ಸಂಸದ ಜಾಧವ್ ಲೋಕಾರ್ಪಣೆ ಮಾಡುತ್ತಿರುವ ಯೋಜನೆಗಳು ಚುನಾವಣೆ ಮುಗಿವರೆಗೆ ಮಾತ್ರ ಲಭ್ಯ: ಸರಡಗಿ

ಕಲಬುರಗಿ: ಕಲಬುರಗಿ ಲೋಕಸಭಾ ಸದಸ್ಯರಾದ ಡಾ. ಉಮೇಶ್ ಜಾಧವ್ ಅವರು ಲೋಕಾರ್ಪಣೆ ಮಾಡುತ್ತಿರುವ ಕೇಂದ್ರದ ಯೋಜನೆಗಳು ಚುನಾವಣೆ ಮುಗಿಯುವವರೆಗೆ ಜಾರಿಯಲ್ಲಿರಲಿವೆ ಎಂದು ಕಲಬುರಗಿ ಉತ್ತರ ಮತ ಕ್ಷೇತ್ರದ ಯುವ ಕಾಂಗ್ರೆಸ್ ಘಟಕದ ಅಧ್ಯಕ್ಷರಾದ ಶಕೀಲ್ ಸರಡಗಿ ವ್ಯಂಗ್ಯವಾಗಿಸಿ ಟೀಕಿಸಿದರು.

ಕಳೆದ ಐದು ವರ್ಷಗಳಿಂದ ಗಾಢನಿದ್ದೆಗೆ ಜಾರಿದ ಸಂಸದರು ಕೇವಲ ಮನವಿ ಪತ್ರಗಳು ನೀಡುವಲ್ಲಿ ಕಳೆದರು. ಲೋಕಸಭಾ ಸದಸ್ಯರಾಗಿ ಐದು ವರ್ಷಗಳಲ್ಲಿ ಕ್ಷೇತ್ರದ ಜನರಿಗಾಗಿ ಯಾವುದೇ ರೀತಿ ಯೋಜನೆಗಳನ್ನು ತರಲು ಸಾಧ್ಯವಾಗಲಿಲ್ಲ. ಚುನಾವಣೆ ಸಮೀಪಿಸುತ್ತಿದ್ದಂತೆ ಸಣ್ಣಪುಟ್ಟಕ್ಕೆ ಭಾರಿ ಪ್ರಚಾರ ಪಡೆಯಲು ಯತ್ನಿಸುತ್ತಿರುವುದು ಸಾರ್ವಜನಿಕರಿಗೆ ಯಾಮಾರಿಸುತ್ತಿರುವುದು ಗೊತ್ತಾಗುತ್ತಿದೆ. ಸದ್ಯ ಲೋಕಾರ್ಪಣೆಗೊಳ್ಳುತ್ತಿರುವ ಸೌಲಭ್ಯಗಳು ಚುನಾವಣೆ ನಂತರ ಮುಂದುವರೆಸುವುದು ಕಷ್ಟ. ಕೇವಲ ಚುನಾವಣೆಗಾಗಿ ಇಂತಹ ಗಿಮ್ಮಿಕ್ ಮಾಡಲಾಗುತ್ತಿದೆ ಎಂದು ಆರೋಪಿಸಿದ್ದರು.

ಲೋಕಸಭೆ ಚುನಾವಣೆಯಲ್ಲಿ ಮತದಾರರ ಬಳಿ ಹೊದರೆ ಐದುವರ್ಷದಲ್ಲಿ ಪ್ರತಿವರ್ಷ ತಾವು ಏನು ಮಾಡಿದ್ದಿರಿ ಯಾವ ಯೋಜನೆಗಳನ್ನು ತಂದಿರಿ ಎಂಬುದನ್ನು ಜನರಿಗೆ ತಿಳಿಸಬೇಕು ಎಂದು ಅವರು ಒತ್ತಾಯಿಸಿದರು.