ವೈದ್ಯರು ಕೊರೊನಾ ಯುದ್ಧದ ಸೈನಿಕರು: ಎಐಡಿಎಸ್‌ಒ

ವಾಡಿ: ಕೊರೊನಾ ಯುದ್ಧದ ಹೋರಾಟದಲ್ಲಿ ಸೈನಿಕರಾಗಿ ಸೇವೆ ಸಲ್ಲಿಸುತ್ತಿರುವ ವೈದ್ಯರು, ವೈದ್ಯಕೀಯ ವೃತ್ತಿ ನಿರತರು, ಆಶಾ ಕಾರ್ಯಕರ್ತೆಯರು ಹಾಗೂ ಪೌರಕಾರ್ಮಿಕರ ಜೀವ ಸುರಕ್ಷತೆ ಕಾಪಾಡಬೇಕು ಎಂದು ಆಲ್ ಇಂಡಿಯಾ ಡೆಮಾಕ್ರೇಟಿಕ್ ಸ್ಟೂಡೆಂಟ್ಸ್ ಆರ್ಗನೈಸೇಷನ್ (ಎಐಡಿಎಸ್‌ಒ) ಸರಕಾರವನ್ನು ಆಗ್ರಹಿಸಿದೆ.

ಸಾಮಾಜಿಕ ಅಂತರ ಕಾಪಾಡುವ ಜತೆಗೆ ಬಿತ್ತಿಪತ್ರಗಳನ್ನು ಪ್ರದರ್ಶಿಸುವ ಮೂಲಕ ಬುಧವಾರ ಸಾಮಾಜಿಕ ಜಾಲತಾಣಗಳಲ್ಲಿ ಮೌನ ಪ್ರತಿಭಟನೆ ನಡೆಸಿರುವ ಸ್ಥಳೀಯ ಎಐಡಿಎಸ್‌ಒ ಕಾರ್ಯಕರ್ತರು, ವೈದ್ಯರು ಎದುರಿಸುತ್ತಿರುವ ಅಗತ್ಯ ವೈದ್ಯಕೀಯ ಸೌಲಭ್ಯಗಳ ಕೊರತೆಗಳ ಮೇಲೆ ಬೆಳಕು ಚೆಲ್ಲುವ ಮೂಲಕ ಸರಕಾರದ ಗಮನ ಸೆಳೆಯುವ ಪ್ರಯತ್ನ ಮಾಡಿದರು. ಕೊರೊನಾ ಹೋರಾಟದ ಮುಂಚೂಣಿಯಲ್ಲಿರುವ ವೃತ್ತಿ ನಿರತರಿಗೆ ಸಮರ್ಪಕ ಸುರಕ್ಷಾ ಸಾಮಾಗ್ರಿಗಳಿಲ್ಲ. ಪಿಪಿಇ ಕಿಟ್‌ಗಳ ಕೊರತೆಯಿಂದ ಜೀವ ಸುರಕ್ಷತೆ ಇಲ್ಲವಾಗಿದೆ. ಸರಿಯಾದ ಸಂಬಳವೂ ಇಲ್ಲದೆ ನಿಸ್ವಾರ್ಥ ಸೇವೆ ಸಲ್ಲಿಸುತ್ತಿರುವವರ ಬುಕಿಗೆ ಸರಕಾರ ಆಸರೆಯಾಗಬೇಕು ಎಂದು ಆಗ್ರಹಿಸಿದರು.

ದೇಶ ಕಟ್ಟುವ ಕಾರ್ಮಿಕರು, ಬಡ ರೈತರು, ಕೃಷಿ ಕಾರ್ಮಿಕರು ಅತ್ಯಂತ ಸಂದಿಗ್ಧ ಪರಿಸ್ಥಿತಿಯಲ್ಲಿದ್ದಾರೆ. ವಲಸೆ ಕಾರ್ಮಿಕರು ಜೀವನಾವಶ್ಯಕಗಳಿಲ್ಲದೆ ತಮ್ಮೂರಿಗೆ ನೂರಾರು ಮೈಲಿ ನಡೆದು ಹೋಗುತ್ತಿದ್ದಾರೆ. ದಣಿವು ಹಸಿವಿನಿಂದ ಕಾರ್ಮಿಕರು ಮತ್ತು ಅವರ ಮಕ್ಕಳು ಅಸು ನೀಗಿದ್ದಾರೆ. ದುಡಿಯುವ ಜನರಿಗೆ ಸರಕಾರಗಳಿಂದ ಸರಿಯಾದ ನೆರವು ದೊರಕಿಲ್ಲ. ಜನಸಾಮಾನ್ಯರು ಕಾರ್ಮಿಕರ ಸಹಾಯಕ್ಕೆ ಬಂದಿದ್ದಾರೆ. ಬೆಳೆದ ಬೆಳೆ ಮಾರುಕಟ್ಟೆಗೆ ಸಾಗಿಸಲು ವ್ಯವಸ್ಥೆಯಿಲ್ಲದೆ ರೈತರು ಸಂಕಷ್ಟದಲ್ಲಿದ್ದಾರೆ.

ಕಷ್ಟಪಟ್ಟು ಸಾಗಿಸಿದರೂ ಕೊಳ್ಳುವವರಿಲ್ಲ. ದುಡಿಮೆಯಿಲ್ಲದ ರೈತ ಒಪ್ಪತ್ತಿಗೂ ಪರದಾಡುವ ಪರಿಸ್ಥಿತಿಯಿದೆ. ಸರಕಾರ ಸಂಕಷ್ಟದಲ್ಲಿರುವವರಿಗೆ ರೇಷನ್ ವ್ಯವಸ್ಥೆ ಮಾಡಬೇಕು ಎಂದು ಎಐಡಿಎಸ್‌ಒ ಅಧ್ಯಕ್ಷ ಗೌತಮ ಪರತೂರಕರ್ ಒತ್ತಾಯಿಸಿದರು. ಕಾರ್ಯದರ್ಶಿ ವೆಂಕಟೇಶ ದೇವದುರ್ಗಾ, ಮುಖಂಡರಾದ ಅರುಣ ಹಿರೆಬಾನರ ಹಾಗೂ ದತ್ತಾತ್ರೇಯ ಹುಡೇಕರ ಆಂದೋಲನದಲ್ಲಿ ಪಾಲ್ಗೊಂಡಿದ್ದರು.