ಕಲಬುರಗಿ: ಸುರಪುರ ತಾಲೂಕಿನ ನಿವಾಸಿಗಳ ಕ್ಷೇಮಾಭಿವೃದ್ಧಿ ಸಂಘದಿಂದ ಶಾಸಕ ಆರ್.ವಿ.ಎನ್ ಗೆ ಶ್ರದ್ಧಾಂಜಲಿ

ಕಲಬುರಗಿ: ಇತ್ತಿಚೆಗೆ ನಿಧನರಾದ ಸುರಪುರ ಶಾಸಕ, ರಾಜ್ಯ ಉಗ್ರಾಣ ನಿಗಮದ ಅಧ್ಯಕ್ಷ ರಾಜಾ ವೆಂಕಟಪ್ಪ ನಾಯಕ ಅವರಿಗೆ ಇಲ್ಲಿನ ಸುರಪುರ ತಾಲೂಕಿನ ನಿವಾಸಿಗಳ ಕ್ಷೇಮಾಭಿವೃದ್ಧಿ ಸಂಘ ಹಾಗೂ ಸಗರನಾಡು ಪತ್ತಿನ ಸಹಕಾರ ಸಂಘದ ಸಂಯುಕ್ತ ಆಶ್ರಯದಲ್ಲಿ ಭಾನುವಾರ ಶ್ರದ್ಧಾಂಜಲಿ ಸಲ್ಲಿಸಲಾಯಿತು.

ಪತ್ತಿನ ಸಹಕಾರ ಸಂಘದ ಕಚೇರಿಯಲ್ಲಿ ನಡೆದ ಸಭೆಯಲ್ಲಿ ಸುರಪುರದ ನಿವಾಸಿಗಳು ಭಾಗವಹಿಸಿ, ಮೃತರ ಭಾವಚಿತ್ರಕ್ಕೆ ಪೂಜೆ ಸಲ್ಲಿಸುವ ಮೂಲಕ ಎರಡು ನಿಮಿಷ ಮೌನಾಚರಿಸಿದರು.

ಈ ಸಂದರ್ಭದಲ್ಲಿ ಮಾತನಾಡಿದ ಸಂಘದ ಮುಖಂಡರು, ಶಾಸಕ ರಾಜಾ ವೆಂಕಟಪ್ಪ ನಾಯಕ ಅವರ ನಿಧನದಿಂದ ತೀವ್ರ ಆಘಾತ ಹಾಗೂ ದುಃಖವುಂಟಾಗಿದೆ. ಸದಾಕಾಲವೂ ನಗುನಗುತ್ತಲೇ ಎಲ್ಲರೊಂದಿಗೆ ಬೆರೆತು ಮಾತನಾಡುತ್ತಿದ್ದರು. ಕ್ಷೇತ್ರದ ಅಭಿವೃದ್ಧಿಯ ಬಗ್ಗೆ ಚಿಂತಿಸುತ್ತಿದ್ದರು. ಬಡವರ ಬಗ್ಗೆಯೂ ಅಪಾರ ಕಾಳಜಿಯನ್ನು ಹೊಂದಿದ್ದರು ಎಂದರು.

ಕಲಬುರಗಿಯಲ್ಲಿ ನಡೆದ ಸುರಪುರ ನಿವಾಸಿಗಳ ಕ್ಷೇಮಾಭಿವೃದ್ಧಿ ಸಂಘದ ಪ್ರತಿಭಾ ಪುರಸ್ಕಾರ, ಸಾಧಕರಿಗೆ ಸನ್ಮಾನ ಸಮಾಂಭದಲ್ಲಿ ಭಾಗವಹಿಸಿ ದೂರದಲ್ಲಿರುವ ತಾಲೂಕಿನ ಜನತೆ ತಮಗೆ ತೋರಿದ ಪ್ರೀತಿ-ವಿಶ್ವಾಸಕ್ಕೆ ಬಹಳಷ್ಟು ಹರ್ಷ ವ್ಯಕ್ತಪಡಿಸಿದ್ದರು ಎಂದರು.

ರಾಜ್ಯ ಉಗ್ರಾಣ ನಿಗಮದ ಅಧ್ಯಕ್ಷರಾದ ಸಂದರ್ಭದಲ್ಲಿ ಸುರಪುರ ಕ್ಷೇಮಾಭಿವೃದ್ಧಿ ಸಂಘದ ಸದಸ್ಯರು ಸುರಪುರಕ್ಕೆ ಹೋಗಿ ಅವರಿಗೆ ಸನ್ಮಾನಿಸಿ, ಅಭಿನಂದಿಸಿ, ಹರ್ಷ ವ್ಯಕ್ತಪಡಿಸಲಾಗಿತ್ತು ಎಂದು ನೆನಪಿಸಿಕೊಂಡರು.

ಈ ಸಂದರ್ಭದಲ್ಲಿ ನಿವಾಸಿಗಳ ಸಂಘದ ಅಧ್ಯಕ್ಷ ಪ್ರೊ.ಬಿ.ಪಿ.ಹೂಗಾರ, ಸಹಕಾರ ಸಂಘದ ಅಧ್ಯಕ್ಷ ವೆಂಕಟೇಶ ನಿರಡಗಿ, ಎಸ್.ಡಿ. ಕಟ್ಟಿಮನಿ, ಪ್ರೊ.ಬಸವರಾಜ ಭಾವಿ, ಚನ್ನಬಸವರಾಜ ನಿಷ್ಠಿ ದೇಶಮುಖ, ವೆಂಕಪ್ಪ ನಿರಡಗಿ, ವಿ.ಡಿ.ಪಾಟೀಲ್, ನಾಗರಾಜ ಜಮದ್ರಖಾನಿ, ತೇಜಸಿಂಗ್ ಹಜಾರೆ, ಚಂದ್ರಶೇಖರ ಕಕ್ಕೇರಾ, ನಾಗರಾಜ ಸುರಪುರ, ಈಶ್ವರ ಕಟ್ಟಿಮನಿ, ಡಾ.ರಾಘವೇಂದ್ರ ಗುಡುಗುಂಟಿ, ಗಂಗಾಧರ ಸುರಪುರ, ಕನಕಪ್ಪ ಬಿಲ್ಲವ, ಚಂದಪ್ಪ ಹೇಮನೂರು, ಪ್ರಾಣೇಶ, ಗಿರಿಧರ ರಫುಗಾರ್, ಪಿಡ್ಡಪ್ಪ ಜಾಲಗಾರ, ವೆಂಕಟೇಶ ಜಿ.ಕುಲಕರ್ಣಿ, ನಾಗಪ್ಪ, ಅರುಣಕುಮಾರ ಪುಲ್ಸೆ, ವೆಂಕಟೇಶ ಜಹಗರಿದಾರ್, ಡಾ.ರವೀಂದ್ರ ಗುಳಗಿ, ರವೀಂದ್ರ ದೋಶೆಟ್ಟಿ, ಗಿರೀಶ ಬಳಗಾನೂರು ಸೇರಿದಂತೆ ಮೊದಲಾದವರು ಪಾಲ್ಗೊಂಡಿದ್ದರು.