ಒಕ್ಕಲಿಗ ಮುದ್ದಣ್ಣ ಪ್ರಶಸ್ತಿಗೆ ಚನ್ನಬಸವಣ್ಣ ಬಳತೆ ಆಯ್ಕೆ; ನ.26 ರಂದು ಪ್ರದಾನ

ಭಾಲ್ಕಿ; ಪಟ್ಟಣದ ಚನ್ನಬಸವಣ್ಣ ಬಳತೆ ಅವರನ್ನು ವಿಶ್ವಧರ್ಮ ಟ್ರಸ್ಟ್ ಅನುಭವ ಮಂಟಪ ಬಸವಕಲ್ಯಾಣದ ವತಿಯಿಂದ ಕೊಡಮಾಡುವ 2023ನೆಯ ಸಾಲಿನ ಶರಣ ಒಕ್ಕಲಿಗ ಮುದ್ದಣ್ಣ ಸಾವಯವ ಕೃಷಿ ಪ್ರಶ್ತಿಗೆ ಆಯ್ಕೆ ಮಾಡಲಾಗಿದೆ.

ಶರಣೆ ಪುಷ್ಪಾವತಿ ಶರಣ ಕಾಶಪ್ಪ ಬಳತೆ ಇವರ ಉದರದಲ್ಲಿ ಶರಣ ಚನ್ನಬಸವಣ್ಣ ಜನಿಸಿದ್ದಾರೆ. ಚಿಕ್ಕಂದಿನಿಂದಲೇ ಧಾರ್ಮಿಕ ವಾತಾವರಣದಲ್ಲಿ ಬೆಳೆದ ಇವರು ಉನ್ನತ ಶಿಕ್ಷಣ ಪಡೆದು 12 ವರ್ಷ ಸರಕಾರಿ ಇಂಜನೀಯರ್ ಹುದ್ದೆ ಪ್ರಾಮಾಣಿಕವಾಗಿ ನಿಭಾಯಿಸಿ ಆ ಹುದ್ದೆಗೆ 2018 ರಲ್ಲಿ ರಾಜಿನಾಮೆ ನೀಡಿ ಸ್ವತಃ ಗುತ್ತಿಗೆದಾರರಾಗಿ ಪ್ರಾರಂಭಿಸಿ ಸಾವಿರಾರು ಕೈಗಳಿಗೆ ಕಾಯಕ ನೀಡಿದವರು.

ಭಾಲ್ಕಿಯ ಹಿರೇಮಠ ಸಂಸ್ಥಾನದ ಪೂಜ್ಯರು ಹಾಗೂ ವಿಜಯಪುರದ ಪರಮಪೂಜ್ಯ ಜ್ಞಾನಯೋಗಿ ಸಿದ್ಧೇಶ್ವರ ಮಹಾಸ್ವಾಮಿಗಳವರ ಪ್ರಭಾವದಿಂದ ಆಧ್ಯಾತ್ಮಿಕ ಕುಟುಂಬವಾಗಿ ಬೆಳೆಸಿಕೊಂಡು ಬರುತ್ತಿದ್ದಾರೆ. ಅವರು ಸಮಯ ಪರಿಪಾಲಕರು, ಕಾಯಕಯೋಗಿಗಳು, ಹೃದಯವಂತರು, ಸದಾ ಹಸನ್ಮುಖಿಗಳು. ಮಾಡಿದೆನೆಂಬುದು ಮನದಲ್ಲಿ ಹೊಳೆದರೆ ಏಡಿಸಿ ಕಾಡಿಸಿತ್ತು ಶಿವನ ಡಂಗೂರ ಎಂಬ ಶರಣರ ವಾಣಿಯಂತೆ ದಾಸೋಹಂಭಾವ ಬೆಳೆಸಿಕೊಂಡಿದ್ದಾರೆ. ಅವರ ಹಣದ ಶ್ರೀಮಂತಿಗೆಕೆಗಿಂತಲೂ ಭಕ್ತಿಶ್ರೀಮಂತರು ಎಂದು ಹೇಳಲು ಅತ್ಯಂತ ಸಂತೋಷವಾಗುತ್ತದೆ.

ತಮ್ಮ 70 ಎಕರೆ ಭೂಮಿಯಲ್ಲಿ ಯಾವುದೇ ರಾಸಾಯನಿಕ ಗೊಬ್ಬರ ಬಳಸದೆ, ಹಣ್ಣಿನ ಗಿಡಗಳು, ತರಕಾರಿ, ಕಬ್ಬು, ಹೆಸರು, ಉದ್ದು, ಸೋಯಾ, ಕಡಲೆ, ತೊಗರಿ ಹಲವಾರು ಬೆಳೆಗಳು ಬೆಳೆಸಿದ್ದಾರೆ. ಮಣ್ಣಿನ ಫಲವತ್ತತೆ ಹೆಚ್ಚಿಸುವ ದೃಷ್ಟಿಯಿಂದ ದೇಶದ ಜನರಿಗೆ ಆರೋಗ್ಯಯುಕ್ತ ಆಹಾರ ಬೆಳೆಸುತ್ತಿದ್ದಾರೆ. ಇವರು ಮಾಡಿರುವ ಸಾಧನೆ ಅಚ್ಚರಿ ಮೂಡಿಸುವಂತಹದ್ದು. ಇವರು ಸಾವಯವ ಕೃಷಿಯಲ್ಲಿ ವಿಶೇಷ ಸಾಧನೆ ಮಾಡಿರುವ ಪ್ರಯುಕ್ತ ಪ್ರಸಕ್ತ ಸಾಲಿನ ಒಕ್ಕಲಿಗ ಮುದ್ದಣ್ಣ ಸಾವಯವ ಕೃಷಿ ಪ್ರಶಸ್ತಿಗೆ ಆಯ್ಕೆ ಮಾಡಲಾಗಿದ್ದು ನ.26 ರಂದು ಬಸವಕಲ್ಯಾಣದಲ್ಲಿ ನಡೆಯುವ 44ನೆಯ ಶರಣ ಕಮ್ಮಟ ಮತ್ತು ಅನುಭವ ಮಂಟಪ ಉತ್ಸವ ಸಮಾರೋಪ ಸಮಾರಂಭದಲ್ಲಿ ಈ ಪ್ರಶಸ್ತಿ ಪ್ರದಾನ ಮಾಡಲಾಗುತ್ತದೆ ಎಂದು ವಿಶ್ವಬಸವ ಧರ್ಮ ಟ್ರಸ್ಟ್ ಕಾರ್ಯದರ್ಶಿ ಡಾ.ಎಸ್.ಬಿ.ದುರ್ಗೆ ಅವರು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.