ಕೊರೊನಾ ಎಫೆಕ್ಟ್‌ಗೆ ತರಕಾರಿ ಮಾರುಕಟ್ಟೆ ಶಿಫ್ಟ್

ಶಹಾಬಾದ: ನಗರದ ಭೆಂಡಿ ಬಜಾರ ಪ್ರದೇಶದಲ್ಲಿ ಕಳೆದ ಹಲವಾರು ವರ್ಷಗಳಿಂದ ನಡೆಯುತ್ತಿದ್ದ ತರಕಾರಿ ವ್ಯಾಪಾರಕ್ಕೆ ಶುಕ್ರವಾರ ಬ್ರೇಕ್ ಬಿದ್ದಿದ್ದು, ಸಂಪೂರ್ಣ ತರಕಾರಿ ಮಾರುಕಟ್ಟೆಯನ್ನು ಸರಕಾರಿ ಪ್ರೌಢ ಶಾಲೆಯ ಆವರಣಕ್ಕೆ ಶುಕ್ರವಾರ ಸ್ಥಳಾಂತರಿಸಲಾಗಿದೆ.

ರಾಜ್ಯದಲ್ಲಿ ಕರೋನಾ ವೈರಸ್ ಕೈಮೀರುತ್ತಿದ್ದು, ತಾಲೂಕ ಆಡಳಿತ, ನಗರ ಸಭೆ, ಪೊಲೀಸ್ ಇಲಾಖೆ ಹಾಗೂ ಶಾಸಕ ಬಸವರಾಜ ಮತ್ತಿಮಡು ಅವರೊಂದಿಗೆ ನಡೆಸಿದ ಸಭೆಯಲ್ಲಿ ಭೆಂಡಿ ಬಜಾರದಲ್ಲಿರುವ ತರಕಾರಿ ಮಾರುಕಟ್ಟೆ ಕಿರಿದಾಗಿದ್ದು, ಜನಸಂದಣಿ ಅಧಿಕವಾಗುತ್ತಿದ್ದುದರಿಂದ ಮುಂಜಾಗೃತ ಕ್ರಮವಾಗಿ ಪ್ರೌಢಶಾಲೆ ಆವಣರಕ್ಕೆ ತಾತ್ಕಾಲಿವಾಗಿ ಸ್ಥಳಾಂತರಿಸಲು ನಿರ್ಧರಿಸಲಾಗಿತ್ತು. ವ್ಯಾಪಾರಸ್ಥರು ಅಲ್ಲಿಗೆ ಹೋಗಲು ಒಪ್ಪದೆ ಇದ್ದಾಗ, ತಾಲೂಕ ಆಡಳಿತ ಕಡಕ್ ಎಚ್ಚರಿಕೆ ನೀಡಿದ್ದರಿಂದ ಅನಿವಾರ್ಯವಾಗಿ ಪ್ರೌಢಶಾಲೆಯ ಆವರಣದಲ್ಲಿ ಸ್ಥಳಾಂತರವಾಗಿದೆ.ನಗರ ಸಭೆಯಿಂದ ಹಾಕಿದ ಮಾರ್ಕೌಟ ಮಾಡಿದ ನಿಗದಿತ ಸ್ಥಳದಲ್ಲಿ ತರಕಾರಿ, ಹಣ್ಣುಗಳ ವ್ಯಾಪಾರ ನಡೆಸಿದರು. ಸಾರ್ವಜನಿಕರೂ ಹೆಚ್ಚಿನ ಜನರೂ ಬಂದರೂ ಅಂತರ ಕಾಯ್ದುಕೊಳ್ಳುವಷ್ಟು ಸ್ಥಳ ಇರುವದರಿಂದ ಯಾವುದೇ ತೊಂದರೆಯಾಗಲಿಲ್ಲ.

ಪಿಐ. ಅಮರೇಶ.ಬಿ, ಪಿಎಸ್‌ಐ ಮಹಾಂತೇಶ ಪಾಟೀಲ, ಪಿಎಸ್‌ಐ ಯಲ್ಲಮ್ಮಾ ಅವರ ನೇತೃತ್ವದಲ್ಲಿ ಶಾಲೆ ಆವರಣದಲ್ಲಿ ತರಕಾರಿ ಹೊತ್ತು ತಂದ ವಾಹನ ಹೊರತಾಗಿ ಯಾವುದೆ ವಾಹನ ಒಳಗೆ ಬಿಡದೆ, ರಸ್ತೆ ಪಕ್ಕದಲ್ಲಿ ವಾಹನ ಪಾರ್ಕಿಂಗ್ ವ್ಯವಸ್ಥೆ ಕಲ್ಪಿಸಿದ್ದರಿಂದ ಜನಸಂದಣಿ ಇಲ್ಲದೆ ಸುಸೂತ್ರವಾಗಿ ತರಕಾರಿ ವ್ಯಾಪಾರ ನಡೆಯಿತು. ಬೆಳಗ್ಗೆ ೭ ಗಂಟೆಯಿಂದ ೧೧ ಗಂಟೆ ವರೆಗೆ ತರಕಾರಿ, ಹಣ್ಣು, ದಿನಸಿ ವ್ಯಾಪಾರಕ್ಕೆ ವ್ಯವಸ್ಥೆ ಕಲ್ಪಿಸಲಾಗಿತ್ತು.