ಜುಲೈ 30ಕ್ಕೆ ಕಲಬುರಗಿ ಪಾಲಿಕೆಯ ಮೇಯರ್, ಉಪ ಮೇಯರ್ ಸ್ಥಾನಕ್ಕೆ ಚುನಾವಣೆ

ಕಲಬುರಗಿ: 55 ವಾರ್ಡಗಳು ಹೊಂದಿರುವ ಕಲಬುರಗಿ ಮಹಾನಗರ ಪಾಲಿಕೆಯ 22ನೇ ಅವಧಿಯ ಮೇಯರ್ ಮತ್ತು ಉಪಮೇಯರ್ ಸೇರಿ ನಾಲ್ಕು ಸ್ಥಾಯಿ ಸಮಿತಿಗಳ ಆಯ್ಕೆಗೆ ಜುಲೈ 30 ರಂದು ಚುನಾವಣೆ ಘೋಷಣೆ ಮಾಡಿ ಕಲಬುರಗಿ ಪ್ರದೇಶಿಕ ಆಯುಕ್ತರು ತಿಳುವಳಿಕೆ ಪತ್ರ ಹೊರಡಿಸಿದ್ದಾರೆ.

ಮೇಯರ್ ಹುದ್ದೆ ಪರಿಶಿಷ್ಟ ಜಾತಿಗೆ ಮೀಸಲಾಗಿದ್ದು, ಉಪಮೇಯರ್ ಹುದ್ದೆ ಬಿಸಿಎ ವರ್ಗಕ್ಕೆ ಮೀಸಲಾಗಿದೆ. ಜುಲೈ 30 ರಂದು ಬೆಳಿಗ್ಗೆ 10:30ರೊಳಗೆ ಅಪಾರ ಜಿಲ್ಲಾಧಿಕಾರಿ ಕಚೇರಿಯಲ್ಲಿ ನಾಮಪತ್ರ ಸಲ್ಲಿಸಲು ಅವಕಾಶ ನೀಡಲಾಗಿದ್ದು, ಅಂದು 12 ಗಂಟೆಗೆ ನಗರದ ಟೌನ್ ಹಾಲ್ ನಲ್ಲಿ ಸದಸ್ಯರ ಹಾಜರಾತಿ ಪಡೆದು 12;30ರ ನಂತರ ನಾಮಪತ್ರ ಪರಿಶೀಲನೆ, ನಾಮಪತ್ರ ಮರಳಿ ಪಡೆಯಲು ಕಾಲಾವಕಾಶ ಹಾಗೂ ಅವಶ್ಯವಿದಲ್ಲಿ ಮತದಾನದ ಬಳಿಕ 6 ಸ್ಥಾನಗಳ ಫಲಿತಾಂಶ ಪ್ರಕಟಗೊಳ್ಳಲಿದೆ ಎಂದು ಆದೇಶದಲ್ಲಿ ತಿಳಿಸಿದ್ದಾರೆ.

ಕಾಂಗ್ರೆಸ್ ಗೆ ಸಂಖ್ಯೆ ಬಲ: ಬಿಜೆಪಿಯ 22 ಪಾಲಿಕೆ ಸದಸ್ಯರು ಮತ್ತು ವಿಧಾನ ಪರಿಷತ್ ಸದಸ್ಯರು ಒಳಗೊಂಡಂತೆ 4 ಜನಪ್ರತಿನಿಧಿಗಳು ಮತ್ತು ಬಿಜೆಪಿಯ ಮಿತ್ರಪಕ್ಷ ಜೆಡಿಎಸ್ 4 ಪಾಲಿಕೆ ಸದಸ್ಯರ ಸಂಖ್ಯೆ ಸೇರಿ 30 ಸಂಖ್ಯೆ ಬಲ ಇದೆ. ಕಾಂಗ್ರೆಸ್ ನ 27 ಸದಸ್ಯರು ಮತ್ತು ಶಾಸಕರು, ಸಂಸದರು, ಹಾಗೂ ವಿಧಾನ ಪರಿಷತ ಸದಸ್ಯರು ಮತ್ತು ರಾಜ್ಯಸಭಾ ಸದಸ್ಯರು ಒಳಗೊಂಡಂತೆ 6 ಜನಪ್ರತಿನಿಧಿಗಳು ಸೇರಿ 33 ಸಂಖ್ಯೆ ಬಲ ಹೊಂದಿದೆ.

ಕಾಂಗ್ರೆಸ್ ನ 27 ಪಾಲಿಕೆ ಸದಸ್ಯರು ಮತ್ತು ಪಕ್ಷದ ಜನಪ್ರತಿನಿಧಿಗಳಾದ ರಾಜ್ಯಸಭಾ ಸದಸ್ಯ ಡಾ. ಮಲ್ಲಿಕಾರ್ಜುನ ಖರ್ಗೆ, ಸಂಸದ ರಾಧಾಕೃಷ್ಣ ದೊಡ್ಡಮನಿ, ಶಾಸಕರಾದ, ಕನೀಜ್ ಫಾತಿಮಾ, ಅಲ್ಲಮಪ್ರಭು ಪಾಟೀಲ್, ತಿಪ್ಪಣ್ಣಪ್ಪ ಕಮಕನೂರ ಹಾಗೂ ಡಾ. ಚಂದ್ರಶೇಖರ್ ಪಾಟೀಲ್ ಹುಮನಾಬಾದ್ ಮತದಾನ ಮಾಡಬಹುದಾಗಿದ್ದು, ಬಿಜೆಪಿಯ 22 ಪಾಲಿಕೆಯ ಸದಸ್ಯರು ಮತ್ತು ಪಕ್ಷದ ಶಾಸಕ ಬಸವರಾಜ ಮತ್ತಿಮುಡ್, ವಿಧಾನ ಪರಿಷತ್ ಸದಸ್ಯ ಶಶೀಲ್ ಜಿ.ನಮೋಶಿ, ಸುನೀಲ್ ವಲ್ಲ್ಯಾಪುರೆ, ಬಿ.ಜಿ. ಪಾಟೀಲ ಮತದಾನದ ಅಧಿಕಾರ ಹೊಂದಿದ್ದಾರೆ.

ಸದಸ್ಯತ್ವವಿದ್ದರೂ ವಾರ್ಡ್ ಸದಸ್ಯ ಶಂಬುಲಿಂಗ ಬಳಬಟ್ಟಿಗೆ ಮತದಾನದ ಹಕ್ಕು ಇಲ್ಲ. 24ನೇ ವಾರ್ಡ್‌ನ ಪ್ರಿಯಾಂಕಾ ಭೋವಿ ಸದಸ್ಯತ್ವಕ್ಕೆ ತಡೆಯಾಜ್ಞೆ ಇರುವುದರಿಂದ ಮತದಾನ ಮಾಡುವಂತಿಲ್ಲ ಎಂದು ತಿಳಿದುಬಂದಿದೆ.

ಮೇಯರ್ ವಿಶಾಲ ದರ್ಗಿ ಮತ್ತು ಉಪಮೇಯರ್ ಶಿವಾನಂದ ಪಿಸ್ತಿ ಅವರ ಅಧಿಕಾರಾವಧಿಯು ಮಾರ್ಚ್ 23, 2023 ರಂದು ಕೊನೆಗೊಂಡಿದ್ದು, ನಗರದ ‘ಪ್ರಥಮ ಪ್ರಜೆ’ ಚುನಾವಣೆಗೆ ‘ಕಾಂಗ್ರೆಸ್’ ಮತ್ತು ‘ಬಿಜೆಪಿ’ ಪಾಳಯದಲ್ಲಿ ರಾಜಕೀಯ ಚಟುವಟಿಕೆಗಳು ಜೋರಾಗಿ ನಡೆಯುತ್ತಿವೆ.