ಬರಹದಂತೆ ಬದುಕಿದವರು ಬಂಡಾಯ ಸಾಹಿತಿ ಡಾ.ವಾಲೀಕಾರ: ತೇಗಲತಿಪ್ಪಿ ಅಭಿಮತ

ಕಲಬುರಗಿ: ಕನ್ನಡ ಸಾಹಿತ್ಯ ಲೋಕದಲ್ಲಿ ಅಣ್ಣನವರೆಂದೆ ಕರೆಯಲ್ಪಡುತ್ತಿದ್ದ ಹಿರಿಯ ಬಂಡಾಯ ಸಾಹಿತಿ ಡಾ.ಚೆನ್ನಣ್ಣಾ ವಾಲೀಕಾರ ರವರು ಕೆಂಪಂಗಿ ಧರಿಸುವ ಮೂಲಕ ಅಸಮಾನತೆಯ ವಿರುದ್ಧ ಧ್ವನಿ ಎತ್ತುವ ಮೂಲಕ ಬಂಡಾಯಗಾರರಾಗಿ ಗುರಿಸಿಕೊಂಡರೂ ಅವರ ಹೃದಯದಲ್ಲಿ ಮಾತ್ರ ಹರಿದಿದ್ದುಆನವ ಪ್ರೇಮ ಸಾಗರ ಎಂದು ಹಿರಿಯ ಕಥೆಗಾರ ಸಿದ್ಧರಾಮ ಹೊನ್ಕಲ್ ಅಭಿಪ್ರಾಯಪಟ್ಟರು.

ವಿಶ್ವಜ್ಯೋತಿ ಪ್ರತಿಷ್ಠಾನದ ವತಿಯಿಂದ ನಗರದ ಬಸವೇಶ್ವರ ಪುತ್ಥಳ್ಳಿ ಆವರಣದಲ್ಲಿ ಹಮ್ಮಿಕೊಂಡ ಹಿರಿಯ ಬಂಡಾಯ ಸಾಹಿತಿ ದಿವಂಗತ ಡಾ.ಚೆನ್ನಣ್ಣಾ ವಾಲೀಕಾರ ಅವರಿಗೆ ನಡೆದ ಭಾವಪೂರ್ಣ ಶ್ರದ್ಧಾಂಜಲಿ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಅವರು ಮಾತನಾಡಿದರು.

ಪ್ರತಿಷ್ಠಾನದ ಸಂಸ್ಥಾಪಕರೂ ಆದ ಸಾಂಸ್ಕೃತಿಕ ಸಂಘಟಕ ವಿಜಯಕುಮಾರ ತೇಗಲತಿಪ್ಪಿ ಮಾತನಾಡಿ, ಸಮಾಜದ ಪ್ರತಿಯೊಬ್ಬರನ್ನು ಮುಖ್ಯ ವಾಹಿನಿಗೆ ತರಬೇಕೆಂಬ ಆಶಯ ಹೊಂದಿದ ವಿಶಿಷ್ಟ ಕವಿಯಾಗಿದ್ದ ಚೆನ್ನಣ್ಣ ನವರು ಸಮಾನತೆಗಾಗಿ ಹಂಬಲಿಸುತ್ತಾ ತಳಸಮುದಾಯಕ್ಕೆ ತಲೆ ಎತ್ತಿ ಬದುಕುವಂತೆ ಕರೆ ಕೊಟ್ಟಿದ್ದ ಸಾಹಿತ್ಯ ಹೋರಾಟಗಾರ ಹಾಗೂ ಯಾವುದೇ ಗೊಂದಲಗಳಿಲ್ಲದ ಸುಂದರವಾಗಿ ಮಿನುಗಿದ ನಕ್ಷತ್ರ ಡಾ.ಚೆನ್ನಣ್ಣಾ ವಾಲೀಕಾರ ರವರಾಗಿದ್ದಾರೆ. ಸಾಹಿತ್ಯ ಕ್ಷೇತ್ರದಲ್ಲಿ ಜನಪರ ನಿಲುವುನ್ನು ಹೊಂದಿದ ಚೆನ್ನಣ್ಣಾ ನವರು, ಯುವಕರನ್ನು ಕೂಡ ತನ್ನೊಂದಿಗೆ ಕರೆದುಕೊಂಡು ಹೋಗುವ ವಿಶಿಷ್ಟ ಗುಣ ಹೊಂದಿದ್ದರು ಎಂದು ಭಾವಪೂರ್ಣವಾಗಿ ಹೇಳಿದರು.

ವಾಗ್ಮಿ ಡಾ.ಕೆ.ಗಿರಿಮಲ್ಲ ಮಾತನಾಡಿ, ನುಡಿದಂತೆ ನಡೆದು ಬರಹ ಹಾಗೂ ಬದುಕಿನ ನಡುವೆ ಸಾಮಿಪ್ಯ ಸಾಧಿಸಿದ ಅಪರೂಪದ ಸಾಹಿತಿ. ಅನೇಕ ಯುವ ಬರಹಗಾರರ ಗುರುಗಳಾಗಿ ಬೆನ್ನು ತಟ್ಟಿದ್ದ ಶ್ರೇಷ್ಠ ವ್ಯಕ್ತಿತ್ವ ಅಣ್ಣ ಚೆನ್ನಣ್ಣಾ ನವರದು. ಅವರ ಅಗಲಿಕೆ ಸಾಹಿತ್ಯ ಕ್ಷೇತ್ರಕ್ಕೆ ತುಂಬಲಾರದ ನಷ್ಟವಾಗಿದೆ ಎಂದರು.

ಕರ್ನಾಟಕ ಜಾನಪದ ಅಕಾಡೆಮಿ ಸದಸ್ಯ ಡಾ.ರಾಜೇಂದ್ರ ಯರನಾಳೆ, ಪತ್ರಕರ್ತ-ಸಾಹಿತಿ ಪ್ರಭಾಕರ ಜೋಶಿ, ಪ್ರಮುಖರಾದ ರವೀಂದ್ರ ಶಾಬಾದಿ, ಡಾ,ಬಿ.ಸಂದೀಪ, ಹೋರಾಟಗಾರ ಸಚೀನ್ ಫರಹತಾಬಾದ, ರವೀಂದ್ರಕುಮಾರ ಭಂಟನಳ್ಳಿ, ನಾಗಲಿಂಗಯ್ಯಾ ಮಠಪತಿ, ಶಿವಾನಂದ ಮಠಪತಿ, ನೀಲಾಂಬಿಕಾ ಚೌಕಿಮಠ, ಬಸವರಾಜ ತೋಟದ, ಸಂಗಯ್ಯಾ ಹಳ್ಳದಮಠ, ಮಹಾಂತೇಶ ಕಲಬುರಗಿ, ಪ್ರಭುಲಿಂಗ ಯಳವಂತಗಿ, ಪ್ರಭುಲಿಂಗ ಮೂಲಗೆ, ಎಂ.ಬಿ.ಅಂಬಲಗಿ, ಎಸ್.ಎಂ.ಪಟ್ಟಣಕರ್, ಹಣಮಂತ ಅಟ್ಟೂರ, ಶಿವಶರಣ ಕುಸನೂರ, ವಿಶ್ವನಾಥ ತೊಟ್ನಳ್ಳಿ, ಶ್ರೀಕಾಂತ ಪಾಟೀಲ ತಿಳಗೂಳ, ಭಗವಂತ ಹೊನ್ನಕಿರಣಗಿ ಸೇರಿದಂತೆ ಅನೇಕ ಜನಪರ ಹೋರಾಟಗಾರರು, ಸಾಹಿತಿಗಳು ಭಾಗವಹಿಸಿದ್ದರು.