40ನೇ ಶರಣಕಮ್ಮಟ ಹಾಗೂ ಅನುಭವಮಂಟಪ ಉತ್ಸವ-2019 ಉದ್ಘಾಟನೆ

ಬಸವಕಲ್ಯಾಣ: ಬಸವಕಲ್ಯಾಣ ಅನುಭವಮಂಟಪ ಪರಿಸರದಲ್ಲಿ ನಿರ್ಮಿಸಿದ ಪಂಡಿತ ಬಸವರಾಜ ರಾಜಗುರು ಮಹಾದ್ವಾರ ಮತ್ತು ಪಂಡಿತ ಮಲ್ಲಿಕಾರ್ಜುನ ಮನಸೂರು ವೇದಿಕೆಯಲ್ಲಿ ಆಯೋಜಿಸಲಾದ ೪೦ನೇ ಶರಣಕಮ್ಮಟ ಹಾಗೂ ಅನುಭವಮಂಟಪ ಉತ್ಸವ-೨೦೧೯ ಉದ್ಘಾಟನೆ ಮತ್ತು ಡಾ. ಚನ್ನಬಸವ ಪಟ್ಟದ್ದೇವರ ಅನುಭವಮಂಟಪ ಪ್ರಶಸ್ತಿ ಪ್ರದಾನ  ಸಮಾರಂಭ ಜರುಗಿತು.

ದಿವ್ಯಸನ್ನಿಧಾನವಹಿಸಿದ ಬೆಂಗಳೂರು ಬೇಲಿಮಠದ ಪೂಜ್ಯ ಶಿವರುದ್ರ ಮಹಾಸ್ವಾಮಿಗಳು ಬಸವಾದಿ ಶರಣರ ವಚನಗಳ ಆಶಯದಂತೆ ಬದುಕಬೇಕೆಂದು ಸೂಚಿಸಿದರು. ಅನುಭವಮಂಟಪ ಅಧ್ಯಕ್ಷ ಪೂಜ್ಯ ಡಾ.ಬಸವಲಿಂಗ ಪಟ್ಟದ್ದೇವರು ತಮ್ಮ ಸದಾಶಯ ನುಡಿಗಳಲ್ಲಿ ಅನುಭವಮಂಟಪ ಅಂತರ್‌ರಾಷ್ಟ್ರೀಯ ಮಟ್ಟದಲ್ಲಿ ಹೆಸರು ಪಡೆಯಬೇಕು. ಆ ನಿಟ್ಟಿನಲ್ಲಿ ನಾವೆಲ್ಲ ಶ್ರಮಿಸಬೇಕು ಎಂದರು. ನೇತೃತ್ವ ವಹಿಸಿದ ಹಾರಕೂಡ ಸಂಸ್ಥಾನ ಹಿರೇಮಠದ ಪೂಜ್ಯ ಡಾ.ಚನ್ನವೀರ ಶಿವಾಚಾರ್ಯ ಮಹಾಸ್ವಾಮಿಗಳವರಿಗೆ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪಡೆದುದ್ದಕ್ಕಾಗಿ ಸನ್ಮಾನಿಸಲಾಯಿತು.

ಪ್ರಸಕ್ತ ಸಾಲಿನ ಡಾ.ಚನ್ನಬಸವ ಪಟ್ಟದ್ದೇವರು ಅನುಭವಮಂಟಪ ಪ್ರಶಸ್ತಿ ಸ್ವೀಕರಿಸಿ, ಮನಗುಂಡಿ ಶ್ರೀ ಗುರುಬಸವಮಹಾಮನೆಯ ಪೂಜ್ಯ ಬಸವಾನಂದ ಮಹಾಸ್ವಾಮಿಗಳು ಇಲ್ಲಿ ನಡೆಯುವ ಸಮಾರಂಭಗಳಲ್ಲಿ ಸಣ್ಣ ದೋಷವು ಇರಲಾರದಂತೆ ಕಾರ್ಯಕ್ರಮ ರೂಪಿಸಬೇಕು. ಎಲ್ಲರನ್ನು ಆಕರ್ಷಿಸುವಂತಾಗಬೇಕು ಎಂದರು. ಅನುಭಾವ ನೀಡಿದ ಹಿರಿಯ ಸಾಹಿತಿ ಗೊ.ರು.ಚನ್ನಬಸಪ್ಪನವರು ಬಸವಾದಿ ಶರಣರು ಕಟ್ಟ ಬಯಸಿದ ಅನುಭವಮಂಟಪದ ಸಂಭ್ರಮ ಮತ್ತೊಮ್ಮೆ ನಾವು ನೋಡುವಂತಾಗಲಿ ಎಂದರು.

ಕರ್ನಾಟಕ ಸರಕಾರ ಪಶು ಸಂಗೋಪನಾ ಸಚಿವರ ಪ್ರಭು ಚವ್ಹಾಣ ಸಮಾರಂಭವನ್ನು ಉದ್ಘಾಟಿಸಿ, ಪೂಜ್ಯರ ಆಶಯಗಳಿಗೆ ಸ್ಪಂದಿಸುವುದಾಗಿ ತಿಳಿಸಿದರು. ಯುಗಪ್ರವರ್ತಕ ಗ್ರಂಥ ಮತ್ತು ಲಿಂಗಾಯತ ದಿನದರ್ಶಿಕೆ ಬಿಡುಗಡೆಗೊಳಿಸಲಾಯಿತು. ಆರಂಭದಲ್ಲಿ ಬಸವಕಲ್ಯಾಣ ಅಭಿವೃದ್ಧಿ ಮಂಡಳಿ ಆಯುಕ್ತ ಶರಣಬಸಪ್ಪ ಕೊಟ್ಟಪ್ಪಗೋಳ ಷಟ್‌ಸ್ಥಲ ಧ್ವಜಾರೋಹಣ ನೆರವೇರಿಸಿದರು. ಚಂದ್ರಕಾಂತ ಬೆಲ್ಲದ ಅವರು ಮಹಾದ್ವಾರ ಉದ್ಘಾಟಿಸಿದರು. ಡಾ.ಪಂ.ವೀರಭದ್ರಪ್ಪ ಗಾದಗಿ ವೇದಿಕೆ ಉದ್ಘಾಟಿಸಿದರು. ಮುಖ್ಯ ಅತಿಥಿಗಳಾಗಿ ಬೀದರ ಸಂಸದ ಭಗವಂತ ಖೂಬಾ, ಕಲಬುರಗಿ ಸಂಸದ ಉಮೇಶ ಜಾಧವ, ಸೇಡಂ ಶಾಸಕ ರಾಜಕುಮಾರ ತೇಲಕೂರು, ಬೀದರ ಎಂ.ಎಲ್.ಸಿ. ರಘುನಾಥ ಮಲ್ಕಾಪೂರೆ ಇದ್ದರು.

ಅತಿಥಿಗಳಾಗಿ ಭಾಲ್ಕಿ ಮಾಜಿ ಶಾಸಕ ಪ್ರಕಾಶ ಖಂಡ್ರೆ, ಸುಭಾಷ ಕಲ್ಲೂರು, ಬಾಬು ವಾಲಿ, ಗುರುನಾಥ ಕೊಳ್ಳುರು, ಶಾಲಿನಿ ವಾಡೇಕರ, ಅನೀಲ ರಗಟೆ, ಬಸವರಾಜ ಬಾಲಕೀಲೆ, ಬಿ.ಗುರುಪ್ರಸಾದ ಮುಂತಾದವರು ಇದ್ದರು. ಡಾ.ಎಸ್.ಬಿ.ದುರ್ಗೆ ಬಸವಗುರುಪೂಜೆ ನೆರವೇರಿಸಿದರು. ರೇಖಾ ಅಪ್ಪಾರಾವ ಸೌದಿ ರಾಜಕುಮಾರ ಹೂಗಾರ, ರಾಮಚಂದ್ರ ಕಲ್ಲಹಿಪ್ಪರ್ಗಿ ಅವರಿಂದ ವಚನ ಸಂಗೀತ ನಡೆಯಿತು. ಸ್ವಾಗತ ಸಮಿತಿ ಕಾರ್ಯಾಧ್ಯಕ್ಷ ಧನರಾಜ ತಾಳಂಪಳ್ಳಿ ಸ್ವಾಗತಿಸಿದರು. ನೂಪುರ ನೃತ್ಯ ಅಕಾಡೆಮಿ ಬೀದರ ತಂಡದವರಿಂದ ಪ್ರದರ್ಶನಗೊಂಡ ನೃತ್ಯ ಗಮನ ಸೆಳೆಯಿತು. ೭೭೦ ವಿದ್ಯಾರ್ಥಿಗಳಿಂದ ವಚನ ಹಾಗೂ ಗೀತಗಾಯನದೊಂದಿಗೆ ಸಮಾರಂಭ ಆರಂಭಗೊಂಡಿತ್ತು. ಆಕಾಶವಾಣಿ ಕಲಾವಿದ ನವಲಿಂಗ ನಿರೂಪಿಸಿದರು. ದೇವೇಂದ್ರ ಖಾದೆಪೂರ ವಂದಿಸಿದರು. ಬಸವಕಲ್ಯಾಣ ಶ್ರೀ ಬಸವೇಶ್ವರ ದೇವಸ್ಥಾನ ಕಮೀಟಿ ವತಿಯಿಂದ ಮಹಾಪ್ರಸಾದ ವ್ಯವಸ್ಥೆ ಮಾಡಲಾಗಿತ್ತು.