ಒಳಚರಂಡಿಯೊಳಗೆ ಬಿದ್ದ ಆಕಳು ರಕ್ಷಸಿದ ಅಗ್ನಿಶಾಮಕದಳ ಸಿಬ್ಬಂದಿ

ಕಲಬುರಗಿ: ನಗರದ ಪಿಎನ್‍ಟಿ ಕಾಲನಿಯ ಪ್ರದೇಶದಲ್ಲಿ ಬಾಯ್ದೆರೆದ ಒಳಚರಂಡಿಯಲ್ಲಿ ಬಿದ್ದು ಮೇಲೆ ಬರಲಾಗದೇ ಆಕಳೊಂದು ಒದ್ದಾಡುತ್ತಿರುವ ಅದನು ಗಮನಿಸಿದ ಪಿಎನ್‍ಟಿ ಕಾಲನಿಯ ನಿವಾಸಿ ಸುಮೀತ್ ನಾಗನಳ್ಳಿ ಅವರು ಗೃಹ ರಕ್ಷಕ ಮತ್ತು ಅಗ್ನಿಶಾಮಕದಳ ಅವರನ್ನು ಕರೆ ಮಾಡಿದ ತಕ್ಷಣ ಗೃಹ ರಕ್ಷಕ ಮತ್ತು ಅಗ್ನಿಶಾಮಕದಳದ ಸಿಬ್ಬಂದಿಗಳು ಸ್ಥಳಕ್ಕೆ ಧಾವಿಸಿ ಅತ್ಯಂತ ಕ್ಲಿಷ್ಟಕರ ಕಾರ್ಯಾಚರಣೆಯನ್ನು ಕೈಗೊಂಡು ಆಕಳವನ್ನು ಚರಂಡಿಯಿಂದ ಹೊರಗೆ ತೆಗೆಯುವಲ್ಲಿ ಯಶಸ್ವಿಯಾದರು.

ಬಾಯ್ದೆರದ ಚರಂಡಿಯಲ್ಲಿ ಜಾರಿ ಬಿದ್ದು ಆಕಳು ಹೊರಗೆ ಬರಲಾಗದೇ ಚರಂಡಿಯೊಳಗೆ ಒದ್ದಾಡುತ್ತಿತ್ತು. ಅಗ್ನಿಶಾಮಕದಳದ ಸಿಬ್ಬಂದಿಗಳು ವಾಹನದ ಸಮೇತವಾಗಿ ಸ್ಥಳಕ್ಕೆ ಧಾವಿಸಿದರು. ಚರಂಡಿಯೊಳಗೆ ಇಳಿದು ಒಳಗೆ ಸಿಲುಕಿದ್ದ ಆಕಳಿಗೆ ಬೆಲ್ಡ್ ಕಟ್ಟಿ, ಅದನ್ನು ಸುರಕ್ಷಿತವಾಗಿ ಮೇಲೆ ಎತ್ತಿದರು. ಹಲವಾರು ಸಂದರ್ಭದಲ್ಲಿ ಮೇಲಕ್ಕೆತ್ತಲಾಗದೇ ಸಿಬ್ಬಂದಿಗಳು ಸಾಕಷ್ಟು ಪ್ರಯತ್ನಪಟ್ಟು ಸುಸ್ತಾದರು. ಆದಾಗ್ಯೂ, ಪಟ್ಟು ಬಿಡದೇ ಆಕಳವನ್ನು ಮೇಲೆ ಎತ್ತುವಲ್ಲಿ ಯಶಸ್ವಿಯಾದರು. ಆಕಳನ್ನು ರಕ್ಷಿಸಿದ ಕುರಿತು ಸಾರ್ವಜನಿಕರಲ್ಲಿ ಮೆಚ್ಚುಗೆ ವ್ಯಕ್ತವಾಯಿತು.

ಮೇಲಕ್ಕೆತ್ತಿದ ಆಕಳು ಅಲ್ಲಿಂದ ಓಡಿ ಹೋಯಿತು. ಆಗ ಸಿಬ್ಬಂದಿಗಳು ಹಾಗೂ ಅಲ್ಲಿ ನೆರೆದ ಸಾರ್ವಜನಿಕರು ಹರ್ಷೋದ್ವಾರದ ನಗೆಯ ಕೇಕೆ ಹಾಕಿದರು. ಕಾರ್ಯಾಚರಣೆಯಲ್ಲಿ ಹಿರಿಯ ಅಧಿಕಾರಿ ಅಂಕೋಶ್, ಸತೀಶ್, ಶಶಿಧರ್ ಬಡಿಗೇರ, ಪ್ರದೀಪ್ ಕುಮಾರ, ಸುನೀಲಕುಮಾರ, ಬಸವರಾಜ್, ಚಂದ್ರಶೇಖರ್, ರಾವತ್, ಮಂಜುನಾಥ್, ಬಡಾವಣೆಯ ಮುಖಂಡರು ಸೇರಿ ಮುಂತಾದವರು ಪಾಲ್ಗೊಂಡಿದ್ದರು.