ಕಲಬುರಗಿಯಲ್ಲಿ ಚಿತ್ರ ಸಂತೆಗೆ ಚಾಲನೆ

ಕಲಬುರಗಿ: ಇಲ್ಲಿನ ವಿಕಾಸ ಅಕಾಡೆಮಿ, ಗುಲ್ಬರ್ಗ ವಿವಿ, ಕರ್ನಾಟಕ ಕೇಂದ್ರೀಯ ವಿವಿ, ಚೈತನ್ಯಮಯಿ ಟ್ರಸ್ಟ್, ದೃಶ್ಯ ಬೆಳಕು ಸಾಂಸ್ಕೃತಿಕ ಸಂಸ್ಥೆ ಹೈಕ ಶಿಕ್ಷಣ ಸಂಸ್ಥೆ ಹಾಗೂ ಹೈಕ ವಾಣಿಜ್ಯ ಕೈಗಾರಿಕಾ ಸಂಸ್ಥೆ ಆಶ್ರಯದಲ್ಲಿ ಪ್ರತಿ ವರ್ಷ ನಡೆಯುವಂತೆ ಈ ಬಾರಿಯೂ ಇಂದು ಚಿತ್ರ ಸಂತೆಗೆ ಚಾಲನೆ ನೀಡಲಾಯಿತು.

ಮಹಾನಗರ ಪಾಲಿಕೆಯ ಸಾರ್ವಜನಿಕ ಉದ್ಯಾನದಲ್ಲಿ ನಡೆದ ಈ ಕಾರ್ಯಕ್ರಮವನ್ನು ಜಿಲ್ಲಾಧಿಕಾರಿ ಬಿ. ಶರತ್ ಉದ್ಘಾಟಿಸಿದರು. ಶಾಸಕ ದತ್ತಾತ್ರೇಯ ಪಾಟೀಲ ರೇವೂರ ಅಧ್ಯಕ್ಷತೆ ವಹಿಸಿದ್ದರು.

ನಾವು ಸಾಮಾನ್ಯವಾಗಿ ತರಕಾರಿ ಮಾರಾಟ, ದನಗಳ ಮಾರಾಟ, ಬಟ್ಟೆ ಬರೆಗಳ ಮಾರಾಟದ ಸಂತೆ ನೋಡಿದ್ದೇವೆ. ಆದರೆ ಚಿತ್ರಗಳ ಮಾರಾಟ ಮತ್ತು ಪ್ರದರ್ಶನದ ಸಂತೆ ಕಲಬುರಗಿಯಲ್ಲಿ ನಡಡಯುತ್ತಿರುವುದು ಸಂತಸದ ಸಂಗತಿ ಎಂಬುದು ಕಲಾಸಕ್ತರ ಅನಿಸಿಕೆಯಾಗಿತ್ತು.

ಗುಲ್ಬರ್ಗ ವಿವಿ ಕುಲಪತಿ ಪ್ರೊ.‌ದೇವಿದಾಸ ಮಾಲೆ, ಚೇಂಬರ್ ಆಫ್ ಕಾಮರ್ಸ್ ಅಧ್ಯಕ್ಷ ಅಮರನಾಥ ಪಾಟೀಲ ಇತರರು ಮುಖ್ಯ ಅತಿಥಿಗಳಾಗಿ ಆಗಮಿಸಿದ್ದರು.

ಈ ಚಿತ್ರ ಸಂತೆಯನ್ನು ಕಳೆದ ಏಳು ವರ್ಷಗಳಿಂದ ಆಯೋಜಿಸಿಕೊಂಡು ಬರಲಾಗುತ್ತಿದ್ದು, ನೆರೆಯ ಬೀದರ್, ಯಾದಗಿರಿ, ರಾಯಚೂರು ಹಾಗೂ ಕಲಬುರಗಿ ಜಿಲ್ಲೆಗಳ ವಿವಿಧ ಕಲಾವಿದರು ಹಾಗೂ ಅವರು ರಚಿಸಿದ ಕಲಾಕೃತಿಗಳ ಪ್ರದರ್ಶನ ಮತ್ತು ಮಾರಾಟದ ವ್ಯವಸ್ಥೆ ಮಾಡಲಾಗಿದೆ.

ಕಾರ್ಪೋರೇಷನ್ ಕಾಂಪೌಂಡ ಬಳಿ ಇರುವ ಕಟ್ಟೆ, ಇಂದಿರಾ ಸ್ಮಾರಕ ಭವನ, ಗಾಂಧಿ ಪುತ್ಥಳಿ, ಜಗಜೀವನರಾಂ ಪುತ್ಥಳಿ ಸುತ್ತಲಿರುವ ಉದ್ಯಾನದುದ್ದಕ್ಕೂ ಮೈ ಚಾಚಿರುವ ಚಿತ್ರ ಸಂತೆಗೆ ಬೆಳಗ್ಗೆಯಿಂದಲೇ ನೂರಾರು ಜನರು ಆಗಮಿಸುತ್ತಿದ್ದು, ಕಲಾವಿದರು ತಮ್ಮ ಕಲಾಕೃತಿಗಳ ಪರಿಚಯ ಮತ್ತು ಮಾರಾಟದಲ್ಲಿ ತೊಡಗಿರುವುದು ಕಂಡು ಬಂದಿತು.

ಈ ಬಾರಿ ಒಟ್ಟು ೧೦೦ ಮಳಿಗೆಗಳು ರಿಜಿಸ್ಟರೇಷನ್ ಆಗಿದ್ದು, ಕಲಾಸಕ್ತರು ಬಂದು ವಿಉಕ್ಷಿಸುತ್ತಿರುವುದು ಖುಷಿ ಕೊಟ್ಟಿದೆ. ಆದರೆ ಕಲಾಕೃತಿಗಳ ಖರೀದಿ ಆಗಬೇಕೆನ್ನುತ್ತಾರೆ ಕಾರ್ಯಕ್ರಮದ ಆಯೋಜಕರಲ್ಲೊಬ್ಬರಾದ ಡಾ. ಎ.ಎಸ್. ಪಾಟೀಲ.

ಚಿತ್ರಸಂತೆ ನಿಮಿತ್ತ ಶಾಲಾ ಮಕ್ಕಳಿಗಾಗಿ ಚಿತ್ರಕಲಾ ಸ್ಪರ್ಧೆ ಆಯೋಜಿಸಿರುವುದರಿಂದ ವಿವಿಧ ಶಾಲೆಯ ಮಕ್ಕಳು ಪೆನ್ಸಿಲ್ ಹಾಗೂ ಡ್ರಾಯಿಂಗ್ ಸೀಟ್ ತೆಗೆದುಕೊಂಡು ಚಿತ್ರ ಬಿಡಿಸುವುದರಲ್ಲಿ ಮಗ್ನರಾಗಿರುವುದು ಕಂಡು ಬಂದಿತು.

ಇದೇವೇಳೆ ತಿಂಡಿ, ತಿನಿಸುಗಳ ಮಾರಾಟ ಕೂಡ ಭರ್ಜರಿಯಾಗಿ ನಡೆದಿದೆ. ಮುಖ್ಯ ವೇದಿಕೆಯಲ್ಲಿ ಕಾಲೇಜು ವಿದ್ಯಾರ್ಥಿ, ವಿದ್ಯಾರ್ಥಿನೀಯರು ಹಾಡು, ನೃತ್ಯದ ಮೂಲಕ ತಮ್ಮ ಪ್ರತಿಭಾ ಪ್ರದರ್ಶನ ಮಾಡುತ್ತಿರುವುದು ಕಂಡು ಬಂದಿತು.