ವೀರ ಶೂರ ಚಾರಿತ್ರ್ಯವಂತ ಮಹಾರಾಜ ಶಿವಾಜಿ

ಶಹಾಬಾದ: ಜಗತ್ತಿನಲ್ಲಿ ಹಲವಾರು ವೀರ ಶೂರ ಮಹಾರಾಜರಲ್ಲಿ ಜಾಣತನ ಮತ್ತು ಚಾರಿತ್ರ್ಯವಂತ ಯುಗಪುರುಷರೇನಾದರೂ ಇದ್ದರೆ ಅವರೇ ಛತ್ರಪತಿ ಶಿವಾಜಿ ಮಹಾರಾಜರು ಎಂದು ಬಿಜೆಪಿ ಅಧ್ಯಕ್ಷ ಅಣವೀರ ಇಂಗಿನಶೆಟ್ಟಿ ಹೇಳಿದರು.

ಅವರು ಸೋಮವಾರ ನಗರದ ಬಿಜೆಪಿ ಕಚೇರಿಯಲ್ಲಿ ಬಿಜೆಪಿಯಿಂದ ಆಯೋಜಿಸಲಾದ ಛತ್ರಪತಿ ಶಿವಾಜಿ ಮಹಾರಾಜರ ಜಯಂತೋತ್ಸವ ಕಾರ್ಯಕ್ರಮದಲ್ಲಿ ಮುಖ್ಯ ಅತಿಥಿಗಳಾಗಿ ಮಾತನಾಡಿದರು.

ಯಾವುದೇ ಜಾತಿ,ಭಾಷೆಗಳ ಭೇದ ಭಾವ ಮಾಡದೇ ಜಾತಿ ರಹಿತ ಸಂಘಟನೆ ಕಟ್ಟಿದ್ದರು. ಅವರು ಮಹಿಳೆಯರಲ್ಲಿ ತಾಯಿಯ ಸ್ವರೂಪವನ್ನು ಕಾಣುತ್ತಿದ್ದರು. 17 ನೇ ಶತಮಾನದಲ್ಲಿ ದಕ್ಷಿಣ ಭಾರತದಲ್ಲಿ ಧರ್ಮ ಹಾಗೂ ರಾಜ್ಯ ವ್ಯವಸ್ಥೆ ಘಾಸಿಗೊಂಡಾಗ ತನ್ನ ಸ್ವ-ಸಾಮಥ್ರ್ಯದಿಂದ ಮೊಘಲರನ್ನು ಎದುರಿಸಿ, ಸಾಮ್ರಾಜ್ಯವನ್ನು ಕಟ್ಟಿ ಭಾರತೀಯರ ಕಣ್ಮಣಿಯಾದ ಛತ್ರಪತಿ ಶಿವಾಜಿಯ ದೇಶಭಕ್ತಿ ಅನುಪಮ ಹಾಗೂ ಅನುಕರಣಿಯವಾದುದು. ಅಲ್ಲದೇ ಭಾರತೀಯ ಕಲೆಗೆ ಅರ್ಥ ತಂದ ವ್ಯಕ್ತಿ ಅವರು.ಕಡಿಮೆ ಅವಧಿಯಲ್ಲಿ ಇಡೀ ದೇಶ ಸಂಚರಿಸಿ, ಸಾಮ್ರಾಜ್ಯ ಕಟ್ಟಿದ ಮಹಾನ್ ಪರಾಕ್ರಮಿಯಾಗಿದ್ದರು ಎಂದು ಹೇಳಿದರು.

ಬಿಜೆಪಿ ಹಿರಿಯ ಮುಖಂಡ ಚಂದ್ರಕಾಂತ ಗೊಬ್ಬೂರಕರ ಮಾತನಾಡಿ, ಮಾತನಾಡಿ, ಸಮಾಜದ ಶ್ರೇಷ್ಠತೆಗೆ ಶ್ರಮಿಸಿದ ಶಿವಾಜಿಯವರ ಆದರ್ಶಗಳನ್ನು ಎಲ್ಲರೂ ಪಾಲಿಸಬೇಕು. ಸಮಾಜಮುಖಿಯಾಗಿ ಕೆಲಸಗಳ ಮೂಲಕ ಯುವಕರಲ್ಲಿ ಇಂದಿಗೂ ಪ್ರೇರಕ ಶಕ್ತಿಯಾಗಿರುವ ಶಿವಾಜಿ ಅವರು ನಮ್ಮೆಲ್ಲರಿಗೂ ದಾರಿದೀಪವಾಗಿದ್ದಾರೆ ಎಂದು ಹೇಳಿದರು.

ಬಿಜೆಪಿ ಉಪಾಧ್ಯಕ್ಷರಾದ ಮಹಾದೇವ ಗೊಬ್ಬೂರಕರ, ಶ್ರೀಧರ ಜೋಷಿ, ಪ್ರ.ಕಾರ್ಯದರ್ಶಿಗಳಾದ ಸದಾನಂದ ಕುಂಬಾರ, ಪದ್ಮಾ ಕಟಕೆ, ಮರಾಠಾ ಸಮಾಜದ ನಗರ ಅಧ್ಯಕ್ಷ ಸುನೀಲ್ ಭಗತ್, ತಾಲೂಕಾಧ್ಯಕ್ಷ ಬಬ್ಲು ಮೋಹಿತೆ, ಮಂಡಲ ಪದಾಧಿಕಾರಿಗಳು, ಪ್ರಮುಖರು, ನಗರಸಭೆ ಸದಸ್ಯರು, ಮಹಾಶಕ್ತಿ ಕೇಂದ್ರದ ಮತ್ತು ಶಕ್ತಿ ಕೇಂದ್ರದ ಪ್ರಮುಖರು, ಮೊರ್ಚಾಗಳ, ಪ್ರಕೋಷ್ಟಗಳ, ಭೂತ್ ಪದಾಧಿಕಾರಿಗಳು ಕಾರ್ಯಕರ್ತರು, ಹಾಗೂ ಮರಾಠಾ ಸಮಾಜದ ಪ್ರಮುಖರು ಉಪಸ್ಥಿತರಿದ್ದರು. ಸಿದ್ರಾಮ ಕುಸಾಳೆ ನಿರೂಪಿಸಿ, ಸದಾನಂದ ಕುಂಬಾರ ವಂದಿಸಿದರು.