ವಾಡಿ ಜಲ ಶುದ್ಧೀಕರಣ ಘಟಕದಿಂದ ಕಲುಷಿತ ನೀರು!

ವಾಡಿ: ತುಕ್ಕು ಹಿಡಿದ ಮೋಟಾರು ಯಂತ್ರಗಳು. ವರ್ಷದ ಹಿಂದೆ ನಿಷ್ಕ್ರೀಯಗೊಂಡ ಮೂರು ಪಿಎಸಿ ಪೌಡರ್ ಮಿಶ್ರಣ ಘಟಕ, ನಾಲ್ಕು ವರ್ಷಗಳ ಹಿಂದೆಯೇ ಕೆಟ್ಟು ಕೆರಹಿಡಿದುಹೋದ ಕ್ಲೋರಿನೇಷನ್ ಯಂತ್ರಗಳು. ಆಲಂ ಮತ್ತು ಬ್ಲೀಚಿಂಗ್ ಪೌಡರ್ ನೇರವಾಗಿ ನೀರಿಗೆ ಎಸೆದು ಸಂಪ್ರದಾಯ ಪೂರೈಸುವ ಸಿಬ್ಬಂದಿಗಳು. ಆಲಂ ಕೋಣೆಯಲ್ಲಿ ನಾಯಿಗಳ ಮಲ ಮೂತ್ರ. ಬಳಕೆಯಾಗದೆ ಐದು ವರ್ಷಗಳಿಂದ ಬೀದಿಗೆ ಬಿದ್ದ ಎರಡು ಕ್ಲೋರಿನೇಷನ್ ಸೆಲ್‌ಗಳು. ರಿಪೇರಿ ಭಾಗ್ಯ ಕಳೆದುಕೊಂಡ ನೀರು ಸರಬರಾಜು ಮೋಟಾರ್ ಯಂತ್ರ. ಜಲ ಶುದ್ಧೀಕರಣ ಘಟಕದಲ್ಲಿ ಸಿಗಲಿಲ್ಲ ಕುಡಿಯಲು ಶುದ್ಧ ನೀರು!.

ಹೀಗೆ ಸಂಪೂರ್ಣ ನಿಷ್ಕ್ರೀಯಗೊಂಡು ನಿಂತಿದ್ದ ವಾಡಿ ನಗರದ ಪುರಸಭೆಗೆ ಸೇರಿದ ಕುಂದನೂರು ಭೀಮಾನದಿ ದಡದಲ್ಲಿರುವ ಜಲ ಶುದ್ಧೀಕರಣ ಘಟಕ್ಕಕ್ಕೆ ರವಿವಾರ ದಿಢೀರ್ ಭೇಟಿ ನೀಡಿದ ಸೋಷಲಿಸ್ಟ್ ಯುನಿಟಿ ಸೆಂಟರ್ ಆಫ್ ಇಂಡಿಯಾ (ಎಸ್‌ಯುಸಿಐ) ಕಮ್ಯುನಿಸ್ಟ್ ಪಕ್ಷದ ಕಾರ್ಯದರ್ಶಿ ಕಾಮ್ರೇಡ್ ವೀರಭದ್ರಪ್ಪ ಆರ್.ಕೆ ನೇತೃತ್ವದ ನಾಯಕರ ತಂಡ, ಅಧಿಕಾರಿಗಳ ದೀರ್ಘ ನಿರ್ಲಕ್ಷ್ಯ ಧೋರಣೆಗೆ ಆಕ್ರೋಶ ವ್ಯಕ್ತಪಡಿಸಿತು. ಶುದ್ಧ ನೀರಿನ ಹೆಸರಿನಲ್ಲಿ ಸಾರ್ವಜನಿಕರ ಹಣ ಹೇಗೆ ಲೂಟಿಯಾಗುತ್ತಿದೆ ಎಂಬುದನ್ನು ಕಣ್ಣಾರೆ ಕಂಡು ದಂಗಾದರು. ಪ್ರತಿ ವರ್ಷ ಜಲ ಶುದ್ಧೀಕರಣ ಘಟಕಕ್ಕೆ ರೂ.೭೦ ಲಕ್ಷಕ್ಕೂ ಅಧಿಕ ಹಣ ಖರ್ಚು ಮಾಡಲಾಗುತ್ತಿದ್ದರೂ ಜನತೆಗೆ ಕಲುಷಿತ ನೀರನ್ನೇ ಪೂರೈಕೆ ಮಾಡುತ್ತಿರುವ ಪುರಸಭೆ ಅಧಿಕಾರಿಗಳ ಕ್ರಮದ ವಿರುದ್ಧ ಸಿಡಿಮಿಡಿಗೊಂಡರು.

ಕಲುಷಿತ ಜಲ ಶುದ್ಧೀಕರಣಕ್ಕೆ ಬೇಕಾದ ಎಲ್ಲಾ ಯಂತ್ರೋಪಕರಣಗಳು ರಿಪೇರಿ ಮಾಡಿಸಲಾಗಷ್ಟು ಹಾಳಾಗಿವೆ. ಯಂತ್ರದ ಮೂಲಕ ನೀರಿಗೆ ಮಿಶ್ರಣ ಮಾಡಬೇಕಾದ ಆಲಂ ಅನ್ನು ಅವೈಜ್ಞಾನಿಕವಾಗಿ ನೀರಿಗೆ ಹಾಕಲಾಗುತ್ತಿದೆ. ಮೂರು ಪದರಿನ ಮರಳಿನಲ್ಲಿ ನೀರು ಸಾಗಿ ಬರಬೇಕಾದ ಘಟಕದ ರೀತಿ ಸರಿಯಾಗಿಲ್ಲ. ನದಿಯಿಂದ ಘಟಕದಲ್ಲಿ ಸಂಗ್ರಹಗೊಳ್ಳುವ ನೀರನ್ನೇ ನೇರವಾಗಿ ಬಡಾವಣೆಗಳಿಗೆ ತಲುಪಿಸಲಾಗುತ್ತಿದೆ. ಜನರು ಮಾತ್ರ ಅಶುದ್ಧ ನೀರನ್ನೇ ಕುಡಿದು ನಾನಾ ರೀತಿಯ ರೋಗಗಳಿಗೆ ತುತ್ತಾಗುತ್ತಿದ್ದಾರೆ.

ಘಟಕದ ದುಸ್ಥಿತಿ ನೋಡಿದರೆ ಜಲ ಶುದ್ಧೀಕರಣದ ಹೆಸರಿನಲ್ಲಿ ಪ್ರತಿ ವರ್ಷ ಕೋಟಿಗಟ್ಟಲೇ ಹಣ ದುರ್ಬಳಕೆಯಾಗುತ್ತಿದೆ. ಈ ಕುರಿತು ತನಿಖೆಯಾಗಬೇಕು. ನಗರದ ವಿವಿಧ ಬಡಾವಣೆಗಳಲ್ಲಿರುವ ನೀರಿನ ಟ್ಯಾಂಕ್‌ಗಳ ಸ್ವಚ್ಚತೆ ಮರೆತಿರುವ ಅಧಿಕಾರಿಗಳು, ಜನರ ಹೊಟ್ಟೆಗೆ ರಾಡಿ ನೀರು ಹಾಕುತ್ತಿದ್ದಾರೆ. ಕೂಡಲೇ ವಾಡಿ ಜಲ ಶುದ್ಧೀಕರಣ ಘಟಕಕ್ಕೆ ನೂತನ ಯಂತ್ರೋಪಕರಣ ಅಳವಡಿಕೆಯಾಗಬೇಕು.

ವಾರದಲ್ಲಿ ವಾಡಿ ಜನತೆಗೆ ಶುದ್ಧ ನೀರು ಪೂರೈಕೆಯಾಗದಿದ್ದರೆ ಪುರಸಭೆಗೆ ಮುತ್ತಿಗೆ ಹಾಕಿ ಪ್ರತಿಭಟಿಸಲಾಗುವುದು ಎಂದು ಕಾಮ್ರೇಡ್ ವೀರಭದ್ರಪ್ಪ ಆರ್.ಕೆ ಎಚ್ಚರಿಕೆ ನೀಡಿದರು. ಪಕ್ಷದ ಸದಸ್ಯರಾದ ವೆಂಕಟೇಶ ದೇವದುರ್ಗಾ, ಮಲ್ಲಿನಾಥ ಹುಂಡೇಕಲ್, ಅರುಣಕುಮಾರ ಹಿರೇಬಾನರ್ ಈ ಸಂದರ್ಭದಲ್ಲಿ ಇದ್ದರು.