ಠಾಣೆಯಲ್ಲಿ ಗುರುವಾರ ಜರುಗಿದ ‘ಜನಸ್ನೇಹಿ ಪೊಲೀಸ್ ಅಭಿಯಾನ ಕಾರ್ಯಕ್ರಮ’ದಲ್ಲಿ ಭಾಗವಹಿಸಿದ್ದ ಸರ್ಕಾರಿ ಪದವಿ ಪೂರ್ವ ಕಾಲೇಜಿನ ವಿದ್ಯಾರ್ಥಿಗಳನ್ನು ಉದ್ದೇಶಿಸಿ ಮಾತನಾಡಿದರು.

ಪೊಲೀಸ್ ಠಾಣೆ, ಸಿಬ್ಬಂದಿಯ ಬಗ್ಗೆ ಭಯ ಬೇಡ, ಗೌರವ ನೀಡಿ. ಅವರನ್ನು ಮಾನವೀಯತೆಯಿಂದ ಕಾಣಿ. ಅಪರಾಧ ಕಾರ್ಯಗಳನ್ನು ತಡೆಗಟ್ಟುವಲ್ಲಿ ಪೊಲೀಸ್‍ರೊಂದಿಗೆ ಕೈಜೋಡಿಸಿ. ವಿದ್ಯಾರ್ಥಿ ದೆಸೆಯಿಂದಲೇ ಕಾಯ್ದೆ-ಕಾನೂನುಗಳನ್ನು ತಿಳಿದುಕೊಂಡು ಅನುಸರಿಸಿ. ಪೊಲೀಸ್‍ರು ದಂಡ ವಿಧಿಸುವುದು ಸಾರ್ವಜನಿಕರ ಶೋಷಣೆಗಾಗಿ ಅಲ್ಲ. ಬದಲಿಗೆ ಅಪರಾಧ ಪುನರಾವರ್ತನೆಯಾಗಬಾರದು ಎಂಬ ಉದ್ದೇಶದಿಂದ ಎಂಬುದನ್ನು ತಿಳಿಯಬೇಕು. ರಸ್ತೆ ನಿಯಮಗಳು, ಸಾಮಾನ್ಯ ಕಾನೂನಿಗೆ ಸಂಬಂಧಿಸಿದಂತೆ ಅನೇಕ ವಿಷಯಗಳನ್ನು ವಿದ್ಯಾರ್ಥಿಗಳಿಗೆ ಮನಮುಟ್ಟುವಂತೆ ತಿಳಿಸಿದರು.

ಮಹಿಳಾ ಪೊಲೀಸ್ ಪೇದೆ ಕಾಶಿಂಬಿ ಅವರು ಪೋಕ್ಸೊ ಕಾಯ್ದೆ, ಮಹಿಳಾ ಕಾನೂನುಗಳ ಬಗ್ಗೆ ವಿವರಿಸಿದರು. ಕಾರ್ಯಕ್ರಮದಲ್ಲಿ ಕಾಲೇಜಿನ ಉಪನ್ಯಾಸಕ ಹಾಗೂ ಎನ್.ಎಸ್.ಎಸ್ ಅಧಿಕಾರಿ ಎಚ್.ಬಿ.ಪಾಟೀಲ, ಉಪನ್ಯಾಸಕ ಬಸಲಿಂಗಪ್ಪ ನಾಡಗೌಡ್, ಪೊಲೀಸ್ ಠಾಣೆಯ ಅಪರಾಧ ವಿಭಾಗದ ಪಿಎಸ್‍ಐ ಸಿದ್ರಾಮಪ್ಪ ನಿಂಬರ್ಗಾ, ಎಎಸ್‍ಐ ಜಗದೇವಿ, ಮುಖ್ಯ ಪೇದೆ ಮೌಲಪ್ಪ, ಬರಹಗಾರರಾದ ಲಾಲಪ್ಪ, ಮಲ್ಲಿಕಾರ್ಜುನ, ಉಪಸ್ಥಿತರಿದ್ದರು.