ಮಹದಾಯಿ ನದಿ ರಕ್ಷಣೆ ಅಗತ್ಯ : ಗೋವಾ ಸಿಎಂ

ಜೇವರ್ಗಿ(ಪಣಜಿ): ಉತ್ತರ ಗೋವಾ ಸಂಪೂರ್ಣವಾಗಿ ಮಹದಾಯಿ ನದಿ ನೀರನ್ನೇ ಅವಲಂಬಿಸಿದ್ದು, ಪಶ್ಚಿಮ ಘಟ್ಟ ಅಭಯಾರಣ್ಯ ಪ್ರದೇಶದ ಮಹದಾಯಿ ಕಣಿವೆ ಉಳಿವಿನ ದೃಷ್ಟಿಯಿಂದ ಮಹದಾಯಿ ನದಿ ರಕ್ಷಣೆ ಅಗತ್ಯವಾಗಿದೆ ಎಂದು ಗೋವಾ ಮುಖ್ಯಮಂತ್ರಿ ಪ್ರಮೋದ್ ಸಾವಂತ್ ಹೇಳಿದರು.

ನೆರೆಯ ಗೋವಾದ ಸಾಂಖಳಿ ನಗರದ ರವೀಂದ್ರ ಭವನದಲ್ಲಿ ಸಿರಿಗಂಧ ಕನ್ನಡ ಸಂಘ, ಕರ್ನಾಟಕ ಜಾಗೃತಿ ವೇದಿಕೆ ಹಾಗೂ ಕರ್ನಾಟಕದ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಸಂಯುಕ್ತಾಶ್ರಯದಲ್ಲಿ ಆಯೋಜಿಸಲಾಗಿದ್ದ ಕನ್ನಡ ರಾಜ್ಯೋತ್ಸವ ಮತ್ತು ಹೊರನಾಡ ಕನ್ನಡಿಗರ ಸಾಂಸ್ಕೃತಿಕ ಸಂಭ್ರಮ ಕಾರ್ಯಕ್ರಮ ಉದ್ಘಾಟಿಸಿ ಅವರು ಮಾತನಾಡಿದರು. ಕರ್ನಾಟಕ ಮತ್ತು ಗೋವಾ ರಾಜ್ಯಗಳ ಬಾಂಧವ್ಯ ಉತ್ತಮವಾಗಿರಬೇಕು, ಆದರೆ ನನಗೆ ಗೋವಾ ರಾಜ್ಯದ ಹಿತವೇ ಬಹಳ ಮುಖ್ಯವಾಗಿದೆ. ಮಹದಾಯಿ ನದಿ ನೀರು ಗೋವಾ ಜನರಿಗೆ ಬಹಳ ಅನಿವಾರ್ಯವಾಗಿದೆ ಎಂಬುದು ಪ್ರಭಾಕರ ಕೋರೆ ಕರ್ನಾಟಕದ ಜನತೆಗೆ ತಿಳಿಸಬೇಕು. ಗೋವಾದಲ್ಲಿ ಕನ್ನಡಿಗರಿಗೆ ಯಾವುದೇ ರೀತಿಯ ತೊಂದರೆಯಾಗದ ರೀತಿಯಲ್ಲಿ ಸೌಲಭ್ಯ ನೀಡುವುದರ ಜೊತೆಗೆ ಕನ್ನಡ ಭವನ ನಿರ್ಮಾಣಕ್ಕೆ ಜಾಗ ನೀಡಲು ಸ್ಥಳಿಯ ಸಂಘ-ಸಂಸ್ಥೆಗಳಿಗೆ ಶಿಫಾರಸ್ಸು ಮಾಡಲಾಗುವುದು ಎಂದರು.

ರಾಜ್ಯಸಭಾ ಸದಸ್ಯ ಪ್ರಭಾಕರ ಕೋರೆ ಮಾತನಾಡಿ, ಗೋವಾದಲ್ಲಿ ಕನ್ನಡ ಭವನ ನಿರ್ಮಾಣಕ್ಕೆ ಇಲ್ಲಿನ ಸರ್ಕಾರ ಜಾಗ ನೀಡಬೇಕು, ಜಾಗ ನೀಡಿದ್ದೇ ಆದಲ್ಲಿ ಕೆಎಲ್‌ಇ ಸಂಸ್ಥೆಯಿಂದ ೧೦ ಲಕ್ಷ ರೂ.ನೆರವು ನೀಡಲಾಗುವುದು ಎಂದರು. ಇದೇ ಸಂದರ್ಭದಲ್ಲಿ ಗೋವಾ ಸಿಎಂ ಪ್ರಮೋದ್ ಸಾವಂತ್,ಜೇವರ್ಗಿಯ ಉದಯವಾಣಿ ವರದಿಗಾರ ವಿಜಯಕುಮಾರ ಕಲ್ಲಾ, ಖ್ಯಾತ ವೈದ್ಯ ಡಾ.ಸಯ್ಯದ್ ಅಬ್ದುಲ್ ಖಾದರ, ತಹಶೀಲ್ದಾರ್ ಶಾಹೀದ್ ಹುಸೇನ, ಸಂಗೀತ ಕಲಾವಿದೆ ಪೂಜಾ ವಿಭೂತಿಮಠ ಸೇರಿದಂತೆ ವಿವಿಧ ಕ್ಷೇತ್ರಗಳಲ್ಲಿ ಗಣನೀಯ ಸೇವೆ ಸಲ್ಲಿಸಿದ ಮಹನೀಯರಿಗೆ ಕರುನಾಡ ಭೂಷಣ ಪ್ರಶಸ್ತಿ ನೀಡಿ ಗೌರವಿಸಿದರು.

ಸಿರಿಗಂಧ ಕನ್ನಡ ಸಂಘದ ಅಧ್ಯಕ್ಷ ಎಸ್.ಹೆಚ್.ಪಾಟೀಲ, ಕರ್ನಾಟಕ ಜಾಗೃತಿ ವೇದಿಕೆ ಅಧ್ಯಕ್ಷ ಮಹೇಶಬಾಬು ಸುರವೆ, ಸಮ್ಮೇಳನಾಧ್ಯಕ್ಷ ಪ್ರಭು ರತ್ನಾಕರ, ನ್ಯಾಯವಾದಿ ಕೆ.ಎಲ್.ಕುಂದರಗಿ, ಸಾಂಖಳಿಯ ಮುನ್ಸಿಪಲ್ ಕೌನ್ಸಿಲ್ ಮುಖ್ಯಸ್ಥ ಧರ್ಮೇಶ, ಜಿಪಂ ಮಾಜಿ ಸದಸ್ಯ ಪಾಂಡುರಂಗ ಸಾವಂತ, ಗೋವಾ ಬಿಜೆಪಿ ಮಹಿಳಾ ಮೋರ್ಚಾ ರಾಜ್ಯಾಧ್ಯಕ್ಷೆ ಸುಲಕ್ಷಣಾ ಪ್ರಮೋದ ಸಾವಂತ್, ರಶ್ಮಿ ದೇಸಾಯಿ, ಹನುಮಂತರೆಡ್ಡಿ ಶಿರೂರ, ಮಲ್ಲಿಕಾರ್ಜುನ ಬದಾಮಿ, ವೀರೇಶ ಗಣಾಚಾರಿ ಸೇರಿದಂತೆ ಮತ್ತೀತರರು ಭಾಗವಹಿಸಿದ್ದರು.