ಜಮೀನು ಕಳೆದುಕೊಂಡ ರೈತರಿಗೆ ವಿಮಾನ ನಿಲ್ದಾಣದಲ್ಲಿ ಉದ್ಯೋಗ ನೀಡಲು ಆಗ್ರಹ

ಕಲಬುರಗಿ: ನಗರದ ಶ್ರೀನಿವಾಸ ಸರಡಗಿ ಗ್ರಾಮದ ಹತ್ತಿರ ನೂತನ‌ವಾಗಿ ನಿರ್ಮಾಣಗೊಂಡಿರುವ ವಿಮಾನ ನಿಲ್ದಾಣಕ್ಕಾಗಿ ಜಮೀನು ಕಳೆದುಕೊಂಡ ರೈತರಿಗೆ ಉದ್ಯೋಗ ನೀಡುವಂತೆ ಕರ್ನಾಟಕ ಜನತಾ ಪಕ್ಷದ ವಿಭಾಗೀಯ ಅಧ್ಯಕ್ಷ್ಯ ಶರಣ ಎಮ್ ಬಡಿಗೇರ್ ಆಗ್ರಹಿಸಿದರು.

ನಗರದ ಪತ್ರಿಕಾ ಭವನದಲ್ಲಿ ಮಂಗಳವಾರ ನಡೆದ ಪತ್ರಿಕಾ ಭವನದಲ್ಲಿ ಮಾತನಾಡಿದ ಅವರು, ಕಲಬುರಗಿ ನಿರ್ಮಾಣಕ್ಕಾಗಿ ಸುಮಾರು‌ ೧೫ ವರ್ಷಗಳಿಂದ ವಿಮಾನಯಾನ ಪ್ರಾಧಿಕಾರ ಹಾಗೂ ರಾಜ್ಯಸರಕಾರದಿಂದ ವಿಮಾನ ನಿಲ್ದಾಣದ ಸುತ್ತಮುತ್ತಲಿನ ಶ್ರೀನಿವಾಸ ಸರಡಗಿ, ಮಡಿಯಾಳ ತಾಂಡ ಸೇರಿದಂತೆ ಇನ್ನಿತರ ಗ್ರಾಮಗಳಲ್ಲಿ ರೈತರಿಂದ ಸುಮಾರು ೫೯೫ ಎಕರೆ ಜಮೀನನ್ನು ಅತ್ಯಂತ ಕಡಿಮೆ ಬೆಲೆಯಲ್ಲಿ ಖರೀದಿಸಿದ್ದಾರೆ. ಆದ್ದರಿಂದ ಜಮೀನು ಕಳೆದುಕೊಂಡ ರೈತರ ಜೀವನ‌ ನಿರ್ವಹಣೆಗಾಗಿ ವಿಮಾನ ನಿಲ್ದಾಣದಲ್ಲಿ ರೈತರ ಕುಟುಂಬಸ್ಥರಿಗೆ ಒಂದು ಉದ್ಯೋಗ ನೀಡಬೇಕು ಎಂದು ಆಗ್ರಹಿಸಿದರು.

ಒಂದು ವೇಳೆ ನ.೨೨ ರ ಒಳಗೆ ರೈತರಿಗೆ ಉದ್ಯೋಗ ನೀಡುವ ಕುರಿತು ನಿರ್ಧಾರ ಕೈಗೊಳ್ಳದೇ ಹೋದರೆ ಸಂಸದ ಉಮೇಶ ಜಾಧವ ಅವರಿಗೆ ಹಾಗೂ ಮುಖ್ಯಮಂತ್ರಿಗಳಿಗೆ ಸುತ್ತಮುತ್ತಲಿನ ಜಮೀನು ಕಳೆದುಕೊಂಡ ರೈತರೊಂದಿಗೆ ಸೇರಿ ಕಪ್ಪು ಬಾವುಟ ಪ್ರದರ್ಶನ ಮಾಡಲಾಗುವುದು ಎಂದು‌ ಎಚ್ಚರಿಸಿದರು.

ಹೈಕ ಭಾಗವನ್ನು ಕಲ್ಯಾಣ ಕರ್ನಾಟಕ ಎಂದು ಮರುನಾಮಕರಣ ಮಾಡಿರುವುದು ಸಂತಸ ತಂದಿದೆ. ಆದರೆ ಸರಕಾರ ಆಡಳಿತಕ್ಕೆ ೧೦೦ ದಿನಗಳೂ ಕಳೆದರೂ ಕೂಡ ಹೆಸರಿಗೆ ತಕ್ಕಂತೆ ಕಲ್ಯಾಣವಾಗಿಲ್ಲ, ಅಭಿವೃದ್ಧಿ ಮಂಡಳಿಗೆ ಪೂರ್ಣಕಾಲಿಕ ಅಧ್ಯಕ್ಷರಿಲ್ಲದೇ ಈ ಭಾಗದ ಅಭಿವೃದ್ಧಿ ಸಂಪೂರ್ಣ ಸ್ಥಗಿತಗೊಂಡಿದೆ, ಜಿಲ್ಲಾ ಉಸ್ತುವಾರಿಗಳು ತಿಂಗಳಿಗೊಂದು ಬಾರಿಯೂ ಇಲ್ಲಿಗೆ ಬರುವುದಿಲ್ಲ, ಜನರ‌ ಸಮಸ್ಯೆ ಆಲಿಸುದಿಲ್ಲ. ಆದ್ದರಿಂದ ಬಿಎಸ್ವೈ ನೇತೃತ್ವದ ರಾಜ್ಯಸರಕಾರ ಕೂಡಲೇ ಈ ಜಿಲ್ಲೆಗೆ ಒಂದು‌ ಸಚಿವ ಸ್ಥಾನ ಹಾಗೂ ಸ್ಥಳೀಯ ಶಾಸಕರಿಗೆ ಕೆಕೆ ಆರ್ ಡಿಬಿ ಅಧ್ಯಕ್ಷ್ಯ ಸ್ಥಾನವನ್ನು ನೀಡುವ ಮುಖಾಂತರ ಈ ಭಾಗದ ಅಭಿವೃದ್ಧಿಗೆ ಹೆಚ್ಚಿನ ಗಮನ ವಹಿಸಬೇಕು ಎಂದು ಆಗ್ರಹಿಸದರು.
ಸುದ್ದಿಗೋಷ್ಠಿಯಲ್ಲಿ ಮಹೇಶ ಕಟ್ಟಿಮನಿ, ಶರಣರೆಡ್ಡಿ, ಹರೀಶ ಸೇರಿದಂತೆ ಇನ್ನಿತರರಿದ್ದರು.