ಕಾರ್ಮಿಕರ ಧ್ವನಿಯಾಗಿದ್ದವರು ಎಮ್.ಸಿ.ನರಸಿಂಹನ್: ದೇವಿಂದ್ರಪ್ಪ ಪತ್ತಾರ್

ಸುರಪುರ: ಕರ್ನಾಟಕದ ಕಾರ್ಮಿಕರಿಗೆ ಹೋರಾಟದ ಮಾರ್ಗದರ್ಶಕರಾಗಿ,ಅನೇಕ ಜನಪರವಾದ ಹೋರಾಟಗಳನ್ನು ಹುಟ್ಟುಹಾಕಿ ನಾಡಿನ ಕಾರ್ಮಿಕರ ಧ್ವನಿಯಾಗಿದ್ದರು ಕಾಮ್ರೇಡ್ ಎಮ್.ಸಿ.ನರಸಿಂಹನ್ ಎಂದು ಎಐಟಿಯುಸಿ ಜಿಲ್ಲಾ ಉಪಾಧ್ಯಕ್ಷ ದೇವಿಂದ್ರಪ್ಪ ಪತ್ತಾರ ಮಾತನಾಡಿದರು.

ನಗರದ ಡಾ: ಬಾಬಾ ಸಾಹೇಬ್ ಅಂಬೇಡ್ಕರ ವೃತ್ತದಲ್ಲಿ ಹಮ್ಮಿಕೊಂಡಿದ್ದ ಶ್ರದ್ಧಾಂಜಲಿ ಸಭೆಯಲ್ಲಿ ಭಾಗವಹಿಸಿ ಮಾತನಾಡಿ,ನರಸಿಂಹನ್ ಅವರು ವಿದ್ಯಾರ್ಥಿ ದೆಸೆಯಲ್ಲಿಯೆ ಹೋರಾಧ ಬದುಕಿಗೆ ದುಮುಕಿದವರು.ಇಂಜಿನಿಯರ್ ವಿದ್ಯಾರ್ಥಿಯಾಗಿದ್ದ ಅವರು ಕೋಲಾರ ಚಿನ್ನದ ಗಣಿ ಕಾರ್ಮಿಕರಿಗಾಗಿ ಹೋರಾಟ ಆರಂಭಿಸಿ ಇಮಜಿನಿಯರಿಂಗ್ ಕೊನೆಯ ವರ್ಷದಲ್ಲಿ ಶಿಕ್ಷಣವನ್ನು ಕೈಬಿಟ್ಟು ಕಾರ್ಮಿಕರಿಗಾಗಿ ಹೊರಾಟಕ್ಕಿಳಿದರು.ನಂತರ ಅವರು ಕಾನೂನು ಪದವಿ ವ್ಯಾಸಂಗ ಮಾಡಿ ಉತ್ತಮವಾದ ವಕೀಲರಾಗಿ ಸೇವೆ ಸಲ್ಲಿಸಿದವರು.

1957 ರಲ್ಲಿ ಸಿಪಿಐ ಪಕ್ಷದಿಂದ ಕೆಜಿಎಫ್ ಕ್ಷೇತ್ರದಿಂದ ವಿಧಾನಸಭಾ ಸದಸ್ಯರಾಗಿದ್ದವರು ಅಲ್ಲದೆ 1962 ಚೀನಾ ಮಹಾಯುದ್ಧದ ಸಂದರ್ಭದಲ್ಲಿ ಜೈಲುವಾಸ ಅನುಭವಿಸಿದವರು ಹಾಗು 1962 ರಿಂದ 67ರ ವರೆಗೆ ವಿಧಾನ ಪರಿಷತ್ ಸದಸ್ಯರು ಕೂಡ ಆಗಿದ್ದರು.ಸ್ವತಃ ನ್ಯಾಯವಾದಿಗಳಾಗಿದ್ದ ಅವರು ಅನೇಕ ಕಾರ್ಮಿಕರ ಪರವಾದ ವ್ಯಾಜ್ಯಗಳಲ್ಲಿ ನ್ಯಾಯ ದೊರಕಿಸಿದವರು ನರಸಿಂಹನ್ ಅವರ ಕೊಡುಗೆ ನಾಡಿಗೆ,ಕಾರ್ಮಿಕ ವರ್ಗಕ್ಕೆ ದೊಡ್ಡದಿದೆ ಎಂದರು.

ಇಂದು ಅವರನ್ನು ಕಳೆದುಕೊಂಡು ನಾವೆಲ್ಲ ಬಡವರಾಗಿದ್ದೇವೆ ಎಂದು ನೋವಿನಿಂದ ನುಡಿದರು.

ಸಭೆಯ ಆರಂಭದಲ್ಲಿ ಎಮ್.ಸಿ.ನರಸಿಂಹನ್ ಅವರ ಭಾವಚಿತ್ರಕ್ಕೆ ಪೂಜೆ ಸಲ್ಲಿಸಿ ಮಾಲಾರ್ಪಣೆ ಮಾಡಿ ಎರಡು ನಿಮಿಷಗಳ ಮೌನಾಚರಣೆಯೊಂದಿಗೆ ಶ್ರದ್ಧಾಂಜಲಿ ಅರ್ಪಿಸಲಾಯಿತು.

ಈ ಸಂದರ್ಭದಲ್ಲಿ ಮೂಲನಿವಾಸಿ ಅಂಬೇಡ್ಕರ್ ಸೇನೆ ರಾಜ್ಯ ಪ್ರಧಾನ ಕಾರ್ಯದರ್ಶಿ ರಾಹುಲ್ ಹುಲಿಮನಿ,ಧರ್ಮಣ್ಣ ಹುಲಿ,ದಲಿತ ಸೇನೆ ತಾಲೂಕು ಅಧ್ಯಕ್ಷ ನಿಂಗಣ್ಣ ಗೋನಾಲ,ಕಟ್ಟಡ ಕಾರ್ಮಿಕರ ಸಂಘದ ಅಧ್ಯಕ್ಷ ದೇವೆಂದ್ರಪ್ಪ ನಗರಗುಂಡ,ಕಟ್ಟಡ ಕಾರ್ಮಿಕರ ಸಂಘದ ತಾಲೂಕು ಅಧ್ಯಕ್ಷ ಮಲ್ಲಯ್ಯ ವಗ್ಗಾ,ಕಾರ್ಮಿಕ ಬಂಧು ಬಸವರಾಜ ಪೂಜಾರಿ,ತಿಮ್ಮಣ್ಣ ದೊರೆ ಸೇರಿದಂತೆ ಅನೇಕರಿದ್ದರು.