ಕಾಲ್ಚೆಂಡ ‘ನೀಲಿ ಚೇ’ ಇನ್ನಿಲ್ಲ.!!

– ಆಶಿಕ್ ಮುಲ್ಕಿ

ಇದು‌ ಕಾಲ್ಚೆಂಡು ಗದ್ಗತವಾಗುವ ಸಮಯ. ಒಡೆಯನ ಕಳೆದುಕೊಂಡು ಕಣ್ಣೀರಾಗುವ ಹೊತ್ತು.‌ ಮಾಂತ್ರಿಕನ ಕಳೆದುಕೊಂಡ ಹಸಿರ ಹಾಸಿಗೆಗೆ ಮುದುಡಿ ಕೂಡುವ ಗತಿ. ಬಲೆಯ ಮೂಲೆ ಮೂಲೆಯಲ್ಲೂ ಬಿಕ್ಕಿ ಬಿಕ್ಕಿ ಅಳುವ ಸದ್ದು. ಎರಡು ತುದಿಯಲ್ಲಿ ನೆಟ್ಟ ಕಂಬಗಳು ಅವುಡುಗಚ್ಚಿ ನಿಲ್ಲುವ ಪರಿ.‌ ಹಳದಿ ಕಣ್ಣೀರಾಗಿ, ಕೆಂಪು ನೆನಪಾಗಿ ಬದಲಾದ ಸ್ಥಿತಿ. ಕಾಲ್ಚೆಂಡು ದಿಗ್ಗಜ ಮರಡೋನಾ ಇನ್ನಿಲ್ಲ ಎನ್ನುತ್ತಲೇ, ಹೀಗೆ ಇಡೀ ಮೈದಾನ ಶೋಕವಾಗಿ ಬಿಟ್ಟಿದೆ.

ಮೆಸ್ಸಿ ದಿ ಬೆಸ್ಟ್. ಆ ಬಗ್ಗೆ ತಕರಾರೇ ಸಲ್ಲ. ಆದರೆ ಹಾಗೇ ಹಿಂದಕ್ಕೆ ನಡೆದರೆ ಮೆಸ್ಸಿ ಅನ್ನೋ ಮಹಾನ್ ಪ್ರತಿಭೆಯ ಮಾದರಿ ಈ ಮರಡೋನಾ. ದಿಗ್ಗಜನಿಗೇ ಮಾದರಿಯಾದ ಈ ಮರಡೋನರನ್ನು ಏನೆಂದು ಸಂಭೋಧಿಸುವುದು..? ಈಗ ಒಂದೇ ಮಾತಿನಲ್ಲಿ, ಹೀಗೆ ಹೇಳಿ ನಿಲ್ಲಿಸಬಹುದು ಈಗ. ದಿವಂಗತ ದಿಗ್ಗಜ.

ಒಂದು ಆತ್ಮಸೆಳೆತದ ಮಾತು. ಮೆಸ್ಸಿ ನನ್ನನ್ನು ಖುಷಿ ಪಡಿಸುತ್ತಾನೆ. But this fellow ಮರಡೋನಾ ನನ್ನನ್ನು ಸೆಳೆಯುತ್ತಾನೆ. ಎದೆಯೊಳಗೆ ಅಚ್ಚೆಯಾಗಿ ಉಳಿಯುತ್ತಾನೆ. ದೀರ್ಘವಾಗಿ ಕಾಡುತ್ತಾನೆ. ನಾನೇನು ಮರಡೋನಾರ ಕಾಲ್ಚಳಕವನ್ನು ಕಣ್ಣಾರೆ ಕಂಡವನಲ್ಲ. ನೇರಪ್ರಸಾರ ನೋಡಿದವನೂ ಅಲ್ಲ. Still, ಮರಡೋನಾ ಎಂದರೆ ಜಿನುಜಿನುಗಿ ಬರುವ ಹುಮ್ಮಸ್ಸು ಇದೆಯಲ್ಲಾ, ಯೂಟ್ಯೂಬಿನ ಕೆಂಪು ಗೆರೆಯ ಮೇಲೆ ಕೈ ಇಡದೆ ನೋಡುವಷ್ಟಿದೆ.

1982 ಇಡೀ ಜಗತ್ತು ಅದೊಂದು ವಿಸ್ಮಯಕ್ಕೆ ಸಾಕ್ಷಿಯಾಗಿತ್ತು. ಆದರೆ ಅದೊಂದು ವಿಸ್ಮಯ ಎಂದು ತಿಳಿಯ ಬೇಕಾದರೆ ಮತ್ತೆ ಐದು ವಸಂತ ಕಾಯಬೇಕಾಯ್ತು. ಹೌದು, 1978ರಲ್ಲಿ ವಯೋಮಿತಯ ಕಾರಣಕ್ಕೆ ವಿಶ್ವಕಪ್ ನಿಂದ ಅರ್ಜೆಂಟೀನಾ ಟೀಂನಿಂದ ಹೊರಗುಳಿದ ಮರಡೋನಾ 1982ರಲ್ಲಿ ತಂಡ ಕೂಡಿದರು. But First Impression is the best Impression ಅನ್ನೋದು ಮರಡೋನಾಗೆ ಹೇಳಿದ ಮಾತಲ್ಲ. ಮೊದಲ ಲಗ್ಗೆಯಲ್ಲಿ ಮೈದಾನವಿಡೀ ಎಡವಿ ಬಿದ್ದ ಮರಡೋನಾ ನಂತರ ಎದ್ದು ನಿಂತಿದ್ದು 1987ರ ಮಹಾ ಯುದ್ಧದಲ್ಲಿ. ಆನಂತರ ಸೃಷ್ಟಿಯಾಗಿದ್ದು ಇಂದಿಗೆ ಇತಿಹಾಸ. ಬರೀ ಇತಿಹಾಸವಲ್ಲ ಜಗತ್ತೇ ಗೆದ್ದು ಬೀಗಿದ ಓರ್ವ ಬಡ ತಾಯಿಯ ರೋಚಕ ವೃತ್ತಾಂತ.

ಈ‌ ನಡುವೆ ಸೋಲುಗಳಿದ್ವು. ಬದುಕಿನ ಸಂಘರ್ಷಗಳಿದ್ವು. ಅವಮಾನಗಳಾದ್ವು. ಸನ್ಮಾನಗಳಾದ್ವು. ಕಾಂಟ್ರವರ್ಸಿಗಳಾದ್ವು. ಆದರೂ ಅವರು ನಿಜಕ್ಕೂ ಗ್ರೇಟ್. ಯಾಕಂದ್ರೆ ಅವರ ಹೆಸರು ಮರಡೋನಾ. ಮನುಷ್ಯತ್ವ ಹಾಗೂ ಸಹೋದರತ್ವ ಮೈಗೂಡಿಸಿಮೊಂಡ ಅಪ್ಪಟ ಮನುಷ್ಯ ಪ್ರೇಮಿ. ಚೇ ಅನ್ನೋ ಕ್ರಾಂತಿಯನ್ನು ತೊಗಲಿಗಂಟಿಸಿ ಬದುಕಿದವರು. ಕವಿತೆಗಳನ್ನು ಹಾಡುತ್ತಾ, ಕುಣಿಯುತ್ತಾ ಕುಣಿಸುತ್ತಾ ಬದುಕಿದವರು. ಫ್ಯಾಸಿಸಮ್ ಅನ್ನು ಕಣ್ಣೋಟದಿಂದಲೇ ಧಿಕ್ಕರಿಸಿದವರು. & he did. In all the way.

ಹೀಗೆ ಹೇಳಿ‌ ಕೂತರೆ ಮರಡೋನಾ‌ ಮುಗಿಯದ ಅಧ್ಯಾಯ. ಯೋಚನೆಗೂ ನಿಲುಕಿದ, ಹಾಳೆಗೂ ಸಿಗದ ಮಹಾ ಬದುಕು. ಮೆಸ್ಸಿನ ಅನ್ನೋ ದಿಗ್ಗಜನ ಮೈಯ ರೋಮಗಳೆಲ್ಲಾ ಎದ್ದು ನಿಲ್ಲುವಂತೆ ಮಾಡಿದ ಮರಡೋನಾ ಅನ್ನೋ ಮಹಾನ್ ದಿಗ್ಗಜ ಇನ್ನಿಲ್ಲ. ಅರಗಿಸಿಕೊಳ್ಳಿ.‌ ಸಾಧ್ಯವಾದರೆ, ಈ ನಮ್ಮ ಅಲ್ಪ ಬದುಕನ್ನು ಜಿಂಕೆಯಂತೆ ಕುಣಿದು ರೋಚಕಗೊಳಿಸಿದ್ದಕ್ಕೆ ಕೃತಘ್ನರಾಗಿ.

ಹೊರಡುವ ಮುನ್ನ ಮರಡೋನಾ ಹೇಳಿದ ಮಾತಿದು

“I worked hard all my life for this. Those who say I don’t deserve anything, that it all came easy, can kiss my arse.”