ದೇಶದಲ್ಲಿ ಆರ್ಥಿಕ ಬಿಕ್ಕಟ್ಟು: ಖರ್ಗೆ ಟೀಕೆ

ಕಲಬುರಗಿ: ದೇಶವು ಹಿಂದೆಂದೂ ಕಂಡರಿಯದ ರೀತಿಯಲ್ಲಿ ಆರ್ಥಿಕ ಬಿಕ್ಕಟ್ಟು ಎದುರಿಸುತ್ತಿದೆ ಎಂದು ಕೇಂದ್ರ ಮಾಜಿ ಸಚಿವ ಹಾಗೂ ಎಐಸಿಸಿಐ ಪ್ರಧಾನ ಕಾರ್ಯದರ್ಶಿ ಡಾ. ಮಲ್ಲಿಕಾರ್ಜುನ್ ಖರ್ಗೆಯವರು ಇಲ್ಲಿ ಆರೋಪಿಸಿದರು.

ನಗರದ ಹುಮ್ನಾಬಾದ್ ರಸ್ತೆಯಲ್ಲಿನ ಕಪನೂರ್ ಪ್ರದೇಶದಲ್ಲಿ ನೂತನವಾಗಿ ನಿರ್ಮಾಣಗೊಂಡ ಮಹಿಂದ್ರಾ ಆಂಡ್ ಮಹಿಂದ್ರಾ ಕಂಪೆನಿ ಶಾಹ ಮೋಟರ್ಸ್ ಶೋರೂಂ ಉದ್ಘಾಟಿಸಿದ ನಂತರ ಮಾಧ್ಯಮದವರೊಂದಿಗೆ ಮಾತನಾಡಿದ ಅವರು, ಪ್ರಧಾನಿ ನರೇಂದ್ರ ಮೋದಿ ಅವರ ನೇತೃತ್ವದ ಎನ್‌ಡಿಎ ಸರ್ಕಾರದ ತಪ್ಪು ನೀತಿಗಳೇ ಆರ್ಥಿಕ ಬಿಕ್ಕಟ್ಟಿಗೆ ಪ್ರಮುಖ ಕಾರಣವಾಗಿದೆ ಎಂದು ದೂರಿದರು.

ಯಾವುದೇ ರೀತಿಯ ಮುಂಜಾಗ್ರತಾ ಕ್ರಮಗಳನ್ನು ಕೈಗೊಳ್ಳದೇ ಹಠಾತ್ತನೇ ೫೦೦ರೂ.ಗಳು ಹಾಗೂ ೧೦೦೦ರೂ.ಗಳ ಮುಖಬೆಲೆಯ ನೋಟುಗಳನ್ನು ಅಮಾನ್ಯೀಕರಣಗೊಳಿಸಲಾಯಿತು. ನೋಟು ಅಮಾನ್ಯೀಕರಣವು ದೇಶದ ಆರ್ಥಿಕ ವ್ಯವಸ್ಥೆಗೆ ದೊಡ್ಡ ಹೊಡೆತವನ್ನು ನೀಡಿದೆ. ಪರಿಣಾಮ ಹೊಸ ಉದ್ಯೋಗಗಳನ್ನು ಸೃಷ್ಟಿಸುವುದಿರಲಿ, ಇರುವ ಉದ್ಯೋಗಗಳನ್ನು ಕಳೆದುಕೊಂಡು ಲಕ್ಷಾಂತರ ಜನರು ನಿರುದ್ಯೋಗಿಗಳಾದರು ಎಂದು ಅವರು ಕಳವಳ ವ್ಯಕ್ತಪಡಿಸಿದರು.

ಗ್ರಾಹಕರು ತಮ್ಮ ಬ್ಯಾಂಕುಗಳಲ್ಲಿನ ಹಣವನ್ನು ತೆಗೆದುಕೊಳ್ಳಲು ಪರದಾಡಿದರು. ಹಲವರು ಸರದಿ ಸಾಲಿನಲ್ಲಿ ನಿಂತು ಅಸುನೀಗಿದರು ಎಂದು ಹೇಳಿದ ಅವರು, ಹೊಸ ಉದ್ಯೋಗಗಳನ್ನು ಸೃಷ್ಟಿಸುವಲ್ಲಿಯೂ ಸಹ ಕೇಂದ್ರ ಸರ್ಕಾರವು ವಿಫಲಗೊಂಡಿದೆ ಎಂದು ಅವರು ಹರಿಹಾಯ್ದರು. ಆರ್ಥಿಕ ಹಿಂಜರಿತನದಿಂದ ಅಟೋಮೊಬೈಲ್ ಕ್ಷೇತ್ರದ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರಿದ್ದು, ಗ್ರಾಹಕರು ವಾಹನಗಳನ್ನು ಖರೀದಿಸುವ ಉತ್ಸಾಹವನ್ನು ಹೆಚ್ಚಿಸುವ ಮೂಲಕ ಹೊಸದಾಗಿ ನಿರ್ಮಾಣಗೊಂಡ ಶೋರೂಂಗೆ ಪ್ರೊತ್ಸಾಹ ನೀಡಬೇಕೆಂದು ಅವರು ತಿಳಿಸಿದರು.

ಈ ಸಂದರ್ಭದಲ್ಲಿ ಶಾಹ ಗ್ರೂಪ್ಸ್‌ನ ಮುಖ್ಯಸ್ಥ ಚಂದ್ರಮೋಹನ್ ಶಾಹ್, ವ್ಯವಸ್ಥಾಪಕ ನಿರ್ದೇಶಕ ಆನಂದ್ ಶಾಹ್, ಮಹೀಂದ್ರಾ ಕಂಪೆನಿಯ ದಕ್ಷಿಣ ವಲಯದ ಹಿರಿಯ ಪ್ರಧಾನ ವ್ಯವಸ್ಥಾಪಕ ಮನೋಜಕುಮಾರ್ ಗುಪ್ತಾ, ಗ್ರಾಹಕರ ಆರೈಕೆ ಪ್ರಧಾನ ವ್ಯವಸ್ಥಾಪಕ ಕೆ.ಬಿ. ಸುಬ್ಬಯ್ಯಾ, ಪ್ರಾದೇಶಿಕ ಮಾರಾಟ ವ್ಯವಸ್ಥಾಪಕ ಪಂಕಜ್ ದೇಶಮುಖ್, ಪ್ರಾದೇಶಿಕ ಗ್ರಾಹಕ ಆರೈಕೆ ವ್ಯವಸ್ಥಾಪಕ ಮನೋಜಕುಮಾರ್, ಪ್ರಾದೇಶಿಕ ವ್ಯಾವಹಾರ ಮುಖ್ಯಸ್ಥ ಅಭಿಷೇಕ್ ರಾವರಾ, ಕ್ಲಸ್ಟರ್ ವ್ಯವಹಾರ ವ್ಯವಸ್ಥಾಪಕ ಕಿಶೋರ್ ಪಾಟೀಲ್, ಚಾನೆಲ್ ಅಭಿವೃದ್ಧಿ ವ್ಯವಸ್ಥಾಪಕ ವಿನಯಕುಮಾರ್, ಶಿಲ್ಪಾ ಚ. ಶಾಹ, ಡಾ. ಅನುರಾಧಾ, ಡಾ. ಅಮಿತ್ ಶಹಾ, ಸಂಪದಾ ಶಹಾ, ನೀಲ್ ಮುಂತಾದವರು ಉಪಸ್ಥಿತರಿದ್ದರು. ರೀವಾ ಅವರು ಕಾರ್ಯಕ್ರಮ ನಿರೂಪಿಸಿದರು. ಅಂಶ್ ಅವರು ವಂದಿಸಿದರು. ಶೋರೂಂನ ಸಿಬ್ಬಂದಿ ವರ್ಗದವರು ಕಾರ್ಯಕ್ರಮದಲ್ಲಿ ಪಆಲ್ಗೊಂಡಿದ್ದರು.