ಶಹಾಬಾದ: ಗ್ರಾಪಂ ಚುನಾವಣೆ ಶೇ 63.3 % ರಷ್ಟು ಮತದಾನ

 

ಶಹಾಬಾದ: ತಾಲೂಕಿನಲ್ಲಿ ಮಂಗಳವಾರ ನಡೆದ ಗ್ರಾಪಂ ಮೊದಲ ಹಂತದ ಚುನಾವಣೆ ಬಹುತೇಖ ಶಾಂತಿಯುತವಾಗಿ ನಡೆದಿದ್ದು, ಶೇ 63.3 %ರಷ್ಟು ಮತದಾನವಾಗಿದೆ.

ತಾಲೂಕಿನ ನಾಲ್ಕು ಗ್ರಾಪಂಯ ಒಟ್ಟು 27399 ಮತದಾರರಿದ್ದು, ಅದರಲ್ಲಿ 13613 ಪುರುಷ ಮತದಾರರು ಹಾಗೂ 13785 ಮಹಿಳಾ ಮತದಾರರಿದ್ದಾರೆ. ಅದರಲ್ಲಿ 17354 ಮತದಾರರು ಮತ ಚಲಾಯಿಸಿದರು. 8847 ಪುರುಷ ಮತದಾರರು ಮತ್ತು 8507 ಮಹಿಳಾ ಮತದಾರರು ಮತ ಚಲಾಯಿಸಿದರು. ತಾಲೂಕಿನಲ್ಲಿ ಒಟ್ಟು ಶೇ 63.3 ಮತದಾನದಲ್ಲಿ ಶೇ. 64.9 ಪುರುಷ ಮತದಾರು ಹಾಗೂ 61.7 ಮಹಿಳಾ ಮತದಾರರು ಮತ ಚಲಾಯಿಸಿದ್ದಾರೆಂದು ತಹಸೀಲ್ದಾರ ಸುರೇಶ ವರ್ಮಾ ತಿಳಿಸಿದರು.

ತಾಲೂಕಿನ ಭಂಕೂರ, ಮರತೂರ, ತೊನಸನಹಳ್ಳಿ(ಎಸ್) ಹಾಗೂ ಹೊನಗುಂಟಾ ಗ್ರಾಪಂಯ ಮತದಾನ ಕೇಂದ್ರದಲ್ಲಿ ಬೆಳಿಗ್ಗೆ 7 ಗಂಟೆಗೆ ಮತದಾನ ಪ್ರಾರಂಭಗೊಂಡಿದ್ದು, ಬೆಳಗಿನ ಜಾವದಲ್ಲಿಯೇ ಮತದಾರರು ಬಂದು ಬಿರುಸಿನ ಮತ ಚಲಾಯಿಸಿದರು.

ಮಧ್ಯಾಹ್ನ ಹೊತ್ತಿಗೆ ಮತದಾನ ನೀರಸ ಪ್ರಕ್ರಿಯೆ ಕಂಡು ಬಂದರೂ, ಮತ್ತೆ ನಾಲ್ಕು ಗಂಟೆಯಿಂದ ಬಿರುಸಿನ ಮತದಾನ ಕಂಡುಬಂದಿತು.
ಹೊಟ್ಟೆ ಪಾಡಿಗಾಗಿ ಪಟ್ಟಣಕ್ಕೆ ಹೋದ ಜನರನ್ನು ಅಭ್ಯರ್ಥಿಗಳು ಕರೆಯಿಸಿ, ತಮ್ಮ ಪರವಾಗಿ ಮತದಾನ ಮಾಡಲು ಹರಸಾಹಸ ಪಟ್ಟರು.
ಬೆಳಿಗ್ಗೆ ಬೇಗನೆ ಬಂದು ಮತ ಚಲಾಯಿಸಿ ಕೃಷಿ ಕೆಲಸಕ್ಕೆ ಹೋಗುವಂತ ದೃಶ್ಯ ಕಂಡುಬಂದಿತು. ಮತದಾರರು ಮತದಾನ ಕೇಂದ್ರಕ್ಕೆ ಒಬ್ಬೊಬ್ಬರಾಗಿ ಸರತಿ ಸಾಲಿನಲ್ಲಿ ನಿಂತು ತಮ್ಮ ಹಕ್ಕನ್ನು ಚಲಾಯಿಸಿದರು. ಮತಗಟ್ಟೆಯ ದೂರದಲ್ಲಿ ಅಭ್ಯಥರ್ಿಗಳು ನಿಂತು ಮತದಾನ ಕೇಂದ್ರಕ್ಕೆ ಬರುವ ಮತದಾರರನ್ನು ಓಲೈಸಲು ಮುಂದಾಗುತ್ತಿದ್ದರು.

ಬೆಂಗಳೂರು, ಪೂನಾ, ಮುಂಬಯಿ, ಸೋಲಾಪೂರ, ಹೈದ್ರಾಬಾದನಲ್ಲಿ ಕೆಲಸಕ್ಕೆ ಹೋದ ಮತದಾರರನ್ನು ಗ್ರಾಮಕ್ಕೆ ಬರಲು ಅಭ್ಯರ್ಥಿಗಳು ವಾಹನಗಳ ವ್ಯವಸ್ಥೆ ಮಾಡಿದ್ದರು.ಅಲ್ಲದೇ ಅಭ್ಯರ್ಥಿಗಳು ಮತದಾರರಿಗೆ ಕರೆ ಮಾಡಿ ಮತ ಚಲಾಯಿಸಲು ಹೇಳುತ್ತಿರುವುದು ಕಂಡು ಬಂದಿತು.ಅಲ್ಲದೇ ತಮ್ಮ ತಮ್ಮ ಅಭ್ಯರ್ಥಿಗಳ ಪರವಾಗಿ ಮತಗಟ್ಟೆಗೆ ಬರುತ್ತಿದ್ದ ಮತದಾರರನ್ನು ಸೆಳೆಯಲು ಅವರ ಬೆಂಬಲಿಗರು ಕಸರತ್ತು ನಡೆಸುತ್ತಿದ್ದ ದೃಶ್ಯಗಳು ಕಂಡು ಬಂದವು. ಮತದಾನದ ವೇಳೆ ಸ್ಯಾನಿಟೈಜರ್, ಸ್ಕ್ರೀನಿಂಗ್ ಮೂಲಕ ಪರೀಕ್ಷೆ ನಡೆಸಿ, ಸಾಮಾಜಿಕ ಅಂತರ ಕಾಪಾಡಿಕೊಂಡು ಮತ ಚಲಾಯಿಸಲು ಕಟ್ಟು ನಿಟ್ಟಿನ ಕ್ರಮ ಕೈಗೊಳ್ಳಲಾಗಿತ್ತು.

ಯಾವುದೇ ಅಹಿತಕರ ಘಟನೆ ನಡೆಯದಂತೆ ಡಿವಾಯ್ಎಸ್ಪಿ ವೆಂಕನಗೌಡ ಪಾಟೀಲ, ಪಿಐ ಅಮರೇಶ.ಬಿ ನೇತೃತ್ವದಲ್ಲಿ ಪಿಎಸ್ಐಗಳಾದ ತಿರುಮಲೇಶ, ಯಲ್ಲಮ್ಮ ಹಾಗೂ ಪೊಲೀಸ್ ಸಿಬ್ಬಂದಿಗಳು ಸೂಕ್ತ ಪೊಲೀಸ್ ಬಂದೋಬಸ್ತ್ ಮಾಡಿದ್ದರು.