85 ನೇ ಕನ್ನಡ ಸಾಹಿತ್ಯ ಸಮ್ಮೇಳನ: ಸೂಕ್ತ ವೈದ್ಯಕೀಯ ಸೇವೆಗೆ ಶಾಸಕ ಗುತ್ತೇದಾರ ಸೂಚನೆ

ಕಲಬುರಗಿ: ನಗರದಲ್ಲಿ ನಡೆಯಲಿರುವ ೮೫ನೇ ಕನ್ನಡ ಸಾಹಿತ್ಯ ಸಮ್ಮೇಳನದಲ್ಲಿ ಯಾವುದೇ ರೀತಿಯ ವೈದ್ಯಕೀಯ ಸೇವೆಯಲ್ಲಿ ವ್ಯತ್ಯ ಉಂಟಾಗಬಾರದು ಎಂದು ಸಾಹಿತ್ಯ ಸಮ್ಮೇಳನದ ಅರೋಗ್ಯ ಸಮಿತಿಯ ಅಧ್ಯಕ್ಷ ಆಳಂದ ಶಾಸಕ ಸುಭಾಷ್ ಗುತ್ತೇದಾರ ಹೇಳಿದರು.

ನಗರದ ಜಿಮ್ಸ್ ಆವರಣದ ಸಭಾಂಗಣದಲ್ಲಿ ಗುರುವಾರ ಜರುಗಿದ ಆರೋಗ್ಯ ಸಮಿತಿಯ ೨ನೇ ಪೂರ್ವಭಾವಿ ಸಭೆಯ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು. ಪ್ರತಿ ವೇದಿಕೆಯ ಹತ್ತಿರ ಒಂದೊಂದು ಔಷಧಾಲಯ ತೆರೆಯಬೇಕು ಅಲ್ಲಿ ಎಲ್ಲ ರೀತಿಯ ವೈದ್ಯಕೀಯ ಉಪಕರಣಗಳು, ಔಷಧಿಗಳೊಂದಿಗೆ, ನಾಲ್ಕಾರು ಜನ ಪರಿಣಿತ ವೈದ್ಯರು, ಶೂಶ್ರುಷಕರು ಇದ್ದು ನಿಗಾ ಇಡಬೇಕು ಮೇಲಾಗಿ ತುರ್ತು ಅವಶ್ಯಕತೆ ಇದ್ದವರಿಗೆ ಸಕಾಲಿಕ ಚಿಕಿತ್ಸೆ ನೀಡುವಂತಾಗಬೇಕು ಎಂದು ಹೇಳಿದರು.

ಸಮ್ಮೇಳನ ಜರುಗುವ ಪ್ರಮುಖ ಆವರಣದಲ್ಲಿ ಎರಡು ಮೊಬೈಲ್ ಆಂಬುಲೆನ್ಸ್ ಕಾರ್ಯಾಚಾರಣೆ ಮಾಡಲು ಸೂಚಿಸಿದರು. ನಗರದ ಎಲ್ಲ ಆಸ್ಪತ್ರೆಗಳಲ್ಲಿ ಸಮ್ಮೇಳನಕ್ಕಾಗಿ ಬರುವವರಿಗಾಗಿಯೇ ವಿಶೇಷ ವಾರ್ಡ ತೆರೆದು ಅವರಿಗಾಗಿ ಮೀಸಲು ಇಡಬೇಕು. ಸಮ್ಮೇಳನ ಅಧ್ಯಕ್ಷರು ತಂಗುವ ಸ್ಥಳದಲ್ಲಿ ಪ್ರತ್ಯೇಕ ವೈದ್ಯಕೀಯ ಸಿಬ್ಬಂದಿ ಹಾಗೂ ಪರಿಣಿತ ಶೂಶ್ರುಷಕರನ್ನು ನೇಮಿಸಲು ವ್ಯವಸ್ಥೆ ಮಾಡಬೇಕು ಎಂದು ಸಲಹೆ ನೀಡಿದರು.

ಸಭೆಯಲ್ಲಿ ಕ.ಸಾ.ಪ ಗೌರವ ಕಾರ್ಯದರ್ಶಿ ಮಡಿವಾಳಪ್ಪ ನಾಗರಹಳ್ಳಿ, ಜಿಲ್ಲಾ ಆರೋಗ್ಯ ಅಧಿಕಾರಿ ಡಾ. ರುದ್ರವಾಡಿ, ಜಿಮ್ಸ್ ಮುಖ್ಯಸ್ಥೆ, ಡಾ. ಅಮೂಲ ಪತಂಗೆ, ಕ.ಸಾ.ಪ ಉತ್ತರ ವಲಯ ಅಧ್ಯಕ್ಷ ಲಿಂಗರಾಜ ಸಿರಗಾಪೂರ, ದಾಸಿಮಯ್ಯ ವಡ್ಡನಕೇರೆ, ಬಾಬಾ ಫಕ್ರುದ್ದೀನ್ ಸೇರಿದಂತೆ ಸಮಿತಿ ಸದಸ್ಯರು ಹಾಜರಿದ್ದರು.