ಜಿ.ಪಂ. ಸ್ಥಾಯಿ ಸಮಿತಿ: ಶಾಸಕ ಗುತ್ತೇದಾರ ಬಣದ ಮೆಲುಗೈ

ಕಲಬುರಗಿ: ಜಿಲ್ಲಾ ಪಂಚಾಯತಿಯ ಕೊನೆಯ ಅವಧಿಯ ಸ್ಥಾಯಿ ಸಮಿತಿಯ ಅಧ್ಯಕ್ಷರ ನೇಮಕದಲ್ಲಿ ಆಳಂದ ಶಾಸಕ ಸುಭಾಷ್ ಆರ್ ಗುತ್ತೆದಾರ ಬಣದ ಸದಸ್ಯರು ಮೆಲುಗೈ ಸಾಧಿಸಿದ್ದಾರೆ.

ಶುಕ್ರವಾರ ಜಿ.ಪಂ ಸಭಾಂಗಣದಲ್ಲಿ ಜರುಗಿದ ಆಯ್ಕೆ ಪ್ರಕ್ರಿಯೆಯಲ್ಲಿ ಬಿಜೆಪಿಯ ಶರಣಪ್ಪ ತಳವಾರ, ರೇವಣಸಿದ್ದಪ್ಪ ಸಂಕಾಲಿ ಮತ್ತು ಗುರುಶಾಂತ ಪಾಟೀಲ ನಿಂಬಾಳ ಕೃಷಿ ಮತ್ತು ಕೈಗಾರಿಕಾ ಸ್ಥಾಯಿ ಸಮಿತಿಯ ಅಧ್ಯಕ್ಷರ ಸ್ಥಾನದ ಆಪೇಕ್ಷಿತರಾಗಿದ್ದರು. ಶರಣಪ್ಪ ತಳವಾರ ಅವರು ಹೈಕಮಾಂಡ್ ಪ್ರಭಾವ ಬಳಿಸಿ ಅಧ್ಯಕ್ಷರಾಗಲು ಕೊನೆಯವರೆಗೂ ಪ್ರಯತ್ನ ನಡೆಸಿದ್ದರು. ಆದರೆ ಆಳಂದ ಶಾಸಕ ಸುಭಾಷ್ ಆರ್ ಗುತ್ತೇದಾರರು ತಮ್ಮ ಪಟ್ಟು ಸಡಿಲಿಸದೇ ಕಳೆದ ಬಾರಿ ಪಕ್ಷದ ವಿರುದ್ಧ ಹೋದವರನ್ನು ಸಹಿಸಿಕೊಳ್ಳಲಾಗುವುದಿಲ್ಲ ಹೀಗಾಗಿ ಪಕ್ಷ ನಿಷ್ಠರಿಗೆ ಮಣೆ ಹಾಕಬೇಕೆಂದು ಒತ್ತಾಯ ತಂದು ತಮ್ಮ ಬೆಂಬಲಿಗರಿಗೆ ಸ್ಥಾಯಿ ಸಮಿತಿ ದೊರೆಯುವಂತೆ ಮಾಡುವಲ್ಲಿ ಯಶಸ್ವಿಯಾಗಿದ್ದಾರೆ.

ಮಾದನ ಹಿಪ್ಪರ್ಗಾ ಕ್ಷೇತ್ರದ ಸದಸ್ಯ ಗುರುಶಾಂತ ಪಾಟೀಲ ನಿಂಬಾಳ ಕೃಷಿ ಮತ್ತು ಕೈಗಾರಿಕಾ ಸ್ಥಾಯಿ ಸಮಿತಿ ಅಧ್ಯಕ್ಷರಾಗಿ ಅವಿರೋಧವಾಗಿ ಆಯ್ಕೆಯಾದರು. ಇವರ ಹೆಸರನ್ನು ಶಾಸಕ ಸುಭಾಷ್ ಆರ್ ಗುತ್ತೇದಾರ ಸೂಚಿಸಿದರು ಉಳಿದ ಸದಸ್ಯರು ಕೈ ಎತ್ತುವ ಮೂಲಕ ಬೆಂಬಲ ಸೂಚಿಸಿದರು.

ಈ ಹಿಂದೆ ಜಿ.ಪಂ ಅಧ್ಯಕ್ಷ ಸ್ಥಾನವನ್ನು ತಮ್ಮ ತಾಲೂಕಿಗೆ ತೆಗೆದುಕೊಳ್ಳುವಲ್ಲಿ ಯಶಸ್ವಿಯಾಗಿದ್ದ ಶಾಸಕ ಗುತ್ತೇದಾರ ಈಗ ಮತ್ತೆ ತಮ್ಮ ನಿಷ್ಟ ಸದಸ್ಯರಿಗೆ ಸ್ಥಾಯಿ ಸಮಿತಿ ಕೊಡಿಸುವ ಮೂಲಕ ಜಿ.ಪಂನಲ್ಲಿ ತಮ್ಮ ಪಾರುಪತ್ಯ ಮೆರೆದಿದ್ದಾರೆ.