ನರ್ಸರಿ ರೈತ ನಾಗರಾಜ ಶೇಗಜಿಗೆ ಒಲಿದ ಮಿಲೆನೀಯರ್ ಪ್ರಶಸ್ತಿ

ಕಲಬುರಗಿ; ಜಿಲ್ಲೆಯ ಆಳಂದ ತಾಲೂಕಿನ ಧಂಗಾಪೂರ್ ಗ್ರಾಮದ ರೈತ ನಾಗರಾಜ ಶೇಗಜಿ ರವರಿಗೆ 2023ನೇ ಸಾಲಿನ ಮಹೇಂದ್ರ ಟ್ರ್ಯಾಕ್ಟರ್ ಪ್ರಾಯೋಜಕತ್ವದ “ಮಿಲೆನೀಯರ್ ಆಫ್ ಇಂಡಿಯಾ ಅವಾರ್ಡ”ಪ್ರಶಸ್ತಿ ಲಭಿಸಿದೆ.

ಐಸಿಎಆರ್-ಕೃಷಿ ವಿಜ್ಞಾನ ಕೇಂದ್ರ, ಕಲಬುರಗಿ ವಿಜ್ಞಾನಿಗಳ ಮಾರ್ಗದರ್ಶನದಲ್ಲಿ ಕಳೆದ ಸಾಲಿನ ನರ್ಸರಿ ಮತ್ತು ಸುಧಾರಿತ ಬೇಸಾಯ ಕ್ರಮಗಳಿಂದ ಯಶಸ್ವಿಯಾಗಿದ್ದಕ್ಕಾಗಿ ಈ ಪ್ರಶಸ್ತಿ ನೀಡಲಾಗಿದೆ. ಇತ್ತೀಚಿಗೆ ದೆಹಲ್ಲಿಯಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಕೇಂದ್ರ ಸಾರಿಗೆ ಸಚಿವರಾದ ನೀತಿನ್ ಗಡ್ಕರಿರವರು ಪ್ರಶಸ್ತಿ ನೀಡಿ ಶೇಗಜಿಯವರಿಗೆ ಗೌರವಿಸಿದರು.

ನಾಗರಾಜ ಶೇಗಜಿರವರು ವಿಜಯಲಕ್ಷ್ಮಿ ತೋಟಗಾರಿಕೆ ನರ್ಸರಿ ಮೂಲಕ ವಿವಿಧ ತಳಿಗಳ ಸಸಿಗಳನ್ನು ಕಲಬುರಗಿ ಜಿಲ್ಲೆಯ ಬಹುತೇಕ ರೈತರ ಜಮೀನುಗಳಿಗೆ ತಲುಪಿಸಿದ ಹೆಗ್ಗಳಿಕೆ ಜೊತೆಗೆ ನೆರೆ ರಾಜ್ಯಗಳ ಮೇಲಿನ ಅವಲಂಬನೆಯನ್ನು ತಗ್ಗಸಿ ಸಾಗಣಿಕೆ ವೆಚ್ಚದ ಉಳಿತಾಯ ಹಾಗೂ ಗುಣಮಟ್ಟದ ಸಸಿಗಳನ್ನು ಪೂರೈಸುವುದರ ಮೂಲಕ ಈ ಭಾಗದ ರೈತರ ಕಣ್ಮಣಿಯಾಗಿದ್ದಾರೆ.

ಅಲ್ಲದೆ ಕಬ್ಬಿನಲ್ಲಿ ಕಟಾವು ಯಂತ್ರಗಳ ಬಳಕೆ ಮತ್ತುಪ್ರಚಾರ, ಪ್ರೆಸ್‍ಮಡ್ ಕಾಂಪೋಷ್ಟ್ ತಯಾರಿಕೆ ಮತ್ತು ಮಾರಾಟ, ಆಧುನಿಕ ಪದ್ದತಿಯಲ್ಲಿ ಪಪ್ಪಾಯ ಮತ್ತು ಕಲ್ಲಂಗಡಿ ಬೆಳೆಗಳ ನಿರ್ವಹಣೆ ಮತ್ತು ಜಮೀನಿನ ಫಲವತ್ತತೆ ವೃದ್ದಿಸಲು ಎರೆಗೊಬ್ಬರ ಬಳಕೆ ಮುಂತಾದ ಕ್ರಮಗಳಿಂದ ಈ ಪ್ರಶಸ್ತಿಗೆ ಭಾಜನರಾಗಿದ್ದಾರೆ.