ಉದ್ಯೋದ ಖಾತ್ರಿ ಕಾರ್ಮಿಕರಿಗೆ ಮೂಲಭೂತ ಸೌಲಭ್ಯಗಳ ಒದಗಿಸಲು ಆಗ್ರಹ

ಸುರಪುರ: ತಾಲೂಕಿನ ಅರಕೇರಾ (ಕೆ) ಗ್ರಾಮ ಪಂಚಾಯತಿ ವ್ಯಾಪ್ತಿಯ ಲಕ್ಷ್ಮೀಪುರ ಗ್ರಾಮದ ಬಳಿಯಲ್ಲಿ ಉದ್ಯೋಗ ಖಾತ್ರಿ ಯೋಜನೆಯಡಿ ಕಾಮಗಾರಿ ಆರಂಭಿಸಲಾಯಿತು. ಈಗಾಗಲೆ ಜಿಲ್ಲಾ ಪಂಚಾಯತಿಯಿಂದ ಬದುಗಳ ನಿರ್ಮಾಣದ ಕಾಮಗಾರಿಗಳಿಗೆ ಚಾಲನೆ ನೀಡಿದ್ದು,ಲಕ್ಷ್ಮೀಪುರ ಗ್ರಾಮದಲ್ಲಿಯೂ ಕಾಮಗಾರಿಗಳ ಆರಂಭಿಸಲಾಗಿದೆ.

ಕಾಮಗಾರಿ ನಿರ್ಮಾಣದಲ್ಲಿ ತೊಡಗಿರುವ ಉದ್ಯೋಗ ಖಾತ್ರಿ ಕಾರ್ಮಿಕರಿಗೆ ಅವಶ್ಯವಾದ ಮೂಲಭೂತ ಸೌಕರ್ಯಗಳು ನೀಡಿಲ್ಲವೆಂಬ ಆರೋಪವು ಕೇಳಿ ಬಂದಿದೆ.ಈಗಾಗಲೆ ಲಾಕ್‍ಡೌನ್ ಘೋಷಣೆಯಿಂದ ಕೆಲಸವಿಲ್ಲದೆ ಮನೆಯಲ್ಲಿ ಕುಳಿತಿದ್ದ ಜನರಿಗೆ ಈಗ ಉದ್ಯೋಗ ಖಾತ್ರಿಯಡಿ ಕೆಲಸ ದೊರೆತಿದ್ದು ಸಂತೋಷ ತಂದಿದೆ.ಆದರೆ ಕೆಲಸಕ್ಕೆ ಹಾಜರಾಗಿರುವ ಕಾರ್ಮಿಕರಿಗೆ ಅವಶ್ಯಕವಾದ ಸೌಲಭ್ಯಗಳಿಲ್ಲವೆಂದು ಆರೋಪಿಸಲಾಗುತ್ತಿದೆ.

ಚಿಕ್ಕ ಮಕ್ಕಳನ್ನು ಹೊತ್ತುಕೊಂಡು ಕೆಲಸಕ್ಕೆ ಕಾರ್ಮಿಕರು ಬರುತ್ತಾರೆ.ಕಾಮಗಾರಿ ನಡೆಸುವ ಸ್ಥಳಗಳಲ್ಲಿ ಟೆಂಟ್ ಹಾಕಿ ನೆರಳಿನ ವ್ಯವಸ್ಥೆ ಕಲ್ಪಿಸಬೇಕೆಂದು,ಕುಡಿಯುವ ನೀರಿನ ಸಮಸ್ಯೆಯು ಇದೆ ಹಾಗು ಕಾರ್ಮಿಕರಿಗೆ ಮುಖಕ್ಕೆ ಮಾಸ್ಕ್ ನೀಡಿಲ್ಲ,ಸ್ಯಾನಿಟೈಜರ್ ಕೂಡ ನೀಡಿಲ್ಲ ಇದರಿಂದ ಕಾರ್ಮಿಕರಿಗೆ ಕೊರೊನಾ ಸೊಂಕಿನ ಭಯ ಕಾಡಲಿದೆ ಎಂದು ಹೆಸರು ಹೆಳಲಿಚ್ಛಿಸದ ಕಾರ್ಮಿಕರೊಬ್ಬರು ಆತಂಕ ವ್ಯಕ್ತಪಡಿಸುತ್ತಿದ್ದಾರೆ.

ಕೊರೊನಾ ಭೀತಿಯಿರುವ ಸಂದರ್ಭದಲ್ಲಿ ತಾಲೂಕಿನಲ್ಲಿ ನಡೆಯುತ್ತಿರುವ ಉದ್ಯೋಗ ಖಾತ್ರಿ ಕೆಲಸಗಳಲ್ಲಿ ತೊಡಗಿರುವ ಕಾರ್ಮಿಕರಿಗೆ ಅಗತ್ಯ ಸೌಲಭ್ಯಗಳನ್ನು ಒದಗಿಸಬೇಕು.ಇಲ್ಲವಾದಲ್ಲಿ ಕಾರ್ಮಿಕರಿಗಾಗಿ ಪಂಚಾಯತ್‍ಗಳ ಮುಂದೆ ಹೋರಾಟ ನಡೆಸಬೇಕಾಗುವುದು. – ಶರಣು ಅನಕಸುಗೂರು ಸಾಮಾಜಿಕ ಹೋರಾಟಗಾರ ಲಕ್ಷ್ಮೀಪುರ

ಬೇಸಿಗೆಯಾಗಿದ್ದರಿಂದ ಬಿಸಿಲಿನ ಬೇಗೆ ಹೆಚ್ಚಿದೆ,ಇಂತಹ ಸಂದರ್ಭದಲ್ಲಿ ಕಾರ್ಮಿಕರು ಕೆಲಸ ಮಾಡುತ್ತಾರೆ.ಬಿಸಿಲಿನ ಧಗೆಯಲ್ಲಿ ಹೆಚ್ಚೆಚ್ಚು ನೀರು ಕುಡಿಯುವಂತೆ ವೈದ್ಯರು ಸದಾಕಾಲ ತಿಳಿಸುತ್ತಾರೆ.ಆದರೆ ಉದ್ಯೋಗ ಖಾತ್ರಿ ಕಾಮಗಾರಿ ನಡೆಸುತ್ತಿರುವಲ್ಲಿ ಕುಡಿಯಲು ನೀರಿನ ಸಮಸ್ಯೆ ಇದೆ ಎಂದರೆ ಇದು ನಿಜಕ್ಕೂ ಆತಂಕಕಾರಿ ಸಂಗತಿಯಾಗಿದೆ.

ಅಲ್ಲದೆ ಕೊರೊನಾ ರಣಕೇಕೆ ಸಂದರ್ಭದಲ್ಲಿ ಸಾಮಾಜಿಕ ಅಂತರ ಕಾಪಾಡಿಕೊಳ್ಳುವುದು ಹಾಗು ಮುಖಕ್ಕೆ ಮಾಸ್ಕ್ ಧರಿಸುವುದು ಹಾಗು ಆಗಾಗ ಕೈಗಳನ್ನು ತೊಳೆಯುವುದು ಮುಖ್ಯವಾಗಿದೆ.ಜಿಲ್ಲಾ ಪಂಚಾಯತ್ ಈ ಕಾರ್ಮಿಕರ ಮನವಿಗೆ ಸ್ಪಂಧಿಸುವುದೊ ಕಾದು ನೋಡಬೇಕಿದೆ.