ಸಮಸ್ಯೆಗಳ ಪರಿಹಾರಕ್ಕೆ ವಿಭಾಗೀಯ ಕರವೇ ಸಭೆ

ಯಾದಗಿರಿ: ಕಲ್ಬುರ್ಗಿಯಲ್ಲಿ ಆರಂಭಗೊಂಡ ವಿಮಾನ ನಿಲ್ದಾಣಕ್ಕೆ ಸರ್ವ ಜನಾಂಗದವರಿಗೂ ಪೂಜ್ಯರಾಗಿರುವ ಆದ್ಯರಾಗಿರುವ ಕಲ್ಯಾಣ ಕರ್ನಾಟಕವು ಶರಣರ ನಾಡು ಆಗಿರುವುದರಿಂದ ವಿಮಾನ ನಿಲ್ದಾಣಕ್ಕೆ ಬಸವೇಶ್ವರರ ಹೆಸರು ಇಡುವುದು ಸೂಕ್ತ ಹಾಗೂ ಸಮಂಜಸ ಎಂದು ಕರ್ನಾಟಕ ರಕ್ಷಣಾ ವೇದಿಕೆ ಜಿಲ್ಲಾಧ್ಯಕ್ಷ ಟಿ.ಎನ್. ಭೀಮನಾಯಕ ಹೇಳಿದರು.

ನಗರದ ಕರವೇ ಜಿಲ್ಲಾ ಕಾರ್ಯಾಲಯದಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಕಲ್ಯಾಣ ಕರ್ನಾಟಕದ ಭಾಗವೆಂದರೆ ಕರುನಾಡು, ಶರಣರ ಬೀಡು ಆಗಿದೆ ಅಲ್ಲದೇ ಎಲ್ಲ ಜಾತಿ ಸಮುದಾಯದವರನ್ನು ಒಗ್ಗೂಡಿಸಿ ೧೨ನೇ ಶತಮಾನದಲ್ಲಿಯೇ ಕರುನಾಡನ್ನು ಕಲ್ಯಾಣವಾಗಿಸಿದ ಬಸವಣ್ಣನವರ ಹೆಸರು ನಾಮಕರಣ ಸೂಕ್ತ ಎಂಬುದನ್ನು ಸರ್ಕಾರ ಮನಗಾಣಬೇಕು. ನಾಮಕರಣ ವಿವಾದ ಬೆಳೆಸುವ ಬದಲಿಗೆ ಬಸವಣ್ಣನವರ ಹೆಸರು ಇಟ್ಟು ಸಮಸ್ಯೆಗೆ ಇತಿಶ್ರೀ ಹಾಡಬೇಕೆಂದು ಒತ್ತಾಯಿಸಿದರು.

ಜಿಲ್ಲೆಯ ಅಭಿವೃದ್ಧಿಯೇ ಮಾನದಂಡವಾಗಿಸಿಕೊಳ್ಳುವ ಹಿನ್ನೆಲೆಯಲ್ಲಿ ಕರವೇ ಕಲ್ಯಾಣ ಕರ್ನಾಟಕ ವಿಭಾಗ ಮಟ್ಟದ ಸಭೆಯನ್ನು ಯಾದಗಿರಿಯಲ್ಲಿ ಹಮ್ಮಿಕೊಳ್ಳಲಾಗಿದ್ದು ರಾಜ್ಯಾಧ್ಯಕ್ಷ ನಾರಾಯಣಗೌಡರು ಬೆಳಗ್ಗೆ ಹೈದ್ರಾಬಾದ ಮಾರ್ಗವಾಗಿ ನಗರಕ್ಕೆ ಬೆಳಗ್ಗೆ ಆಗಮಿಸಲಿದ್ದು ೧೧ಕ್ಕೆ ವಿದ್ಯಾ ಮಂಗಲ ಕಾರ್ಯಾಲಯದಲ್ಲಿ ಜರುಗುವ ಸಭೆಯಲ್ಲಿ ಪಾಲ್ಗೊಳ್ಳಲಿದ್ದಾರೆ.

ಸಭೆಯಲ್ಲಿ ಜಿಲ್ಲೆಯ ಹಾಗೂ ಕಲ್ಯಾಣ ಕರ್ನಾಟಕದ ಸಮಸ್ಯೆಗಳ ಕುರಿತು ಚರ್ಚಿಸಲಾಗುವುದು ಅಲ್ಲದೇ ಸಂಘಟನೆ ಬಲಪಡಿಸಲು ರೂಪುರೇಷೆ ಸಿದ್ಧಪಡಿಸಲಾಗುತ್ತದೆ ಎಂದು ಅವರು ವಿವರಿಸಿದರು.  ಸಧ್ಯ ಜಿಲ್ಲೆಯಾಗಿ ೧೦ ವರ್ಷಗಳಾಗುತ್ತಿದ್ದರೂ ಅಭಿವೃದ್ದಿ ನಿರೀಕ್ಷಿತ ವೇಗ ಪಡೆದುಕೊಂಡಿಲ್ಲ. ಈ ಕುರಿತು ಮುಂದಿನ ಹೋರಾಟದ ರೂಪುರೇಷೆ ಸಿದ್ಧಪಡಿಸಲಾಗುವುದು ಇದಕ್ಕೆ ರಾಜ್ಯಾಧ್ಯಕ್ಷರ ಮಾರ್ಗದರ್ಶನ ಪಡೆಯಲಾಗುವುದು ಎಂದು ಅವರು ತಿಳಿಸಿದರು.

ನಗರದಲ್ಲಿ ಶುದ್ಧ ಕುಡಿವ ನೀರು ಪೂರೈಕೆಗೆ ಜಾಕವೆಲ್ ಸ್ಥಳಾಂತರ ಕಾಮಗಾರಿಗೆ ವೇಗ ನೀಡಬೇಕು, ಬೀದಿದೀಪಗಳು ಸರಿಯಾಗಿ ಕೆಲಸ ಮಾಡದೇ ಇರುವುದರಿಂದ ನಗರ ಕತ್ತಲಲ್ಲಿ ಮುಳುಗಿಯೇ ಇರುವುದನ್ನು ಹೋಗಲಾಡಿಸಬೇಕು,

ಯಾದಗಿರಿ ಜಿಲ್ಲೆಯಾಗಿ ೧೦ ವರ್ಷಗಳೇ ಕಳೆದರೂ ಜಿಲ್ಲಾ ಕೇಂದ್ರದಲ್ಲಿ ಇನ್ನು ಹಲವು ರೈಲುಗಳ ನಿಲುಗಡೆಯಾಗುತ್ತಿಲ್ಲ ರೈಲುಗಳ ನಿಲುಗಡೆಗೆ ಒತ್ತಡ ಹೇರುವುದು, ಅಲ್ಲದೇ ಜಿಲ್ಲೆಯ ಅಭಿವೃದ್ದಿ ಮಾಡಬೇಕಾದ ಜಿಲ್ಲಾ ಉಸ್ತುವಾರಿ ಸಚಿವರು ಅತಿಥಿಗಳಂತಾಗಿದ್ದು ಅವರನ್ನು ಬದಲಿಸಿ ಜಿಲ್ಲೆಯ ಶಾಸಕರೊಬ್ಬರನ್ನು ತಕ್ಷಣ ಮಂತ್ರಿ ಮಾಡಿ ಅವರಿಗೆ ಸಚಿವ ಸ್ಥಾನ ನೀಡಬೇಕು, ಅಭಿವೃದ್ದಿ ಬಗ್ಗೆ ನಿರ್ಲಕ್ಷ್ಯ ತಳೆದಿರುವ ಜಿಲ್ಲಾಧಿಕಾರಿಗಳನ್ನೂ ಸಹ ಬದಲಾಯಿಸಿ ದಕ್ಷ ಹಾಗು ಅಬಿವೃದ್ದಿ ಪರ ಜಿಲ್ಲಾಧಿಕಾರಿಗಳನ್ನು ನೇಮಿಸಬೇಕು ಎಂದು ಅವರು ಇದೇ ಸಂದರ್ಭದಲ್ಲಿ ಒತ್ತಾಯಿಸಿದರು.

ಈ ಸಂದರ್ಭದಲ್ಲಿ ಮಲ್ಲು ಮಾಳಿಕೇರಿ, ಭೀಮಾಶಂಕರ ಹತ್ತಿಕುಣಿ, ವಿಶ್ವಾರಾಧ್ಯ ದಿಮ್ಮೆ, ಸಿದ್ದು ನಾಯಕ ಹತ್ತಿಕುಣಿ, ತೇಜರಾಜ ರಾಠೋಡ, ರಾಜು  ಚವ್ಹಾಣ, ಮಲ್ಲು ದೇವಕರ್ ಇನ್ನಿತರರು ಇದ್ದರು.