ಪರಿಶಿಷ್ಟ ಜಾತಿಯ ಯುವಕನ ಕೊಲೆ: ಶಾಸಕ ಪ್ರಿಯಾಂಕ್ ಖರ್ಗೆ ಖಂಡನೆ

ಕಲಬುರಗಿ: ದೇವಸ್ಥಾನದ ಕಟ್ಟೆಯ ಮೇಲೆ ತಮ್ಮ ಸರಿ ಸಮನಾಗಿ ಪರಿಶಿಷ್ಟ ಜಾತಿಯ ಯುವಕನೋರ್ವ ಕುಳಿತಿದ್ದಕ್ಕೆ ಆತನನ್ನು ಕೊಲೆ ಮಾಡಿದ ಘಟನೆಯನ್ನು ಶಾಸಕರಾದ ಪ್ರಿಯಾಂಕ್ ಖರ್ಗೆ ಖಂಡಿಸಿದ್ದಾರೆ.

ಈ ಕುರಿತು ತಮ್ಮ ಫೇಸ್ ಬುಕ್ ಖಾತೆಯಲ್ಲಿ ಬರೆದುಕೊಂಡಿರುವ ಪ್ರಿಯಾಂಕ್ ಖರ್ಗೆ ಅವರು” ಈ ಘಟನೆ ಇಡೀ ಮಾನವ ಸಮಾಜವೇ ತಲೆ ತಗ್ಗಿಸುವಂತದ್ದು” ಎಂದು ಹೇಳಿದ್ದಾರೆ.

ಮಹಾನ್ ಮಾನವತವಾದಿ ಶ್ರೀ ಬಸವೇಶ್ವರರ ವಚನವೊಂದನ್ನು ಉಲ್ಲೇಖಿಸಿರುವ ಶಾಸಕರು, ಇಡೀ ಜಗತ್ತಿಗೆ ಸಮಾನತೆ ಹಾಗೂ ವಿಶ್ವ ಮಾನವ ಸಂದೇಶ ಸಾರಿದ ಬಸವಣ್ಣ ಹಾಗೂ ಕುವೆಂಪು ಜನ್ಮ ತಾಳಿದ ಈ ನಾಡಿನಲ್ಲಿ ಅಸ್ಪೃಶ್ಯತೆ ವಿಚಾರವಾಗಿ ನಡೆದ ಹತ್ಯೆ ಖಂಡನೀಯವಾದದು.

ವಿಜಯಪುರ ಜಿಲ್ಲೆ ಸಿಂದಗಿ ತಾಲೂಕಿನ ಬೂದಿಹಾಳ ಗ್ರಾಮದಲ್ಲಿ ನಡೆದ ಈ ಘಟನೆಗೆ ಸಂಬಂಧಿಸಿದಂತೆ ಆರೋಪಿಗಳನ್ನು ಬಂಧಿಸಿ ಕಠಿಣ ಶಿಕ್ಷೆ ನೀಡುವಂತೆ ಸರಕಾರವನ್ನು ಅವರು ಒತ್ತಾಯಿಸಿದ್ದಾರೆ.

ಜಾತಿವಿಡಿದು ಸೂತಕವನರಸುವೆ
ಜ್ಯೋತಿವಿಡಿದು ಕತ್ತಲೆಯನರಸುವೆ
ಇದೇಕೋ ಮರುಳ ಮಾನವ? ಜಾತಿಯಲ್ಲಿ ಅಧಿಕನೆಂಬೆ.
ವಿಪ್ರ ಶತಕೋಟಿಗಳಿದ್ದಲ್ಲಿ ಫಲವೇನೋ?
ಭಕ್ತನೆ ಶಿಖಾಮಣಿ ಎಂದುದು ವಚನ.
ನಮ್ಮ ಕೂಡಲಸಂಗಮ ಶರಣರ ಪಾದಪರುಷವ ನಂಬು,
ಕೆಡಬೇಡ ಮಾನವ..
ಜಗಜ್ಯೋತಿ ಬಸವೇಶ್ವರ.

ಮನುಷ್ಯ ಮನುಷ್ಯರ ನಡುವಿನ ಜಾತಿಯಲ್ಲಿ ಮೇಲು- ಕೀಳು ಎನ್ನುವ ವ್ಯವಸ್ಥೆಗೆ ಈ ಮಾರ್ಮಿಕ ವಚನದ ಮೂಲಕವೇ ಪ್ರಿಯಾಂಕ್ ಖರ್ಗೆ ಅವರು ಉತ್ತರಿಸಿದ್ದಾರೆ.