ಗಾಂಜಾ ಸೊಪ್ಪು ಮಾರಾಟಗಾರರ ಬಂಧನ

ನಾಗಮಂಗಲ: ಮನೆಯಲ್ಲಿ ಗಾಂಜಾ ಸೊಪ್ಪು ಮಾರಾಟ ಮಾಡುತ್ತಿದ್ದ ಅಡ್ಡೆ ಮೇಲೆ ದಾಳಿ ನಡೆಸಿರುವ ಪೊಲೀಸರು ಮೂವರು ಆರೋಪಿಗಳನ್ನು ಬಂಧಿಸಿ 75 ಸಾವಿರ ರೂ. ಮೌಲ್ಯದ ಗಾಂಜಾ ಸೊಪ್ಪನ್ನು ವಶಪಡಿಸಿಕೊಂಡಿರುವ ಘಟನೆ ಪಟ್ಟಣದಲ್ಲಿ ನಡೆದಿದೆ.

ಪಟ್ಟಣದ ರಹಮತ್‍ನಗರ ನಿವಾಸಿ ಜಾವದ್‍ಪಾಷ ಅವರ ಜಮೀನಿನಲ್ಲಿ ಗಾಂಜಾ ಸೊಪ್ಪು ಬೆಳೆದು ಮಾರಾಟ ಮಾಡುತ್ತಿದ್ದ ಇಮ್ರಾಜ್ ಖಾನ್, ಸಯ್ಯದ್ ಅಜರ್ ಹಾಗೂ ಮಹಮದ್ ಜುಹೇಬ್ ಎಂಬುವರನ್ನು ವಶಕ್ಕೆ ಪಡೆದಿರುವ ಟೌನ್ ಪೊಲೀಸರು ಸುಮಾರು 75 ಸಾವಿರ ಮೌಲ್ಯದ 2.650 ಕೆಜಿ ಗಾಂಜಾ ಸೊಪ್ಪು, 3 ಮೊಬೈಲ್, 1900
ರೂ. ನಗದು ಹಣವನ್ನು ವಶಪಡಿಸಿಕೊಂಡಿದ್ದಾರೆ.

ಮಹಮ್ಮದ್ ಎಂಬಾತ ಗಾಂಜಾ ಸೊಪ್ಪನ್ನು ಸಾರ್ವಜನಿಕರಿಗೆ ಮಾರಾಟ ಮಾಡುತ್ತಿರುವ ಬಗ್ಗೆ ಮಾಹಿತಿ ಬಂದ ಮೇರೆಗೆ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಕೆ.ಪರಶುರಾಮ್, ಅಪರ ಪೊಲೀಸ್ ವರಿಷ್ಠಾಧಿಕಾರಿ ಧನಂಜಯ, ಡಿವೈಎಸ್ಪಿ ಕೆ.ಬಿ.ವಿಶ್ವನಾಥ್ ಅವರ ಮಾರ್ಗದರ್ಶನದಲ್ಲಿ ಸಿಪಿಐ ಕೆ.ರಾಜೇಂದ್ರ, ಪಿಎಸ್‍ಐ ಎಂ.ಎ.ರವಿಕಿರಣ್ ನೇತೃತ್ವದಲ್ಲಿ ದಾಳಿ ನಡೆಸಲಾಯಿತು.

ಪೋಬೆಷನರಿ ಪಿಎಸ್‍ಐ ಸಿದ್ದರಾಜು, ಸಿಬ್ಬಂದಿಗಳಾದ ರಮೇಶ್, ಕುಮಾರ, ಟಿ.ಬಿ.ಕೃಷ್ಣ, ಸಿದ್ದಪ್ಪ, ಉಮೇಶ್, ಜೀಪ್ ಚಾಲಕರಾದ ರಾಜೇಶ್, ಬಸವರಾಜು, ಮಹೇಂದ್ರಸ್ವಾಮಿ ದಾಳಿಯಲ್ಲಿ ಪಾಲ್ಗೊಂಡಿದ್ದರು.