ಸುರಪುರ ಸುತ್ತಮುತ್ತಲ ಗ್ರಾಮಗಳ ಗುಡ್ಡದಲ್ಲಿ ಚಿರತೆ ಇರುವ ಅನುಮಾನ; ಸಾರ್ವಜನಿಕರಲ್ಲಿ ಆತಂಕ

ಸುರಪುರ: ತಾಲೂಕಿನ ದೇವರಗೋನಾಲ ಸಿದ್ದಾಪುರ ಹಾಗೂ ಸುರಪುರಕ್ಕೂ ಹೊಂದಿಕೊಂಡಿರುವ ಗುಡ್ಡದಲ್ಲಿ ಚಿರತೆ ಬಂದಿದೆ ಎನ್ನುವ ಅನುಮಾನ ವ್ಯಕ್ತವಾಗಿದ್ದು ಸಾರ್ವಜನಿಕರಲ್ಲಿ ದೊಡ್ಡಮಟ್ಟದ ಆತಂಕಕ್ಕೆ ಕಾರಣವಾಗಿದೆ.

ಎರಡು ದಿನಗಳ ಹಿಂದೆಯೇ ಸಿದ್ದಪುರ ಹೊರವಲಯದ ದೊರೆಯ ಮನೆ ಮುಂದೆ ಕಟ್ಟಲಾಗಿದ್ದ ನಾಯಿ ಒಂದಕ್ಕೆ ಕಚ್ಚಿದೆ ಎಂದು ಹೇಳಲಾಗಿತ್ತು ಆದರೆ ಗುರುವಾರ ರಾತ್ರಿ ದೇವರಗೋನಲ ಬಳಿಯ ಜಮೀನಿನಲ್ಲಿ ಇರುವ ಮನೆಯ ಮುಂದೆ ಕಟ್ಟಿ ಹಾಕಲಾಗಿದ್ದ ನಾಯಿಯನ್ನು ಚಿರತೆ ಗುಡ್ಡದಲ್ಲಿನ ತಿಮ್ಮಪ್ಪನ ಗವಿಯಲ್ಲಿ ತಿಂದು ಹಾಕಿದೆ.

ಇದನ್ನು ತಿಳಿದು ನಾಯಿಯ ಮಾಲೀಕರು ಅರಣ್ಯ ಇಲಾಖೆ ಅಧಿಕಾರಿಗಳಿಗೆ ಮಾಹಿತಿ ನೀಡಿದ್ದು ಅಧಿಕಾರಿಗಳು ಹಾಗೂ ಅನೇಕ ಮುಖಂಡರು ದೇವರಗೋನಾಲ ಬಳಿಯ ಗುಡ್ಡದಲ್ಲಿ ಚಿರತೆಗಾಗಿ ಹುಡುಕಾಟ ಆರಂಭಿಸಿದ್ದಾರೆ.

ಅರಣ್ಯ ಅಧಿಕಾರಿ ಬುರಾನುದ್ದಿನ್ ಶಹಾ ಮಾತನಾಡಿ ಎರಡು ದಿನದ ಹಿಂದೆ ಚಿರತೆ ಬಂದಿದೆ ಎಂದಾಗ ಸಿದ್ದಾಪುರದಲ್ಲಿ ಧ್ವನಿವರ್ಧಕದ ಮೂಲಕ ಸಾರ್ವಜನಿಕರಲ್ಲಿ ಜಾಗೃತಿ ಮೂಡಿಸಲಾಗಿತ್ತು, ಈಗ ಚಿರತೆ ಇರುವ ಬಗ್ಗೆ ಅನುಮಾನ ದಟ್ಟವಾಗಿದ್ದು ನಮ್ಮ ಮೇಲಾಧಿಕಾರಿಗಳಿಗೆ ಮಾಹಿತಿಯನ್ನು ನೀಡಿ ಅವರ ನಿರ್ದೇಶನದಂತೆ ಕ್ಯಾಮರಾಗಳನ್ನು ಅಳವಡಿಸಿ ಡ್ರೋನ್ ಮೂಲಕ ಪತ್ತೆಹಚ್ಚಲು ಕಾರ್ಯಾಚರಣೆ ಮಾಡುವುದಾಗಿ ತಿಳಿಸಿದ್ದಾರೆ.

ಸ್ಥಳದಲ್ಲಿದ್ದ ಮುಖಂಡರು ಮಾತನಾಡಿ ನಿರ್ಲಕ್ಷಿಸದೆ ಕೂಡಲೇ ಕಾರ್ಯಾಚರಣೆಯನ್ನು ನಡೆಸಿ ಚಿರತೆ ಹಿಡಿಯುವ ಕೆಲಸ ಆಗಬೇಕು ಯಾಕೆಂದರೆ ಅಡವಿಯಲ್ಲಿ ಜನರು ಕೆಲಸ ಕಾರ್ಯಗಳಿಗೆ ಹೋಗುತ್ತಾರೆ. ಕುರಿ ಮೇಯಿಸಲು ದನಕರುಗಳ ಕಾಯಲು ಹೋಗುತ್ತಾರೆ ಅಂತವರ ಮೇಲೆ ಚಿರತೆ ದಾಳಿ ಮಾಡುವ ಸಾಧ್ಯತೆ ಇದೆ ಎಂದು ಅಧಿಕಾರಿಗಳಿಗೆ ಒತ್ತಾಯ ಮಾಡಿದ್ದಾರೆ.

ಈ ಸಂದರ್ಭದಲ್ಲಿ ಅರಣ್ಯ ಇಲಾಖೆಯ ಶರಣಪ್ಪ ಕುಂಬಾರ್, ಸೇರಿದಂತೆ ಮುಖಂಡರಾದ ವೆಂಕಟೇಶ ಬೇಟೆಗಾರ ರಮೇಶ ದೊರೆ ಗೋಪಾಲ ದೊರೆ ವಿನೋದ ನಾಯಕ ವಿಜಯ ನಾಯಕ ಶಂಕರಗೌಡ ಭೀಮಣ್ಣ ನಬಿಲಾಲ ಸೇರಿದಂತೆ ಅನೇಕರು ಇದ್ದರು.