ಹಣೆಯ ಮೇಲೆ ಹಚ್ಚಿದ ವಿಭೂತಿ ಆತ್ಮವಿಶ್ವಾಸ ಹೆಚ್ಚಿಸುತ್ತದೆ: ಅರ್ಪಿತಾ ಪಾಟೀಲ

ಕಲಬುರಗಿ: ಹಣೆಯ ಮೇಲೆ ಹಚ್ಚಿದ ವಿಭೂತಿ ಸಮಾನತೆ ಸಾರುವದರೊಂದಿಗೆ ಮನುಷ್ಯನ ಆತ್ಮವಿಶ್ವಾಸ ಹೆಚ್ಚಿಸುತ್ತದೆ ಎಂದು ಆರಾಧನಾ ಪದವಿ ಪೂರ್ವ ಕಾಲೇಜಿನ ಉಪನ್ಯಾಸಕರಾದ ಅರ್ಪಿತಾ ಕೆ ಪಾಟೀಲ ಹೇಳಿದರು.

ಕಲಬುರಗಿ ನಗರದ ಭವಾನಿ ನಗರದಲ್ಲಿರುವ ಬಬಲಾದ ಮಠದಲ್ಲಿ 238ನೇ ಶಿವಾನುಭವಗೋಷ್ಠಿ ಕಾರ್ಯಕ್ರಮದಲ್ಲಿ ಉಪನ್ಯಾಸ ನೀಡುತ್ತಾ ಬಸವಾದಿ ಶರಣರು ಹಣೆಯ ಮೇಲೆ ವಿಭೂತಿ ಧರಿಸಿದ ವ್ಯಕ್ತಿಯ ಕಾರ್ಯಗಳು ಯಶಸ್ವಿಯಾಗುತ್ತವೆ. ಯಾವುದೇ ಜಾತಿ, ಧರ್ಮಕ್ಕೆ ವಿಭೂತಿ ಸೀಮಿತವಲ್ಲ ಎಂದು ಸಾರಿ ನುಡಿದಂತೆ ನಡೆದು ಸಮ ಸಮಾಜ ನಿರ್ಮಿಸಿದ್ದಾರೆ. ನಾವು ಮಾಡುವ ಕಾರ್ಯ ಮಕ್ಕಳು ಸೂಕ್ಷ್ಮವಾಗಿ ಗಮನಿಸುತ್ತಾರೆ ಅದಕ್ಕಾಗಿ ಶುದ್ಧವಾದ ಕಾರ್ಯದೊಂದಿಗೆ ಜೀವನ ಸಾಗಿಸಿದಾಗ ನಾವು ಸರ್ವರಿಗೂ ಮಾದರಿ ಆಗುತ್ತೇವೆ ಎಂದು ಮಾರ್ಮಿಕವಾಗಿ ನುಡಿದರು.

ಮುಖ್ಯ ಅತಿಥಿಗಳಾಗಿ ಆದರ್ಶ ಐಟಿಐ ಕಾಲೇಜಿನ ಕಿರಿಯ ತಾಂತ್ರಿಕ ಅಧಿಕಾರಿಗಳಾದ ಅಬ್ದುಲ್ ಯುನೂಸ ಮಾತನಾಡುತ್ತಾ ಎಲ್ಲಾ ಧರ್ಮಗಳಲ್ಲಿಯೂ ಕಾಯಕದೊಂದಿಗೆ ದಾಸೋಹ ಮಾಡಿ ಸಮಾನತೆಯಿಂದ ಜೀವನ ಸಾಗಿಸಬೇಕಂಬುವದು ಮೂಲ ತತ್ವವಾಗಿದೆ. ಯಾವುದೆ ಧರ್ಮ, ಜಾತಿ ಎನ್ನದೆ ಜಾತ್ಯಾತೀತವಾಗಿ, ಸರ್ವರು ನಮ್ಮವರೆಂದು ಅಪ್ಪಿ, ಒಪ್ಪಿಕೊಂಡು ಸಂಸ್ಕಾರದ ಮಾರ್ಗ ತೋರಿಸುವ ಮಠಗಳಲ್ಲಿ ಬಬಲಾದ ಮಠವು ಪ್ರಮುಖವಾಗಿದೆ ಎಂದು ಹೇಳಿದರು.

ಕಾರ್ಯಕ್ರಮದಲ್ಲಿ ನ್ಯಾಯವಾದಿ ಹಣಮಂತರಾಯ ಎಸ್ ಅಟ್ಟೂರ, ಉಪನ್ಯಾಸಕರಾದ ಕಾಶಿನಾಥ ಪಾಟೀಲ,ಮಹೇಶ ಮಠಪತಿ, ರೇವಣಸಿದ್ದಯ್ಯ ಶಾಸ್ತ್ರಿ, ಶರಣು ವರನಾಳ, ಶಾಂತು ಕಲಬುರಗಿ, ಶಿವರಾಜ ಭಾಲಖೇಡ, ಗುರುರಾಜ ಹಸರಗುಂಡಗಿ, ಸಿದ್ದಣ್ಣ ವಾಡಿ, ಶಿವಕುಮಾರ ಸಾವಳಗಿ, ರಾಜೇಂದ್ರ ಹೂಗಾರ, ಚನ್ನವೀರ ಮಹಿಳಾ ಭಜನಾ ಸಂಘದವರು ಹಾಗೂ ಕಲಕೋರಿ ಗ್ರಾಮದ ಪಾದಯಾತ್ರಿಗಳು ಸೇರಿದಂತೆ ಅನೇಕ ಜನ ಭಾಗವಹಿಸಿದರು.

ಇದೇ ಸಂದರ್ಭದಲ್ಲಿ ಉಪನ್ಯಾಸಕರಿಗೂ, ಅತಿಥಿಗಳಿಗೂ ಶ್ರೀಮಠದ ವತಿಯಿಂದ ಗೌರವಿಸಲಾಯಿತು.