ಸಮಾನತೆ ಸಮಾಜ ಕಟ್ಟುವ ಸಂವಿಧಾನ ರಚಿಸಿದ್ದು ಅಂಬೇಡ್ಕರ್- ಮೆಂಗನ್

ಶಹಾಬಾದ:ಇಡೀ ಜಗತ್ತಿನಲ್ಲಿ ನಡೆಯದ ಸಾಮಾಜಿಕ ನ್ಯಾಯವನ್ನು ಅನುಷ್ಠಾನಕ್ಕೆ ತರುವ, ಸಮಾನತೆ ಸಮಾಜ ಕಟ್ಟುವ ಸಂವಿಧಾನವನ್ನು ರಚಿಸಿ, ಎಲ್ಲಾ ಶೋಷಿತ ವರ್ಗಗಳ ಪಾಲಿಗೆ ಆಶಾಕಿರಣವಾದವರು ಡಾ.ಬಾಬಾ ಸಾಹೇಬ ಅಂಬೇಡ್ಕರ್ರವರು ಎಂದು ದಸಂಸ ಜಿಲ್ಲಾ ಸಂಚಾಲಕ ಸುರೇಶ ಮೆಂಗನ ಹೇಳಿದರು.

ಅವರು ದಲಿತ ನೌಕರರ ಸಂಘದ ವತಿಯಿಂದ ನಗರದ ಅಂಬೇಡ್ಕರ್ ಪ್ರತಿಮೆಯ ಆವರಣದಲ್ಲಿ ಸಂವಿಧಾನ ಸಮರ್ಪಣ ದಿನದ ಅಂಗವಾಗಿ ಆಯೋಜಿಸಲಾದ ವಿಚಾರ ಸಂಕೀರಣ ಕಾರ್ಯಕ್ರಮದ ಮುಖ್ಯ ಭಾಷಣಕಾರರಾಗಿ ಮಾತನಾಡಿದರು.

ಈ ದೇಶದ ಚರಿತ್ರೆ ಶುದ್ಧವಾಗಿರಲಿಲ್ಲ. ಕೇವಲ ಸುಳ್ಳುಗಳಿಂದ ಕೂಡಿತ್ತು. ಇಲ್ಲಿನ ಜನರಿಗೆ ಸ್ವತಂತ್ರವಾಗಿ ಬದುಕುವ ಹಕ್ಕಿರಲಿಲ್ಲ. ಎಲ್ಲೂ ಓಡಾಡುವಂತಿರಲಿಲ್ಲ. ಅಲ್ಲದೇ ಅಸ್ಪೃಶ್ಯರನ್ನು ಮುಟ್ಟುವಂತಿರಲಿಲ್ಲ. ಹೀಗೆ ಅನೇಕ ಕಟ್ಟುಪಾಡುಗಳ ಅಸಮಾನತೆಯನ್ನು ಹೊಂದಿತ್ತು. ಇದನ್ನು ತಿಳಿದುಕೊಂಡ ಬಾಬಾ ಸಾಹೇಬ ಅಂಬೇಡ್ಕರ್ರವರು ವಿಶ್ವದ ಅತಿ ದೊಡ್ಡ ಸಂವಿಧಾನ ರಚಿಸುವ ಮೂಲಕ ಭಾರತೀಯರ ಬದುಕು ರೂಪಿಸಿದ ಮಹಾನ್ ನಾಯಕರಾದರು. ಇಂದು ದೇಶದ ರಾಷ್ಟ್ರಪತಿಗೂ, ಅಧಿಕಾರಿಗಳಿಗೂ, ಕಸಗುಡಿಸುವವನಿಗೂ ಅಲ್ಲದೇ ದೇಶದ ಸಾಮನ್ಯ ವ್ಯಕ್ತಿಗೂ ಜಾತಿ ಬೇಧವಿಲ್ಲದೇ ಒಂದೇ ರೀತಿಯ ಮತದಾನದ ಹಕ್ಕನ್ನು ಒದಗಿಸಿದ್ದು ಡಾ. ಬಾಬಾ ಸಾಹೇಬ ಅಂಬೇಡ್ಕರ್ ಅದು ಸಂವಿಧಾನದ ಮೂಲಕ ಎಂದು ಹೇಳಿದರು.

ಸಾಮಾಜಿಕ ಚಿಂತಕ ಲೋಹಿತ್ ಕಟ್ಟಿ ಮಾತನಾಡಿ, ಅಂಬೇಡ್ಕರ ಸತತ ಪರಿಶ್ರಮದ ಫಲವಾಗಿ ಸಂವಿಧಾನ ರೂಪುಗೊಂಡಿದೆ. ದೀನ ದಲಿತರಿಗೆ ಬೆಳಕು ನೀಡುವ ಮೂಲಕ ಸಾಮಾಜಿಕ ನ್ಯಾಯ ಎತ್ತಿ ಹಿಡಿದಿದ್ದಾರೆ. ಹೀಗಾಗಿ ಅವರು ದೇಶದ ಪ್ರತಿಯೊಬ್ಬರ ಮನದಲ್ಲಿ ಅಚ್ಚಳಿಯದೇ ಉಳಿದುಕೊಂಡಿದ್ದಾರೆ. ಭಾರತ ಇದೀಗ ಮುಂದುವರೆಯುತ್ತಿರುವುದು ಅವರ ಚಿಂತನೆಯ ಫಲವಾಗಿದ್ದು, ದೇಶವು ಸದಾ ಕಾಲ ಅವರಿಗೆ ಸ್ಮರಿಸಲಿದೆ ಎಂದರು.

ಭರತ್ ಧನ್ನಾ, ಬಸವರಾಜ ಮಯೂರ,ಪ್ರವೀಣ ರಾಜನ್,ಶಂಕರ ಜಾನಾ, ಸುನೀಲ ಮೆಂಗನ ವೇದಿಕೆಯ ಮೇಲಿದ್ದರು.ಅಲ್ಲಮಪ್ರಭು ಮಸ್ಕಿ ಅಧ್ಯಕ್ಷತೆ ವಹಿಸಿದ್ದರು.

ರವಿ ಮುತ್ತಗಿಕರ್ ನಿರೂಪಿಸಿದರು, ಇಮ್ಯಾನುವೆಲ್ ಸ್ವಾಗತಿಸಿದರು, ಪರಶುರಾಮ ವಂದಿಸಿದರು.