ಗಡಿ ಭಾಗಗಳಲ್ಲಿ ಕನ್ನಡ ಶಾಲೆ ಕನ್ನಡಿಗರ ಸ್ಥಿತಿ ಶೋಚನಿಯವಾಗಿದೆ

ಸುರಪುರ: ಗಡಿ ಭಾಗಗಳಲ್ಲಿ ಇರುವ ಕನ್ನಡಿಗರ, ಕನ್ನಡ ಶಾಲೆಗಳ ಸ್ಥಿತಿ ಶೋಚನೀಯವಾಗಿದೆ. ಅನ್ಯ ಭಾಷಿಗರು ಅವರನ್ನು ಎರಡನೆಯ ದರ್ಜೆಯ ನಾಗರಿಕರಂತೆ ನೋಡಿಕೊಳ್ಳುತ್ತಿರುವುದು ವಿಷಾದನೀಯ ಸಂಗತಿಯಾಗಿದೆ ಎಂದು ಉಪನ್ಯಾಸಕ ರಜಾಕ ಭಾಗವಾನ ಮಾತನಾಡಿದರು.

ನಗರದ ಗರುಡಾದ್ರಿ ಕಲಾ ಮಂದಿರದಲ್ಲಿ ತಾಲೂಕು ಕನ್ನಡ ಸಾಹಿತ್ಯ ಪರಿಷತ್ತಿನ ವತಿಯಿಂದ ದಿ.ಶಂಕ್ರಮ್ಮ ಮತ್ತು ದಿ ವೀರನಗೌಡ , ದಿ.ಶರಣಮ್ಮ ಮತ್ತು ನರಸನಗೌಡ ಸ್ಮರಣಾರ್ಥ ಜರುಗಿದ ದತ್ತಿ ಉಪನ್ಯಾಸ ಕಾರ್ಯಕ್ರಮದಲ್ಲಿ ಗಡಿ ಭಾಗಗಳಲ್ಲಿ ಕನ್ನಡ ಬೆಳೆಸುವುದು ಮತ್ತು ಉಳಿಸುವುದು ವಿಷಯ ಕುರಿತು ಉಪನ್ಯಾಸ ಮಾಡುತ್ತಾ ಮಾತನಾಡಿದ ಅವರು,ಹೊರ ರಾಜ್ಯಗಳಲ್ಲಿ ಗಡಿಭಾಗಗಳಲ್ಲಿ ಇರುವ ಕನ್ನಡ ಶಾಲೆಗಳಿಗೆ ಮೂಲಭೂತ ಸೌಕರ್ಯಗಳನ್ನು ಒದಗಿಸಿ ಸಕಾಲಕ್ಕೆ ಪಠ್ಯ ಪುಸ್ತಕಗಳನ್ನು ಪೂರೈಸುವದರೊಂದಿಗೆ ಶಿಕ್ಷಕರನ್ನು ನೇಮಿಸುವ ಮೂಲಕ ಪ್ರೋತ್ಸಾಹಿಸುವ ಕೆಲಸವಾಗಬೇಕಿದೆ ಎಂದರು. ಗಡಿ ಭಾಗಗಳ ಮತ್ತು ಹೊರರಾಜ್ಯಗಳಲ್ಲಿ ವಾಸಿಸುವ ಕನ್ನಡಿಗರ ಸಮಸ್ಯೆಗಳನ್ನು ಪರಿಹರಿಸಲು ಕನ್ನಡ ಅಭಿವೃದ್ಧಿ ಪ್ರಾಧಿಕಾರ, ಗಡಿನಾಡು ಅಭಿವೃದ್ಧಿ ಪ್ರಾಧಿಕಾರ, ಕನ್ನಡ ಸಾಹಿತ್ಯ ಪರಿಷತ್ತಿನಂತಹ ಸಂಸ್ಥೆಗಳು ಶ್ರಮಿಸಬೇಕೆಂದರು.

ಅಧ್ಯಕ್ಷತೆಯನ್ನು ವಹಿಸಿದ್ದ ತಾಲೂಕು ಕನ್ನಡ ಸಾಹಿತ್ಯ ಪರಿಷತ್ತಿನ ಅಧ್ಯಕ್ಷರಾದ ಶರಣಬಸಪ್ಪ ಯಾಳವಾರ ಮಾತನಾಡುತ್ತಾ, ಭಾಷಾವಾರು ಪ್ರಾಂತ್ಯಗಳ ರಚನೆಯಿಂದಾಗಿ ಕನ್ನಡದ ಕೆಲವು ಪ್ರದೇಶಗಳು ಹೊರ ರಾಜ್ಯಗಳಲ್ಲಿ ಉಳಿದುಕೊಂಡಿದ್ದು ಅಂತ ಪ್ರದೇಶಗಳಲ್ಲಿ ಮತ್ತು ಗಡಿಭಾಗದಲ್ಲಿ ವಾಸಿಸುವ ಕನ್ನಡಿಗರ ಸಮಸ್ಯೆಗಳಿಗೆ ನಾವೆಲ್ಲರೂ ಒಟ್ಟಾಗಿ ಸ್ಪಂದಿಸಿ ಕನ್ನಡವನ್ನು ಉಳಿಸುವ ಬೆಳೆಸುವ ಕಾರ್ಯವನ್ನು ಮಾಡೋಣ ಎಂದು ಹೇಳಿದ ಅವರು ಮುಂದಿನ ದಿನಗಳಲ್ಲಿ ತಾಲೂಕು ಕನ್ನಡ ಸಾಹಿತ್ಯ ಪರಿಷತ್ತಿನ ವತಿಯಿಂದ ಹೊರ ರಾಜ್ಯಗಳ ಕನ್ನಡ ಶಾಲೆಗಳಲ್ಲಿ ಮತ್ತು ಜನವಸತಿ ಪ್ರದೇಶಗಳಲ್ಲಿ ಉಪನ್ಯಾಸ ಕಾರ್ಯಕ್ರಮಗಳನ್ನು ಏರ್ಪಡಿಸುವ ಮೂಲಕ ಕನ್ನಡ ಭಾಷೆ ಉಳಿಸುವ ಬೆಳೆಸುವ ಕಾರ್ಯ ಮಾಡಲಾಗುವುದೆಂದು ಹೇಳಿದರು.

ಹಿರಿಯ ಸಾಹಿತಿ ಶಾಂತಪ್ಪ ಬೂದಿಹಾಳ ಉದ್ಘಾಟಿಸಿ ಹಾಗೂಕನ್ನಡ ಸಾಹಿತ್ಯ ಸಂಘ ಸುರಪುರದ ಅಧ್ಯಕ್ಷರಾದ ಬಸವರಾಜ ಜಮದರಖಾನಿ ವೇದಿಕೆಯಲ್ಲಿ ಉಪಸ್ಥಿತರಿದ್ದು ಕಾರ್ಯಕ್ರಮದ ಕುರಿತು ಮಾತನಾಡಿದರು.

ಪ್ರಮುಖರಾದ ಸೋಮರೆಡ್ಡಿ ಮಂಗಿಹಾಳ , ಶ್ರೀಶೈಲ್ ಯಂಕಂಚಿ ವಿದ್ಯಾಧರ ಪಾಟೀಲ್ ಮಾಲಿ ಪಾಟೀಲ, ನಾಗರೆಡ್ಡಿ ಎಸ್ ಗೌಡಪ್ಪಗೋಳ, ಶಿವಶರಣಬಸವ ಪುರಾಣಿಕಮಠ, ವಸಂತಕುಮಾರ್ ಬಣಗಾರ,ಚೆನ್ನಪ್ಪ ಹೂಗಾರ್,ಬಸವರಾಜ್ ಸಿ ಅಮ್ಮಾಪುರ, ರಮೇಶ್ ಕುಲಕರ್ಣಿ ಶಾಂತಗೌಡ ಪಾಟೀಲ್ ನಾಗರಾಳ್ ರಾಘವೇಂದ್ರ ಬಕ್ರೀ. ಎ.ಕಮಲಾಕರ, ಅರುಣ್ ಕುಮಾರ್ ಸಲೆಗಾರ್, ಶಿವಶರಣ ದಿಗ್ಗಾವಿ, ದೇವರಾಜ್ ಪಾಟೀಲ್, ಸೇರಿದಂತೆ ಹಲವಾರು ಕ.ಸಾ.ಪ. ಪದಾಧಿಕಾರಿಗಳು ಸದಸ್ಯರು ಹಾಗೂ ಕನ್ನಡ ಅಭಿಮಾನಿಗಳು ಕಾರ್ಯಕ್ರಮದಲ್ಲಿ ಉಪಸ್ಥಿತರಿದ್ದರು

ದೇವು ಎಸ್ ಹೆಬ್ಬಾಳ ನಿರೂಪಿಸಿದರು, ಗೌರವ ಕಾರ್ಯದರ್ಶಿ ಎಚ್ ವೈ ರಾಠೋಡ್ ಸ್ವಾಗತಿಸಿದರು ,ಗೌರವಕೋಶಾದಕ್ಷ ವೆಂಕಟೇಶ್ ಎಂ ಪಾಟೀಲ್ ಪ್ರಾಸ್ತಾವಿಕವಾಗಿ ಮಾತನಾಡಿದರು, ಅನ್ವರ್ ಜಮಾದಾರ್ ವಂದನಾರ್ಪಣೆ ಮಾಡಿದರು.