ಇನ್‌ಕ್ಲಾಬ್ ಎ ಡೆಕ್ಕನ್ ಉರ್ದು ಪತ್ರಿಕೆ ರಜತೋತ್ಸವಕ್ಕೆ ಕನ್ನಡ ಪತ್ರಿಕೆ ಬಿಡುಗಡೆಗೆ ಸಿದ್ಧತೆ

ಶಹಾಬಾದ: ಕಳೆದ ೨೫ ವರ್ಷಗಳಿಂದ ಉರ್ದು ಭಾಷೆಯ ಪತ್ರಿಕೆಯನ್ನು ಪ್ರಕಟಿಸುತ್ತಿದ್ದು, ರಜತ ಮಹೋತ್ಸವದ ಶುಭ ಸಂದರ್ಭದಲ್ಲಿ ಕನ್ನಡ ಭಾಷೆಯ ಪತ್ರಿಕೆಯೊಂದನ್ನು ಶೀಘ್ರದಲ್ಲಿಯೇ ಪ್ರಾರಂಭಿಸುವದಾಗಿ ಕಲಬುರಗಿಯ ಇನ್‌ಕ್ಲಾಬ್ ಎ ಡೆಕ್ಕನ್ ಪತ್ರಿಕೆ ಸಂಪಾದಕ ಮಹಿಯೋದ್ದಿನ್ ಪಾಶಾ ಹೇಳಿದರು.

ಅವರು ನಗರದಲ್ಲಿ ಇನ್‌ಕ್ಲಾಬ್ ಎ ಡೆಕ್ಕನ್ ಉರ್ದು ಪತ್ರಿಕೆಯ ರಜತ ಮಹೋತ್ಸವ ನಿಮಿತ್ತ ನಡೆದ ಅಭಿನಂದನಾ ಸಮಾರಂಭದಲ್ಲಿ ಮಾತನಾಡಿದರು.

ಮೂಲತ ರಾಜಕೀಯದಿಂದ ಪತ್ರಿಕಾ ರಂಗಕ್ಕೆ ಬಂದಿದ್ದರಿಂದ ಜನರ ಯೋಚನೆ, ವಿಚಾರಗಳ, ಜನರ ನಾಡಿ ಮಿಡಿತ ಅರಿತಿದ್ದರಿಂದ ಒಂದು ಪತ್ರಿಕೆ ಪ್ರಾರಂಭಿಸುವದು ಕಷ್ಟವಾಗಲಿಲ್ಲ, ಇನ್ನೂ ಓದುಗರು, ಅಭಿಮಾನಿಗಳು ಪತ್ರಿಕೆ ಮುನ್ನಡೆಯಲು ಸಹಕರಿಸಿದ್ದಾರೆ ಎಂದು ಹೇಳಿ, ಶೇ. ೯೦ ರಷ್ಟು ಕನ್ನಡ ಭಾಷೆಯ ವರದಿಗಳನ್ನು ಉರ್ದು ಭಾಷೆಯಲ್ಲಿ ತರ್ಜುಮೆ ಮಾಡುವದಲ್ಲದೆ ಅದನ್ನು ಪತ್ರಿಕೆ ಭಾಷೆಗೆ ಅಳವಡಿಸಿಕೊಳ್ಳುವದು ಒಂದು ಛಾಲೆಂಜಿಂಗ್ ಕೆಲಸವಾಗಿದೆ ಎಂದು ಹೇಳಿ, ಉರ್ದು ಪತ್ರಿಕೆಗೆ ಓದುಗರು ಕೊಟ್ಟ ಪ್ರೀತಿ, ವಿಶ್ವಾಸ ಮುಂದೆ ಬರುವ ಕನ್ನಡ ಪತ್ರಿಕೆಗೆ ಕೊಡಬೇಕೆಂದು ಮನವಿ ಮಾಡಿದರು.

ಕಾಂಗ್ರೆಸ್ ಪಕ್ಷದ ನಗರ ಅಧ್ಯಕ್ಷ ಡಾ.ರಶೀದ ಮರ್ಚಂಟ್ ಮಾತನಾಡಿ, ೨೫ ವರ್ಷ ಅಲ್ಪಸಂಖ್ಯಾತ ಭಾಷೆಯಲ್ಲಿ ಪತ್ರಿಕೆ ನಡೆಸುವದು ಒಂದು ಸಾಹಸ ಕೆಲಸವಾಗಿದೆ. ಅದರ ಯಶಶ್ವಿಯಲ್ಲಿಯೇ ಕನ್ನಡ ಪತ್ರಿಕೆ ಪ್ರಾರಂಭಿಸುತ್ತಿರುವದು ಸ್ವಾಗತಾರ್ಹವಾಗಿದ್ದು. ಅಬ್ದುಲ್ ಕಲಾಂ ಅವರು ಪತ್ರಿಕೆಯನ್ನು ಮನೆಮನೆಗೆ ಹಂಚಿರುವಂತೆ, ಇವರು ಸಹ ಪ್ರಾರಂಭದಲ್ಲಿ ಮನೆಮನೆಗೆ ಪತ್ರಿಕೆ ಹಂಚುವ ಕೆಲಸ ಮಾಡಿದ್ದು, ಅಂದು ಹಾಸ್ಯ ಮಾಡುತ್ತಿದ್ದ ಜನ ಇಂದು ಮುಖ ಎತ್ತಿ ನೋಡುವಂತೆ ಸಾಧನೆಗೈದಿದ್ದಾರೆ ಎಂದು ಹೇಳಿದರು.

ನಗರ ಸಭೆ ಮಾಜಿ ಅಧ್ಯಕ್ಷ ಗಿರೀಶ ಕಂಬಾನೂರ ಮಾತನಾಡಿ, ಉರ್ದು ಪತ್ರಿಕೆಯ ರಜತಮಹೋತ್ಸವ, ಮುಂದೆ ಸುವರ್ಣ,ವಜ್ರ ಮಹೋತ್ವ ಆಚರಿಸಲಿ, ಕನ್ನಡ ಪತ್ರಿಕೆಯ ಇದೇ ಹಾದಿಯಲ್ಲಿ ಸಾಗಲಿ ಎಂದು ಹೇಳಿದರು.

ಕಾರ್ಯಕ್ರಮದಲ್ಲಿ ನಗರಾಭಿವೃದ್ದಿ ಪ್ರಾಧಿಕಾರದ ಮಾಜಿ ಅಧ್ಯಕ್ಷ ಹಾಶಮ್ ಖಾನ್, ಫಜಲ್ ಪಟೇಲ್, ನಗರ ಸಭೆ ಸದಸ್ಯರಾದ ಸೂರ್ಯಕಾಂತ ಕೋಬಾಳ, ರಜನಿಕಾಂತ (ಭಂಟಿ), ಮುಖಂಡರಾದ ಅನ್ವರ ಪಾಶಾ ನಸಿರೋದ್ದಿನ್, ರಾಕೇಶ ಪವಾರ, ಸಲೀಮ್ ಇದ್ದರು.