ಭಾವಚಿತ್ರ ಮೆರವಣಿಗೆ ಸಾಕು, ವಿಚಾರಗಳ ಮೆರವಣಿಗೆ ಬೇಕು: ಸತ್ಯಂಪೇಟೆ

ಕಲಬುರಗಿ: ಮಹಾ ಮಾನವತಾವಾದಿ, ವಿಶ್ವಗುರು ಬಸವಣ್ಣನವರ ಜಯಂತಿ ಆಚರಣೆಯನ್ನು ಕೇವಲ ಭಾವಚಿತ್ರ ಮೆರವಣಿಗೆಗೆ ಸೀಮಿತಗೊಳಿಸದೆ ಅವರು ಸಾರಿದ ವಿಚಾರಗಳ ಮೆರವಣಿಗೆ ಮತ್ತು ಅನುಷ್ಠಾನದೆಡೆಗೆ ನಮ್ಮ ಗಮನವಿರಬೇಕು ಎಂದು ಪತ್ರಕರ್ತ, ಲೇಖಕ ಶಿವರಂಜನ್ ಸತ್ಯಂಪೇಟೆ ಅಭಿಪ್ರಾಯಪಟ್ಟರು.

ಅಫಜಲಪುರ ತಾಲೂಕಿನ‌ ತೆಲ್ಲೂರ್ ಗ್ರಾಮದಲ್ಲಿ ಇಂದು ಆಯೋಜಿಸಿದ್ದ ಲಿಂಗಾಯತ ಧರ್ಮ ಸಂಸ್ಥಾಪಕ, ವಿಶ್ವ ಸಂವಿಧಾನ ಶಿಲ್ಪಿ ಬಸವಣ್ಣನವರ 886 ನೇ ಜಯಂತ್ಯುತ್ಸವ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದರು.

ಗ್ರಾಮದ 50ಕ್ಕೂ ಹೆಚ್ಚು ಯುವಕರು ಬಸವಣ್ಣನವರ ಭಾಚಿತ್ರವಿರುವ ಟಿ ಶರ್ಟ್ ಧರಿಸುವ ಮೂಲಕ ನಾವು ಬಸವಣ್ಣನ ಹುಡುಗರು ಎಂಬುದನ್ನು ಪ್ರದರ್ಶಿಸಿದರು.

ಸಕಲ ಜೀವಾತ್ಮರಿಗೆ ಲೇಸ ಬಯಸಿದ ಮಹಾನ್ ಪುರುಷರ ಭಾವಚಿತ್ರವನ್ನು ವರ್ಷಕ್ಕೊಮ್ಮೆ ಮೆರೆಯಿಸಿ ಕೈ ತೊಳೆದುಕೊಳ್ಳುವ ಬದಲು ಅತ್ಯಂತ  ಅರ್ಥಪೂರ್ಣವಾಗಿ ಆಚರಿಸಬೇಕು ಎಂದು ತಿಳಿಸಿದರು. ಸಮಸ್ತ ಜೀವಕೋಟಿಯ ನೆಮ್ಮದಿಗೆ ತನ್ನನ್ನು ತಾನು ಸಮರ್ಪಿಸಿಕೊಂಡ ಬಸವಣ್ಣನವರ ಜಯಂತಿ ಕಾರ್ಯಕ್ರಮವನ್ನು ಮನುಷ್ಯತ್ವದಲ್ಲಿ ನಂಬಿಕೆ ಇಟ್ಟ ಯಾರಾದರೂ ಅವರ ತತ್ವಗಳ ಅನುಸರಿಸಲು, ಜಯಂತಿ ಆಚರಿಸಲು ಅವಕಾಶವಿದೆ ಎಂದು ಅಭಿಪ್ರಾಯಪಟ್ಟರು.

ಸಾನ್ನಿಧ್ಯ ವಹಿಸಿದ್ದ ಚಿಣಮಗೇರಿಯ ಸಿದ್ಧರಾಮ ಶಿವಾಚಾರ್ಯರು ಮಾತನಾಡಿ, ಜಾತಿ ರಹಿತ ಸಾಮಾಜ ಕಟ್ಟುವ ಕನಸು ಕಂಡಿದ್ದ ಬಸವಣ್ಣನವರು ಮಹಾನ್ ದಾರ್ಶನಿಕರಾಗಿದ್ದು, ಕಾಯಕವನ್ನು ಸ್ವರ್ಗಕ್ಕೇರಿಸಿದ ಕೀರ್ತಿ ಅವರಿಗೆ ಸಲ್ಲುತ್ತದೆ ಎಂದರು. ಮುಖ್ಯ ಅತಿಥಿಯಾಗಿದ್ದ ಜೆಡಿಎಸ್ ಪಕ್ಷದ ಮಹಾ ಪ್ರಧಾನ ಕಾರ್ಯದರ್ಶಿ ದೇವೇಗೌಡ ಪಾಟೀಲ ತೆಲ್ಲೂರ್ ಮಾತನಾಡಿ, ಗ್ರಾಮದ ಯುವಕರು ಸೇರಿ ಹಮ್ಮಿಕೊಂಡಿರುವ ಈ ಕಾರ್ಯಕ್ರಮ ಸಂಭ್ರದ ಜೊತೆಗೆ ಮುಂದಿನ ದಿನಗಳಲ್ಲಿ ಅರ್ಥಪೂರ್ಣತೆ ಪಡೆದುಕೊಳ್ಳಲಿದೆ ಎಂದು ಹೇಳಿದರು.

ಅತಿಥಿಯಾಗಿದ್ದ ಶರಣ ಅಮೃತಪ್ಪ ಗುಡ್ಡೇವಾಡಿ ಮಾತನಾಡಿ, ಬಸವಣ್ಣ ಅಪ್ಪಟ ವಾಸ್ತವವಾದಿ, ವಿಚಾರವಾದಿ ಅವರ ತತ್ವಾಚರಣೆಗಳಿಂದ ವೈಚಾರಿಕ, ಮನೋಭಾವನೆ ಮೂಡಲು ಸಾಧ್ಯ ಎಂದು ಹೇಳಿದರು. ಅಧ್ಯಕ್ಷತೆ ವಹಿಸಿದ್ದ ಹಿರಿಯ ವಕೀಲ ಎಚ್.ಎ. ಬಿರಾದಾರ ಮಾತನಾಡಿ, ಬಸವನ ಹೆಸರು ಧ್ಯಾನಕ್ಕೆ ಮೂಲ ಹೇಗೆಯೋ ಹಾಗೆಯೇ ಪ್ರಗತಿಗೂ ಮೂಲವಾಗಿದ್ದು, ಶರಣರು ಮನದ ಮಲಿನತೆ ತೊಳೆದವರು ಎಂದು ವಿವರಿಸಿದರು.

ಚಂದ್ರಕಾಂತ ನಿರಗುಡಿ ಪ್ರಾಸ್ತಾವಿಕ ಮಾತನಾಡಿದರು. ವಕೀಲರಾದ ವಿನೋದ ಜನವರಿ, ರಾಜಕುಮಾರ ಹುಲ್ಲೂರ, ಭೀಮಾಶಂಕರ, ಭೀಮರಾಯ ಪಾಟೀಲ, ಅಪ್ಪುಗೌಡ ಪಾಟೀಲ ಇತರರು ವೇದಿಕೆಯಲ್ಲಿದ್ದರು. ಸಂಜೆ ಗ್ರಾಮದ ಪ್ರಮುಖ ಬೀದಿಗಳಲ್ಲಿ ಬಸವಣ್ಣನವರ ಭಾವಚಿತ್ರದ ಮೆರವಣಿಗೆ ನಡೆಸಿದರು. ಗ್ರಾಮದ ಹಾಗೂ ಸುತ್ತಲಿನ ಗ್ರಾಮದ ಮುಖಂಡರು ಕಾರ್ಯಕ್ರಮದಲ್ಲಿ ಉಪಸ್ಥಿತರಿದ್ದರು.

ಈ ಸಂದರ್ಭದಲ್ಲಿ ಸಿದ್ದಲಿಂಗ ಪಾಟೀಲ, ಸಂಗಣ್ಣ ಬಿರಾದಾರ, ಶರಣಗೌಡ ಪಾಟೀಲ ಸೇರಿದಂತೆ ಹಲವರಿದ್ದರು.