ಅಗ್ನಿ ಯುಗದ ಹರಿಕಾರ ಖುದಿರಾಂ ಬೋಸ್

ವಾಡಿ: ದೇಶದ ಸ್ವಾತಂತ್ರ್ಯಕ್ಕಾಗಿ ಮೊಟ್ಟ ಬದಲ ಬಾರಿಗೆ ಗಲ್ಲುಗಂಬಕ್ಕೆ ಕೊರಳೊಡ್ಡಿದ ಧೀರ ಹುತಾತ್ಮ ಖುದಿರಾಂ ಬೋಸ್, ಅಗ್ನಿ ಯುಗದ ಹರಿಕಾರರಾಗಿ ಮತ್ತು ಯುವಜನರ ಪಾಲಿಗೆ ಸ್ಪೂರ್ತಿಯ ಚಿಲುಮೆಯಾಗಿ ಇಂದಿಗೂ ಜೀವಂತವಾಗಿದ್ದಾರೆ ಎಂದು ಎಐಡಿವೈಒ ನಗರ ಸಮಿತಿ ಕಾರ್ಯದರ್ಶಿ ಮಲ್ಲಿನಾಥ ಹುಂಡೇಕಲ್ ಹೇಳಿದರು.

ಲಾಡ್ಲಾಪುರ ಗ್ರಾಮದಲ್ಲಿ ಎಐಡಿವೈಒ ಕ್ರಾಂತಿಕಾರಿ ಯುವಜನ ಸಂಘಟನೆ ವತಿಯಿಂದ ಏರ್ಪಡಿಸಲಾಗಿದ್ದ ಖುದಿರಾಂ ಬೋಸ್ ಅವರ ೧೧೨ನೇ ಹುತಾತ್ಮ ದಿನದ ಸಮಾರಂಭದಲ್ಲಿ ಮುಖ್ಯ ಅತಿಥಿಯಾಗಿ ಅವರು ಮಾತನಾಡಿದರು. ಬ್ರಿಟೀಷರಿಂದ ಭಾರತೀಯರು ಎದುರಿಸುತ್ತಿದ್ದ ಎಲ್ಲಾ ರೀತಿಯ ಶೋಷಣೆಗಳಿಂದ ಮುಕ್ತಗೊಳಿಸುವ ಕನಸು ಕಂಡಿದ್ದರು. ಸ್ವಾತಂತ್ರ್ಯಕ್ಕಾಗಿ ಪ್ರಾಣವನ್ನು ಅರ್ಪಿಸಲು ಮುಂದೆ ಬಂದ ದೈರ್ಯಶಾಲಿ ಹೋರಾಟಗಾರ ಖುದಿರಾಂ ಅವರ ಸಂಘರ್ಷದ ಜೀವನವನ್ನು ವಿದ್ಯಾರ್ಥಿ ಯುವಜನರು ಆದರ್ಶವಾಗಿ ಸ್ವೀಕರಿಸಬೇಕು. ನಾವಿಂದು ಎದುರಿಸುತ್ತಿರುವ ಸ್ವಾತಂತ್ರ್ಯ ಭಾರತದೊಳಗಿನ ಅನ್ಯಾಯ, ದೌರ್ಜನ್ಯ, ಅಸತ್ಯಗಳ ವಿರುದ್ಧ ಹೋರಾಡಬೇಕಿದೆ. ವೈಜ್ಞಾನಿಕ ಶಿಕ್ಷಣ ಮತ್ತು ಉದ್ಯೋಗ ಹಕ್ಕಿಗಾಗಿ ಚಳುವಳಿ ಕಟ್ಟಲು ಮುಂದಾಗಬೇಕಿದೆ ಎಂದು ಹೇಳಿದರು.

ಯುವಜನ ಮುಖಂಡ ರಾಜು ಒಡೆಯರ ಹಾಗೂ ಎಸ್‌ಯುಸಿಐ ಗ್ರಾಮ ಘಟಕ ಕಾರ್ಯದರ್ಶಿ ಗುಂಡಣ್ಣ ಎಂ.ಕೆ ಮಾತನಾಡಿದರು. ಬಸವರಾಜ ನಾಟೇಕರ, ಮಲ್ಲಣ್ಣ ದಂಡಬಾ, ಅವಿನಾಶ ಒಡೆಯರ, ಸಾಬು ಯಾದವ, ನಾಗರಾಜ ಅಕ್ಕಿ, ಸುನೀಲ ಜಂಗಮ, ಸಾಯಿಬಣ್ಣ ಸುಣಗಾರ, ಬಸವರಾಜ ಪೂಜಾರಿ, ಆಶಪ್ಪ ದಂಡಬಾ, ಚಂದ್ರು ದಂಡಬಾ ಮತ್ತಿತರರು ಪಾಲ್ಗೊಂಡಿದ್ದರು. ಹಳಕರ್ಟಿ ಹಾಗೂ ವಾಡಿ ನಗರದಲ್ಲಿ ಕ್ರಾಂತಿಕಾರಿ ಖುದಿರಾಂ ಬೋಸ್ ಅವರ ಹುತಾತ್ಮ ದಿನಾಚರಣೆ ನಡೆಯಿತು.